اقوام متحدہ ءِ سیکرٹری جنرل انتونیو گوترز ءَ وزارت داخلہ ءِ تر ءُ تاب کتگ، وفاقی وزیر داخلہ محسن نقوی ءَ گوں ھاسیں گند ءُ نند

اسلام آباد۔8اکتوبر  (اے پی پی): اقوام متحدہ ءِ سیکرٹری جنرل انتونیو گوترز ءَ وزارت داخلہ ءِ تر ءُ تاب کتگ، اودا آئی ءَ وفاقی وزیر داخلہ محسن نقوی ءُ وزیر مملکت طلال چوہدری ءَ گوں گند ءُ نند کتگ۔ وزارت داخلہ ءِ نیمگ ءَ جاڑی بوتگیں بیان ءِ رد ءَ گند ءُ نند ءِ ساھت ءَ جہانی ءُ دمگی ایمنی ءِ جاور ءُ اقوام متحدہ ءِ امن مشن آنی ھوالگ ءَ سرجمیں رنگ ءَ گپ ءُ تران کنگ بوت۔ اے موہ ءِ سر ءَ اسپیشل سیکرٹری داخلہ، ایڈیشنل سیکرٹری داخلہ ءُ ایندگر مزنیں کارندہ ھم ساڑی بوتگ اَنت۔ گند ءُ نند ءِ ساھت ءَ وفاقی تہی کارانی وزیر محسن نقوی ءَ گوشت کہ پاکستان ناشرکاری ءِ ھلاپ ءَ گلوبل جنگ ءَ جنگ ءَ انت۔ آئی ءَ میاں اوستمانی براتی ءَ را ھال داتگ کہ اے وھد ءَ اوگانستان ءَ 25 ناشرکاریں گل سرگرم اَنت کہ آ دگنیا ءِ امن ءِ واستہ مزنیں ھترہ ءِ جوڑ کنگ ءَ اَنت ءُ اے ھترہ ءَ گوں گر ءُ چیل بوھگ ءِ واستہ دگنیا ءَ را یکجائی گامگیج زورگ لوٹ ایت۔ وزیر داخلہ ءَ اے گپ ءِ پدرائی کت کہ پاکستان اقوام متحدہ ءِ امن مشن آنی تہ ءَ وتی سرجمیں کرد ءَ را برجاہ دار ایت، ایشی ءِ تہ ءَ پاکستان پولیس ءِ افسر ءُ کارندہ ھم خدمت کنگ ءَ اَنت وھدیکہ پاکستان ءَ امن ءِ بحالی ءِ واستہ تاں انوگ ءَ 181 جان قربان کتگ۔ محسن نقوی ءَ قدرتی آفت ءِ وھد ءَ پاکستان ءِ سرجمیں کمک ءِ سر ءَ سیکرٹری جنرل ءِ ھم منت گپت۔ اقوام متحدہ ءِ سیکرٹری جنرل انتونیو گوتریس ءَ جھان ءِ امن ءِ واستہ پاکستان ءِ کرد ءِ توسیپ کنان ءَ گوشت کہ اقوام متحدہ ءِ امن مشن آنی تہ ءَ پاکستان ءِ بھر زوری مدام برجم ءُ ستا کرزیں بوتگ، جھان ءِ امن ءِ واستہ پاکستان ءِ قربانی اچ بے ھیال کنگ نہ بیت انت۔