اقوام متحدہ ءِ جنرل اسمبلی ءَ مزن وزیر ءِ گشتانک ءَ پاکستان ءَ امن، سفارتکاری ءُ جیڈھ آناں ایمنی ءِ گیواری ءِ سر ءَ زور پر دات

نیویارک- 25ستمبر (اے پی پی): مزن وزیر محمد شہباز شریف ءَ گوشت کہ پاکستان دمگ ءُ دگنیا ءَ امن، مھکم ءُ وشھالی ءِ واستہ گپ ءُ تران ءُ سفارتکاری ءِ سر ءَ ایمان دار ایت، آپ ءَ را سلاہ جوڑ کنگ مہ بیت، پاکستان وتی آپ ءِ بھر ءِ راہ ءَ بند کنگ یا راہ ءِ کشگ ءِ ھرچ وڑیں کوشست ءَ را جنگ ءِ کارروائی لیک ایت۔ اقوام متحدہ ءِ جنرل اسمبلی ءِ 81می دیوان ءَ گوں تران کنان ءَ مزن وزیر ءَ گوشت کہ امن ءِ پجارینگ انسانی کوشست آنی مستریں مول ءُ مراد آنی تہ ءَ ھوار اِنت، قائداعظم محمد علی جناح ءِ نیمگ ءَ اقوام متحدہ ءِ منشور ءِ حمایت ءَ پاکستان ءِ راجی پجار ءُ دری پالیشی ءِ رھبند ءِ ٹھینگ بوتگ۔ میاں اوستمانی تک ءِ جاور ھال آنی بابت ءَ مزن وزیر ءَ گوشت کہ جنگ آنی آسر ءَ گران بھائیں جانی تاوان بیت ءُ معیشت مشکلات ءِ آماچ انت وھدیکہ ھاسیں دریائی راہ آنی سر ءَ ھم دباؤ است انت۔ آئی ءَ گوشت کہ استیں جاور ھال آنی تہ ءَ پاکستان ءَ ترند ءُ سرگرمیں کرد پیلو کتگ ءُ اسلام آباد ءِ گپ ءُ تران ءِ وسیلگ ءَ واشنگٹن ءُ تہران ءَ را میز ءِ سر ءَ آرگ ءِ تہ ءَ کرد پیلو کتگ ایشی ءِ آسر ءَ جون ءَ اسلام آباد ءِ مفاہمت نامہ ءِ سر ءَ دستخط کنگ بوتگ۔ مزن وزیر ءَ چیف آف ڈیفنس فورسز ءُ چیف آف آرمی اسٹاف فیلڈ مارشل سید عاصم منیر ءِ سفارتی کوشست آناں ساڑات ءُ گوشت کہ آئی ءِ برجاھیں کوشست آں چہ سک باز گرانیں جاور آنی تہ ءَ سفارتکاری ءِ واستہ گنجائش جوڑ کنگ ءَ کمک رستگ۔ آئی ءَ نائب مزن وزیر ءُ دری کارانی وزیر سینیٹر محمد اسحاق ڈار ءِ کرد ءَ را ھم ساڑات۔ میزائل، ڈرون ءُ توپکانی کشاں چیل آنی  نیام ءَ سفارتکاری ءِ توار گیش مھکم ءُ مھکم بہ بیت۔ مزن وزیر ءَ گوشت کہ آبنائے ہرمز ءُ باب المندب جھان ءِ معیشت ءِ ھاسیں شریان اَنت، آ جیڈھ ءِ راہ جوڑ بوھگ ءِ بدل ءَ ملک آناں یکجا کنوکیں راہ ءِ رنگ ءَ پچ بہ بنت۔ آئی ءَ سعودی عرب ءِ سر ءَ حوثی آنی نیمگ ءَ گوستگیں اُرش آناں سک مذمت کتگ ءُ سعودی عرب ءِ گوما پاکستان ءِ سرجمیں یکوئی ءِ درشان کتگ۔ مزن وزیر ءَ فلسطین ءِ جیڈھ ءِ ھوالگ ءَ پاکستان ءِ موقف ءِ یک رندے پدا گوشتگ ءُ فلسطینی الس ءِ وت واجئی ءِ ھک ءُ یک آجوئیں ریاست ءِ جوڑ کنگ ءِ حمایت ءِ درشان کتگ۔ مقبوضہ جموں ءُ کشمیر ءِ حوالہ ءَ آئی ءَ میاں اوستمانی براتی ءَ را زور پر دات کہ آ دیریں قبضہ ءِ جیڈھ ءَ را گیواری ءُ کشمیری الس ءَ را وت واجئی ءِ حق ءَ چہ زبھر کنگ ءِ واستہ جوانیں کرد پیلو بہ کنت۔ مزن وزیر ءَ اسلاموفوبیا ءِ گیش بوھوکیں رجحان ءِ سر ءَ ھم دلپدردی ءِ درشان کت ءُ ایشی ءِ گیواری ءِ واستہ جھان ءِ تک ءَ جوانیں گامگیج آنی ضلورت ءِ سر ءَ زور پر دات۔ آئی ءَ ناشرکاری ءِ ھلاپ ءَ جنگ ءَ پاکستان ءِ قربانی ءُ جھان ءِ امن ءُ ایمنی ءِ واستہ پاکستان ءِ کرد ءِ سر ءَ چمشانک دات ءُ اوگانستان ءِ سرزمین ءَ چہ پاکستان ءِ ھلاپ ءَ ناشرکاری ءِ گیش بوھوکیں ھترہ ءِ سر ءَ ھم جیڈھ ءِ درشان کت۔ مزن وزیر ءَ گوشت کہ پاکستان ءَ را اقوام متحدہ ءِ منشور، کثیر نیمگی نظام ءُ جھان ءِ امن ءِ دیمروئی ءِ واستہ اقوام متحدہ ءِ مرکزی کرد ءِ سر ءَ دل یکیمی یقین اِنت۔ آئی ءَ موسمیاتی مٹ ءُ بدلی، پائیدار دیمروئی ءُ جھان ءِ اقتصادی جیڈھ آنی سر ءَ کلیدی جھان ءِ چیلنج آنی ھوالگ ءَ پاکستان ءِ موقف ھم پیش کت ءُ دیمروئی کنوکیں ملک آنی چیلنج آنی گیواری ءِ واستہ جھان ءِ کمک ءِ ضلورت ءِ سر ءَ زور پر دات۔ مزن وزیر ءَ گوشت کہ پاکستان پڑ ءَ امن، برجائی ءُ اقتصادی دیمروئی ءِ واستہ وتی جوانیں ءُ جوڑیشت ءِ کرد ءَ را برجاہ دار ایت ءُ جیڈھ آنی گیواری ءِ واستہ گپ ءُ تران، سفارتکاری ءُ ایمنی ءِ وسیلگ آناں اولی رنگ ءَ دنت۔