پسماندہ علاقہ غاتے ٹی دانش اسکول آتا جوڑ کننگ نا ڈٹ، 26 ارب 81 کروڑ روپئی جتا

اسلام آباد۔ 30 ستمبر (اے پی پی)حکومت ملک انا پسماندہ و کم آسراتی والا علاقہ غاتا لائخ آ چناتے آب اٹ ہنکینی تعلیم نا اسہ وڑ وارخواہی فراوان کننگ کن آزاد جموں و کشمیر، گلگت بلتستان، بلوچستان، خیبر پختونخوا و سندھ اٹی پین دانش اسکول آتا جوڑ کننگ نا ڈٹ جوڑ کرینے، ہراڑآجم وڑاٹ 26 ارب 81 کروڑ روپئی خڑچ بریک ۔ سرکاری بشخ انا شونداری ڈٹ آتیٹی حکومت آزاد جموں و کشمیر، گلگت بلتستان، بلوچستان، خیبر پختونخوا و سندھ اٹی پین دانش اسکول آتا جوڑ کننگ نا ڈٹ تیار کننگانے، ہراڑآ جم خڑچ 26 ارب 81 کروڑ روپئی بریک۔ ڈٹ انا مسخت ملک انا پسماندہ و کم آسراتی والا علاقہ غاتا حقدار طالب علم آتے آب اٹ ہنکینی تعلیم، رکھی تعلیمی چاگڑد و پوسکن تعلیمی آسراتی فراوان کننگ ءِ، تانکہ لائخ آ چناتے اوفتا جغرافیائی جاگہ یا خاہوتی کٹیا نا سوب آن تعلیمی وارخواہی تیان محروم مروئی مف۔ دانش اسکول آتا کمک اٹ حقدار چناتےآب اٹ تعلیم تون اوار بڑزکو تعلیم اسکان رسینگ کن گچین وارخواہی و سوگو تعلیمی بنداو فراوان کننگ آ چکار کننگک۔ دا گام آن مرانگا و و کم شون ہلوک علاقہ غاتا ورناتے تینا لائخی تے مون آ اتنگ وآخبت اٹی ملکی شونداری ٹی گچین کڑد ادا کننگ نا وارخواہی دُوبریک ۔ دا ڈٹ ’اُڑان پاکستان‘ نا بریبری: تعلیم و جان جوڑی نا تمبہ تون ہم گرنچ ءِ، ہرانا رداٹ تعلیم و جان جوڑی نا آسراتی اسکان بریبر رسینگ نا مون آ دننگ آ زور تننگانے۔ ڈٹ انا رداٹ جتا جتا صوبہ و ڈیہہ تیٹی دانش اسکول آتا دنگ ءِ ودفنگ آن او علاقہ غاتا چناتے پوسکن تعلیمی وارخواہی دُوبریک ہراڑے آب اٹ و ہنکینی تعلیمی ادارہ غاتسکان رسینگ محدود ءِ۔ آب اٹ تعلیم ءِ پسماندہ علاقہ غاتسکان سر کننگ بیرہ طالب علم آتا آخبت ءِ گچین کننگ نا ذریعہ اف بلکن راج اٹی تعلیمی بریبری ، انسانی وسیلہ غاتا شونداری و بروک آ چین تیکن گچین وارخواہی ودی کننگ نا بنداو ہم ارے ۔