انجینئر امیر مقام نا 8 اکتوبر 2005ء آپاکستان اٹ بروک آ بھسکار زمی جمب نا زہمی تے خراجِ عقیدت

اسلام آباد۔ 08 اکتوبر (اے پی پی)امورِ کشمیر، گلگت بلتستان و سیفران نا بنجائی وزیر انجینئر امیر مقام 8 اکتوبر 2005ء آ پاکستان اٹ بروک آ بھسکار زمی جمب نا زہمی تے خراجِ عقیدت پیش کرے۔ پنچ شنبے نا دے آتینا اسہ بیان اسے ٹی بنجائی وزیر انجینئر امیر مقام پارے کہ 8 اکتوبر 2005ء آ پاکستان اٹ بروک آ بھسکار زمی جمب ننا تاریخ نا اسہ است ہسون ءُ دے اس ئس ہرا ہزار آ نہادی جان تے ننے آن درے و لکھ آ بندغ آتے بے اُرا کرے۔ ولے دا سانحہ غا ن پد مچ آ قوم ہرا یکجہتی، صبر و استقامت نا درشانیءِ کرے، او ننا قومی تاریخ نا روشنا ءُ بشخ اسے۔ او یات کرسا پارے کہ زمی جمب آن پد او جندی وڑاٹ زہمی علاقہ غاتا دورہ ءِ کرے ، ریلیف کیمپ آتیٹی خذمت سرتس و قومی و جہانی ادارہ غاتون اوار اوار کمکی کارروائی تے منظم کرے۔ بنجائی وزیر پارے کہ ای تینٹ مظفرآباد، بالاکوٹ و باغ نا علاقہ غاتیٹیچندی دے تے گدریفیٹ ،ٹھپی تا جان پُڑسی ءِ کریٹ ، بےسیبو خاہوت آتا حال احوال ءِ ہلکٹ و کوشست کریٹ کہ ہر زہمی بندغ اسکان امداد سر مرے۔ او پارے کہ ہمو وخت آ مچ آ ملک آن رضاکار، پاک فوج، سول سوسائٹی و جہانی ادارہ غاک ہرا جوزہ اٹ کاریم کریر او اسہ درور اس جوڑ مس۔ او دا وخت آ خاص وڑاٹ شہید آتے یات کرے و اوفتا خاہوت آتون یکجہتی نا درشانی کرے۔ اونا پاننگ ئس کہ ننے نئے بیرہ مستین ءِ یات تخوئی ءِ بلکن بروک آ وخت اکن ہم تینے قدرتی آفت آتون مون تننگ نا لائخ جوڑ کروئی ءِ۔ بنجائی وزیر انجینئر امیر مقام پارے کہ دا دے ننے یاتترفک کہ مشکلات آک چائے اخس کہ بھلن مریر ، اگہ نن متحد مرین تو اوفتا مون ءِ توننگ مریک ۔