پاکستان ءَ جنگ ءِ بدل ءَ امن ءِ راہ گچین کتگ؛ میاں اوستمانی ایمنی  ءِ واستہ  کشمیر ءُ فلسطین ءِ جیڑہانی گیش ءُ گیوار ءِ ھاتر ءَ جھان ءِ امن ءِ ھاتر ءَ المی انت،  اقوام متحدہ ءِ جنرل اسمبلی ءَ مزن وزیر محمد شہباز شریف ءِ گشتانک

اقوام متحدہ۔25ستمبر(اے پی پی): مزن وزیر محمد شہباز شریف ءَ گوشت کہ پاکستان ءَ دیم پہ دیم ءُ جنگ ءِ بدل ءَ امن ءُ گپ ءُ تران ءَ را گیشتر دوست داتگ۔ میاں اوستمانی، کشمیر ءُ فلسطین ءَ ھوار گوستگیں جیڈھ آنی گیواری ءِ واستہ جھان ءِ بھروسہ ءِ بحالی ءُ امن ءَ را دل یکیمی کنگ ءِ واستہ سک باز المی اِنت۔ انوگیں تناؤ ءِ جاوراں میزائل، ڈرون ءُ توپکانی گریوگ ءِ نیام ءَ سفارتکاری ءِ توار گیش بہ بیت۔ مزن وزیر ءَ اے ھیالانی درشانی جمعہ ءِ روچ ءَ اقوام متحدہ ءِ جنرل اسمبلی ءِ 81می دیوان ءَ گشتانک دیان ءَ کت ایشی ءِ بنگپ ’’اعتماد ءِ پدا جوڑ کنگ، بدلی ءِ انتظامی: یک اقوام متحدہ کہ درست آنی واستہ کار کنت‘‘ بوتگ۔ 193باسکی جھان ءِ گل ءَ گوں وتی چارمی گشتانک ءَ مزن وزیر شہباز شریف ءَ جھان ءُ دمگی تک ءَ دیم ءَ اتکگیں مزنیں چیلنج آنی ھوالگ ءَ پاکستان ءِ موقف ءُ لیکہ پیش کت۔ آئی ءَ وتی گشتانک ءِ تہ ءَ میاں اوستمانی تک ءِ جاور ھال ، انسانی ھک آنی لگتمالی ، فلسطین ءُ بھارت ءِ ناجائزیں رنگ ءَ قبضہ کتگیں جموں ءُ کشمیر ءِ تہ ءَ برجاھیں انسانی بحران ، بھارت ءِ نیمگ ءَ سندھ ءِ آپانی معاہدے ءِ یک نیمگی معاہدے ءِ مھتل کنگ ، اوگانستان ءَ چہ درکپوکیں ناشرکاری ءِ گیش بوھوکیں ھترہ ءِ سر ءَ چمشانک دات ءُ اقتصادی ردوم ءِ ردوم ، موسمیاتی بدلی ءِ اثرات ، ملکاں ، ءُ جہانی تناؤ ءُ مذاکرات ءِ تہا زوتیں کمی ءِ ضلورت ءِ سرا چمشانک داتگ۔ مزن وزیر شہباز شریف ءَ گوشت کہ منی واستہ چارمی رند ءَ 240لکھ دلیر، مھکم ءُ امن دوستیں پاکستانی اُلس ءِ نیمگ ءَ اے محترمیں ایوان ءَ گشتانک دیگ منی واستہ شرپ ءِ گپ اِنت۔ شہباز شریف ءَ انوگیں جھان ءُ دمگی جاور ھال آنی سر ءَ دلگوش گور کنان ءَ گوشت کہ ما یک ھترناکیں وھد ءِ تہ ءَ زندگ ایں بلے مئے آیوکیں باندات یقینی ءِ رد ءَ پیسر ءَ چہ ٹھینگ نہ بوتگ پمیشکا جنگ یک گچین کاری یے، البت امن باز شرتریں گچین کاری اِنت ءُ برے برے مزنیں بہادری جنگ ءِ بندات کنگ ءَ نہ اِنت بلکیں جنگ ءِ بند کنگ ءَ اِنت۔ پاکستان ءَ وتی گچین کتگ۔ پاکستان ءَ دیم پہ دیم ءِ بدل ءَ گپ ءُ تران ءِ گچین کتگ۔ ما زوراکی ءِ بدل ءَ تعاون ءِ گچین کتگ۔ ما جنگ ءَ چہ امن ءَ گچین کتگ۔ اے 81می جنرل اسمبلی ءِ دیوان ہمے گچین ءَ پہ مئے واستہ، مئے زھگانی واستہ ءُ آیوکیں نسلانی واستہ بہ کنت۔ بیا اِت کہ ما اعتماد ءِ بحالی ءَ بہ کنیں، امن ءَ را پچ بہ کنیں ءُ اے گپ ءَ ثابت بہ کنیں کہ یک بہر ءُ بانگ بوتگیں دنیا ءِ تہا ہم انسانیت انگت یکجاہ بوت کنت۔ مزن وزیر ءَ گوشت کہ امن ءِ پجاری انسانی کوشست آنی مستریں ءُ مقدس تریں مول ءُ مراد آنی تہ ءَ یک انت۔ قرآن مجید ءِ تہا گشگ بوتگ کہ اگاں آ امن ءِ نیمگ ءَ جھل بہ بنت گڑا آھانی نیمگ ءَ جھل بہ بئے۔ (سورہ انفل، آیت 61)۔ آئی ءَ گوشت کہ پاکستان ءِ بانی قائداعظم محمد علی جناح ءَ ھم گوشتگ ات کہ ما اقوام متحدہ ءِ منشور ءِ سر ءَ اوشتاتگ آں ءُ دگنیا ءِ امن ءُ ایمنی ءِ واستہ وتی سرجمیں کرد ءَ پیلو کنگ ءَ وش ءُ وشحال بئیں۔ مزن وزیر ءَ گوشت کہ اے زانت ءِ   پاکستان ءِ راجی پجار ءِ بھر بوتگ اَنت ءُ ملک ءَ درملک ءَ مئے رھبند ءِ رھشونی کتگ۔ مزن وزیر شہباز شریف ءَ گوشت کہ یک سالے پیسر پاکستان ءِ سر ءَ بھارت ءِ نیمگ ءَ بے جاہیں درائیں زوراکی ءِ دیمپانی بوتگ۔ پاکستان ءَ اقوام متحدہ ءِ منشور ءِ آرٹیکل 51 ءِ رد ءَ وتی دفاع ءِ بنیاتی حق کارمرز کتگ۔ مئے دلیر ءُ مزن جگریں سلاہ بندیں اُرداں چیف آف آرمی اسٹاف ءُ چیف آف ڈیفنس فورسز فیلڈ مارشل سید عاصم منیر ءِ دلیریں سروکی ءَ گوں پیشہ وارانہ ترین رنگ ءُ درستیں حکمت عملی ءَ پسو دات۔ دژمن ءِ اُرشاں چہ دیم ءَ کش اِت ءُ آئی ءَ را چشیں سبقے دات۔ آئی ءَ گوشت کہ بے شک امریکی صدر ڈونلڈ ٹرمپ ءِ جزم ءُ دور اندیشیں سروکی ءِ برکت ءَ جنوبی ایشیا ءَ لاکھوں مردم آنی جان رکینتگ۔ آئی ءِ بروقت مداخلت ہما وہد ءَ بوتگ کہ دو ایٹمی سلاہ بندیں ہمساہگ یک سرجمیں جنگ ءِ کش ءَ اتنت۔ اگاں صدر ٹرمپ ءَ اے نازرکیں موڑ ءَ گوں ھاسیں ھیال ءُ لیکہ ءَ مداخلت نہ کتگ ات گڑا کئے زانت کہ چے پیمیں تباہی یے بوت کنت؟ پمیشکا مارا اے گپ ءَ را دل یکیمی کنگی اِنت کہ جنوبی ایشیا پدا کدی اے خطرناکیں جاہ ءَ سر مہ بیت بلے ایشی ءِ ھاتر ءَ جموں ءُ کشمیر ءِ جیڈھ ءِ شفاف ءُ انصاف ءِ گیواری المی اِنت۔ ہشت دہائیاں چہ کشمیری راج اقوام متحدہ ءِ نگرانی ءَ آزات ءُ بے رھبندیں رائے شماری ءِ وتی وعدہ ءِ سرجمی ءِ ودار ءَ اِنت۔ کشمیری نسلاں ناجائزیں قبضہ، وتی مرضی ءُ غیر عدالت ءِ بندیگ کنگ، کشگ، زوراکی ءَ بیگواہ کنگ، جنسی زوراکی ءُ اجتماعی سزا ءِ آماچ بوتگ انت۔ گوستگیں وھداں ڈیموگرافک ری انجینئرنگ ءُ دگہ ناجائزیں گامگیج آنی وسیلگ ءَ جموں ءُ کشمیر ءِ قانونی جاوراں بدل کنگ ءِ کوشست بوتگ بے وسیں کشمیری مات ءُ پت وتی زھگ ءُ جنک آنی ودار ءَ اَنت کہ آ ھچبر پدا نہ کاینت، آیانی لوگ کرفیو ءُ غم ءِ ھاموشی ءَ ڈوب اِتگ اَنت  ،  بے نامیں قبرانی شوہاز ءَ انت۔ مزن وزیر ءَ گوشت کہ سرجمیں ذمہ واری ءُ اتھارٹی ءِ گوما اے ایوان ءَ چہ وتی کشمیری برات ءُ گہار آناں دل یکیمی کنت کہ ما آھاں وتی سرجمیں سفارتی، سیاسی ءُ اخلاقی کمک ءَ را برجاہ داراں داں آ وت واجئی ءِ وتی ناگزیریں ھک ءَ بہ رس اَنت۔ آئی ءَ گوشت کہ کشمیر پاکستان ءِ جُگولر رگ انت ءُ دائم ءَ ھمے رنگ ءَ مان ایت۔ مزن وزیر ءَ گوشت کہ جنوبی ایشیا ءَ استحکام ءِ یک دگہ بنیات ءَ نوں دباؤ ءِ تہ ءَ اِنت، سندھ واٹرز ءِ مشترکہ آپی نظام نہ ایوک ءَ پاکستان ءِ الس بلکینگ ءَ سرجمیں خطہ ءِ الس ءِ زندمان ءِ بنیاتی عنصر اِنت، بھارت ءِ نیمگ ءَ استیں معاہدہ ءِ یک نیمگی مھتل کنگ ءِ پیسلہ ھچ رنگ ءَ نہ اِنت۔ قانونی بنیاد ءِ کمی اِنت۔ درحقیقت ایشی ءِ دعویٰ ءُ کارروائی اقوام متحدہ ءِ ماہرین ءُ انوگیں وھد ءَ ثالثی ءِ آمید گس ءَ رد کتگ انت کہ آئی ءَ مئے جائزیں موقف ثابت کتگ کہ اے معاہدہ موثر، پابند ءُ سرجمی ءَ نفاذ ءِ لائک انت۔ شہباز شریف ءَ گشتگ کہ آپ ءَ را کدی سلاہ بند کنگ مہ بیت، دریا راجاں رھشونی بہ کن انت، آھاں بہر ءُ بانگ مہ کن انت، پمیشکا پاکستان ءِ بھر ءَ چہ آپ ءِ روانی ءَ را بند کنگ، رکاوٹ یا دیم ءَ کشگ ءِ ھرچ وڑیں کوشست جنگی کارروائی زانگ بیت، بھارت اے گپ ءَ رد مہ کنت۔ مزن وزیر ءَ گوشت کہ پاکستان ءِ سروکی ءَ اقوام متحدہ ءِ سلامتی کونسل ءِ نیمگ ءَ جیڈھ آناں ایمنی ءِ گیواری ءِ میکانزم ءَ را مھکم کنگ ءِ ھوالگ ءَ یکوئی ءَ گوں منظوری جھان ءِ امن ءِ واستہ مئے بے دروریں جزم ءِ گواہی اِنت۔ آئی ءَ گوشت کہ بدقسمتی ءَ اے سال ءِ فروری ءَ خلیج ءِ کش ءُ گوری میاں اوستمانی دمگ ءِ تہ ءَ جیڈھ ءِ آماچ بوتگ کہ ایشی ءِ آسر ءَ گران بھائیں انسانی جان ءِ تاوان بوتگ، معیشت آناں تاوان بوتگ ءُ جھان ءِ بیپار ءِ ھاسیں دریائی لین آنی سر ءَ ھاسیں رنگ ءَ آبنائے ہرمز ءِ سر ءَ سکیں زور ءُ دباؤ بوتگ۔ آئی ءَ گوشت کہ اے نازرکیں ساھت ءَ پاکستان ءَ زوت عملی گامگیج زورگ ءِ پیسلہ کتگ۔ یکجائی ءُ برجمیں کوشست آنی وسیلگ ءَ پاکستان واشنگٹن ءُ تہران ءَ را اسلام آباد ءَ میز ءِ سر ءَ آرگ ءَ سوبمند بوتگ۔ اسلام آباد ءِ گپ ءُ تران ءَ بگر داں اسلام آباد ءِ مفاہمت نامہ ءَ اے سنگینیں جیڑھ ءِ ھلاسی ءِ ھاترا بازیں راجدپتری گامگیج چست کنگ بوتگ انت۔ آئی ءَ گوشت کہ من پاکستان ءِ چیف آف ڈیفنس فورسز ءُ چیف آف آرمی اسٹاف فیلڈ مارشل سید عاصم منیر ءِ کوشست آناں سک باز ستا کناں، آئی ءِ بے مٹیں کوشست آنی سبب ءَ سکیں گرانیں جاور آنی تہ ءَ سفارتکاری ءِ واستہ جاگہ ​​جوڑ کنگ ءَ کمک رستگ۔ نائب مزن وزیر ءُ دری کارانی وزیر اسحاق ڈار ءِ کوشست آناں ھم ساڑا آں ۔ مزن وزیر ءَ گوشت کہ اے گپ ءِ گشگ اپسوز ءِ گپ اِنت کہ گوستگیں روچ آنی تہ ءَ ما یک رندے پدا کش ءُ چیل ءِ تہ ءَ ھترناکیں گیشی ءِ گندگ ءَ اتکگیں بلے میزائل، ڈرون ءُ توپ آنی گریوگ ءِ تہ ءَ سفارتکاری ءِ توار گیش مزن کنگ بہ بیت۔ شہباز شریف ءَ گشتگ کہ آبنائے ہرمز ءُ باب المندب جہانی معیشت ءِ شریان انت، آ راجاں یکے دومی ءَ گوں ہمگرنچ کنگ ءِ ھاتر ءَ پچ بہ بنت، ءُ ہما جاہ جوڑ مہ بنت کہ تنازعہ ءِ راہاں بند بہ کن انت۔ اے دریائی راہ جنگ ءِ ھترہ نہ بلکیں وشھالی ءِ وعدہ جوڑ بہ بنت۔ آئی ءَ گوشت کہ ما یک رندے پدا سعودی عرب ءِ بادشاھی ءِ سر ءَ حوثی آنی نیمگ ءَ گوستگیں ملامت کنوکیں اُرش آناں گوں مھکمیں گالوار ءَ مذمت کن ایں ۔ مکہ ءِ مقدسیں شہر ءِ سر ءَ ڈرون ءِ اُرش ءِ کوشست ءَ سرجمیں دگنیا ءِ مسلمان سک رنج ءُ گم ءِ آماچ کتگ اَنت۔ دو مسجد الحرام ءِ امن ءُ مقدسیت ءِ ھاترا ھرچ وڑیں ھترہ یے یک لال لیکہ یے کہ ھچبر چہ آئی ءَ گوزگ مہ بیت۔ ہچ مسلمان چوشیں زھرناکیں جرم ءِ ھیال ءَ ھم نہ کنت۔ آئی ءَ گوشت کہ پاکستان سعودی عرب ءِ براتیں الس ءِ گوما سرجمیں رنگ ءَ یکوئی ءِ درشان ءَ کنت، چوش کہ مئے سرجمیں راجدپتر ءَ مدام بوتگ۔ مئے امن ءِ واستہ دیریں وھد ءِ جزم پاکستان ءِ براتیں ملک سعودی عرب ءُ ترکی ءِ نیام ءَ راجدپتری مکہ ءِ یکجائی دفاعی معاہدے ءِ تہ ءَ ھم گندگ بیت۔ اے اتحاد ہچ ملک ءِ ھلاپ نہ انت۔ اے مئے اجتماعی جزم ءِ درشان اِنت کہ دمگ ءِ دفاع، استحکام ءُ امن ءِ ھاترا اِنت ءُ چہ ایشی ءَ گیش ھچ نہ اِنت۔ مزن وزیر ءَ فلسطین ءِ ھوالگ ءَ گوشت کہ نسل ءِ پد ءَ نسل ءَ فلسطین ءِ راج ھاسیں رنگ ءَ زالبول، زھگ ءُ پیریں مردم قبضہ، آوار جنگ، رنج ءُ گم ءُ مرگ ءِ آماچ بوتگ انت۔ گوستگیں سال ءَ چہ ھمے پلیٹ فارم ءَ من شمئے دیم ءَ ھند رجب ءِ دل کشیں کسہ پیش داشتگ اَت کہ یک بے گناھیں فلسطینی جنکے کہ اسرائیلی سپاھیگاں بے دردی ءَ تیرگواری کتگ اَت۔ اے سال ءَ دگہ یک سانحہ یے مئے دل ءِ سرا، تئی ءُ دنیا ءِ سرا سک باز وزن کنت۔ ہشت سالی وفا عقیلا ءِ غم ءِ آماچیں مات ءِ گریوگ انت کہ شہید بوتگ انت کہ مئے دلاں چہ ٹُکّر ٹُکّر کن انت۔ اے بے رحمیں تجاوزات ءِ تہا ہما روچ کہ آئی ءَ وانگجاہ ءَ روگی ات، آئی ءِ زند ءِ گڈی روچ بوت۔ آیا غزہ ءَ ودی بوتگیں چُک ءَ زند ، آیوکیں وھد ءُ وابانی ھما ھک نیست کہ دگنیا ءِ دگہ دمگاں ودی بوتگیں چُک ءَ ھست؟ ہند رجب، وفا عقیلا ءُ دگہ بے حسابیں مردمانی سانحہ مئے اجتماعی بے تواری، ناکامی ءُ بے عملی ءِ فرد جرم ءِ دروشم ءَ راجدپتر ءِ تہا گونجگ ءَ انت۔ مزن وزیر ءَ گوشت کہ اے سک باز جیڈھ ءِ گپ اِنت کہ اسرائیل ءِ زوراکی نوں مغربی کنارہ ءَ سر بوتگ، اودا فلسطینی آنی زوراکی ءَ چہ آوار جنگ اسرائیل ءِ ایجنڈا ءِ ھاسیں رنگ ءَ پدر اِنت کہ پاکستان ایشی ءَ را نسل کشی ءِ رنگ ءَ پیش کنت ءُ اے ایجنڈا بے رکّی ءَ برجاہ اِنت۔ آئی ءَ گوشت کہ پاکستان ءِ موقف ایش اِنت کہ ایوکیں انصاف ءُ برجمیں گیواری 1967ءَ پیسر ءِ سیم سر آنی سر ءَ بنیات ءَ بیت المقدس ءِ دارالحکومت ءِ رنگ ءَ یک آجوئیں، وت واجہ، زندگ ءُ جغرافیائی رد ءَ نزیکیں فلسطین ریاست ءِ جوڑ کنگ اِنت۔ آئی ءَ گوشت کہ ما لبنان ءُ شام ءِ سر ءَ اسرائیل ءِ زوراکی ءِ ھم مذمت کن ایں کہ ایشی ءَ را ھم زوت بند کنگ لوٹ ایت۔ ناشرکاری ءِ ھوالگ ءَ مزن وزیر ءَ گوشت کہ ناشرکاری انگت ءَ میاں اوستمانی امن ءُ ایمنی ءِ واستہ سنگینیں ھوپ آنی تہ ءَ یک انت۔ ما ناشرکاری ءِ ھلاپ ءَ یک دیم ءِ ملکے ءِ بستار ءَ وتی شھراں، وتی کوہاں ءُ وتی سیمسراں ناشرکاراں گوں جنگ کتگ۔ پاکستان ءَ نزیک ءَ یک سد ہزار گران بھائیں جان قربان کتگ ءُ 150ارب ڈالر ءَ چہ گیش ءِ معاشی تاوان رستگ۔ آئی ءَ گوشت کہ مرچی دگنیا ایمن تر اِنت ءُ من مزنیں نزوری ءَ گوں گوشاں کہ مئے بہادریں سلاہ بندیں اُرد ءُ بہادریں شہری آں اے ناشرکار ءُ بدکاراں گوں جنگ کتگ ءُ بے دروریں قربانی داتگ۔ امن دوستیں دنیا ءَ اے گپ ھچبر شموشگ مہ بیت۔ مزن وزیر ءَ گوشت کہ اوگانستان ءِ سرزمین تحریک طالبان پاکستان ءِ گس برجاہ اِنت، طنتال خوارج ءُ بی ایل اے فتن الل ہندوستان ءِ چیر دستی ءَ انت۔ اے درملکی کمک ءِ گل اوگانستان ءِ تہ ءَ چہ امنیں پناہ گاہاں کار کن اَنت ءُ پاکستان ءِ بے رھبند کنگ ءِ مول ءُ مراد ءَ کار کن اَنت۔ اے جاور ھال ءَ را زوت ءُ سرجمیں رنگ ءَ ھلاس کنگ بہ بیت۔ آئی ءَ گوشت کہ اوگان واکدار آناں وتی میاں اوستمانی ذمہ واری آناں پیلو کنگی اِنت ءُ تصدیق ءُ فیصلہ کنوکیں گامگیج چست کنگ لوٹ ایت تانکہ اوگان سرزمین پدا کدی پاکستان یا دگہ ملک ءِ ھلاپ ءَ کارمرد کنگ مہ بیت۔ افغان راج ءِ بنیاتی حق ءُ ھاسیں رنگ ءَ زالبول ءُ جنک ءِ حق ہر وھد ءَ احترام کنگ بہ بنت۔ مزن وزیر ءَ گوشت کہ اقوام متحدہ ءِ امن فورس اجتماعی ایمنی ءِ مھکمیں درشان آنی تہ ءَ یک اِنت۔ دہائیاں پاکستانی مرد ءُ زالبولاں نیلیں پرچم ءِ چیر ءَ کار کتگ ءُ شہری آنی رکھینگ ءُ ملک آناں تنازعات ءَ چہ درآہگ ءُ امن ءِ نیمگ ءَ روگ ءَ کمک کتگ۔ مارا آہانی انمولیں قربانیانی سرا فخر انت۔ شہباز شریف ءَ گوشت کہ اسلاموفوبیا ءِ تہ ءَ ھرابیں گیشی سک پریشان کنوک اِنت پرچا کہ مسلمان نفرت انگیزیں گپ، تبعیض، مسیت ءُ قرآن ءِ سر ءَ اُرش ءِ نشانگ جوڑ کنگ بوھگ ءَ اَنت۔ کریم بے حرمتی ءِ دیمپان اِنت۔ آئی ءَ گوشت کہ مئے سیم سر ءِ دومی نیمگ ءَ آر ایس ایس ءِ گوں ھمگرنچیں ھندوتوا نظریہ مذھبی نفرت ءَ را گیش کنگ ءَ اِنت کہ ایشی ءِ آسر ءَ آشوب، فرقہ وارانہ آشوب، عبادت جاھانی سر ءَ اُرش ءُ مذھبی آجوئی آنی سر ءَ بندش جنگ بوھگ ءَ اِنت۔ اے ماہ ءِ بندات ءَ ہندوستان ءِ شھر سہاران پور ءَ 150 سالی مسیت ءِ ھراب کنگ ھمے گپ ءِ مثال اِنت۔ دینی نفرت ءِ اے دنیا ءَ مطلقا جاہ ءُ مقام مہ بیت۔ مزن وزیر ءَ راجی معیشت ءِ ھوالگ ءَ گوشت کہ پاکستان ءِ معاشی زندگ بوھگ منی حکومت ءِ بنجاہی ذمہ واری اِنت ءُ منی دل ءَ گوں سک نزیکیں مشن اِنت۔ مشکل ءُ دیریں چہ رند ءِ ڈھانچہ ءِ اصلاحات ءُ مالیاتی نظم ءُ ضبط ءِ وسیلگ ءَ ما اقتصادی استحکام ءَ را بحال کتگ ءُ پائیدار ءُ شمولیت ءِ دیمروئی ءِ نیمگ ءَ سفر بندات کتگ۔ ما کشت ءُ کشاری ءُ صنعت ءَ را نوک کنگ ءَ ایں، معدنی وسیلگ آناں دیمروئی دیگ ءَ ایں، معیشت ءَ را ڈیجیٹل کنگ ءَ ایں ءُ وتی ورنا آناں نوکیں مصنوعی ذہانت ءُ آئی ٹی ءِ مہارتاں گوں لیس کنگ ءَ ایں ۔ ما چین ءُ پاکستان ءِ اقتصادی راہداری ءِ سر ءَ چین ءِ گوما کار کنگ ءَ ایں ، وھدے کہ خلیج ، میان اُستمانی ایشیا ءُ دگہ دمگاں گوں نوکیں راہ پچ کنگ ءَ ایں ۔ مزن وزیر شہباز شریف ءَ چین ءِ صدر شی جن پنگ ءِ وژنری سروکی ءَ را گلوبل ڈویلپمنٹ انیشیٹیو، گلوبل سیکورٹی انیشیٹیو، گلوبل سیویلائزیشن انیشیٹیو ءُ گلوبل گورننس انیشیٹیو ءِ سروکی ءِ ھاتر ءَ شگر ءُ منت گپت۔ ھمے ستونانی بنیاد ءَ ما پہ انسانیت ءَ یک مشترکہ باندات ءِ جوڑ کنگ ءَ بے شک بوت کنیں۔ آئی ءَ گوشت کہ دیمروئی کنوکیں ملک آناں وھد ءِ سر ءَ وام ءِ ریلیف، جوانیں دراجیں مدت ءِ مالی کمک ءُ میاں اوستمانی مالیاتی ادارگ آنی تہ ءَ مھکمیں توار ءِ سک باز ضلورت اِنت۔ امنیت ءِ وڑا دیمروئی ءِ سرا ہم زوتیں دلگوش دیگ بہ بیت۔ مزن وزیر ءَ گوشت کہ اے طنز ءِ گپ نہ اِنت کہ پاکستان ءِ جھان ءِ کشگ ءِ تہ ءَ یک درسد ءَ چہ کم بھر ءُ بانگ بیت بلے پدا ھم موسمی بدلی ءِ تباہ کنوکیں آسر آنی بار بار دیم ءَ کپگ ءَ اِنت؟ دیمروئی کتگیں ملکاں وتی موسمیاتی مالیاتی وعدہ آناں گیشیں دیر کنگ ءَ ابید پیلو کنگی اِنت، تاوان ءُ تباہی ءِ زوتیں رنگ ءَ گیش ءُ گیوار کنگ ءِ واستہ مالی کمک دیگی اِنت ءُ وتی ردوم ءُ تابکاری ءِ واستہ المی کمک ءَ را دل یکیمی کنگی اِنت۔ مزن وزیر ءَ گوشت کہ اے گند ءُ نند ءِ بنگپ ءِ تہ ءَ مارا دل یکیمی ءَ را بحال کنگ ءِ لوٹ کنگ بوتگ، بلے ایوک ءَ گال ءَ گوں دل یکیمی ءَ را بحال کنگ نہ بیت۔ اعتماد عمل ءُ رویہ ءِ وسیلہ ءَ کمائینگ لوٹیت۔ اعتماد ہما وہد ءَ بحال بیت کہ دریا تنازعہ ءِ فالٹ لائن نہ بلکیں تعاون ءِ زند ءِ لیکہ جوڑ بہ بنت۔ اعتماد بحال بیت کہ موسمیاتی بحران ءَ را ایندھن داتگیں مردم ہما مردمانی رکھینگ ءَ کن انت کہ آ ایشی ءِ تباہ کنوکیں آسراں چہ گیشتر متاثر بنت۔ ءُ چہ درستاں گیشتر ، اعتماد ہما وہد ءَ بحال بیت کہ بندوق بے توار بنت ءُ دست ءِ کشگ ، گلے ءُ مسکرا ءِ بدل ءَ بوت کن انت۔ مزن وزیر ءَ گوشت کہ ’’اقوام متحدہ ءِ 80 ءِ گامگیج‘‘ ءَ چہ اقوام متحدہ ءَ را گیش مھکم، یکجا ءُ کارآمد جوڑ کنگ بہ بیت، سلامتی کونسل گیش نمائندگی، جمہوری ءُ احتساب کنگ بہ بیت، اصلاحات باسکیں ملک آنی مزنیں کساس ءِ مفاد ءُ واھشت آنی رد ءَ پیش دارگ بہ بنت، نہ کہ یک گچینیں کمیں مردم آنی مفاد  ۔ مزن وزیر ءَ خلیل الرحمن ءَ را جنرل اسمبلی ءِ 81می دیوان ءِ صدر گچین بوھگ ءِ پد ءَ مبارکی دات ءُ گوشت کہ پاکستان آئی ءَ را وتی سرجمیں کمک ءِ دل یکیمی کنت۔ آئی ءَ 80می دیوان ءِ موثریں سروکی ءِ ھاتر ءَ انالینا بیئربوک ءِ ھم منت گپت ءُ اقوام متحدہ ءِ سیکرٹری جنرل انتونیو گوتریس ءَ را آئی ءِ متحرک سروکی ءُ اقوام متحدہ ءُ جھان ءِ جنوب ءِ ھاتر ءَ یک مھکمیں توار ءِ بوھگ ءِ ھاتر ءَ دل ءِ جہلانکی ءَ چہ خراج تحسین پیش کت۔