بلوچستان اٹ پسماندگی نا چٹفنگ و الس نا حق آتا دوئی کننگ کن جمہوری کسر ساڑیءِ ، میر ضیاء لانگو

کوئٹہ۔ 18 ستمبر (اے پی پی)بلوچستان نا صوبائی وزیر داخلہ میر ضیاء اللہ لانگو پارینے کہ بلوچستان اٹ پسماندگی نا چٹفنگ و الس نا حق آتا دوئی کننگ کن جمہوری کسر ساڑیءِ ، توفک ہرفسا ملک انا برخلاف جنگ کننگ نا ہچ ءُ جواز اس اف، دہشت گردی صوبہ نا شونداری و امن ءِ زہمی کننگ ءِ، غٹ مکتبہ فکر آتا بندغ آتے اوار ی اٹ پاکستان نا مثبت دروشم ءِ تالان کننگ و ملک انا برخلاف جوڑ کروک آ بیانیہ نا مقابلہ کننگ اٹ تینا کڑد ءِ ادا کروئی مریک۔ دا خیال آتا درشانی ءِ او پاکستان پاورٹی ایلیویشن فنڈ انا کنڈآن بلوچستان سینٹر آف ایکسیلنس آن کاؤنٹرنگ وائلنٹ ایکسٹریمزم نا کمک اٹ سول سوسائٹی نا تنظیمآتون اڈ ہلوک آ بڑزکو کہولی سیشن آن تران کرسا کرے۔ سیشن اٹ صوبائی وزیر داخلہ میر ضیاء اللہ لانگو، سیکرٹریراجی آسودہی عصمت اللہ قریش، سیکرٹری ویمن ڈویلپمنٹ ڈیپارٹمنٹ شیر شاہ غلزئی، پاکستان پاورٹی ایلیویشن فنڈ انا چیف ایگزیکٹو آفیسر نادر گل بڑیچ، وزارت داخلہ نا کمکار بابر خان یوسف زئی، وائس چانسلر جامعہ بلوچستان ڈاکٹر ظہور احمد بازئی، وائس چانسلر بیوٹمز پروفیسر ڈاکٹر خالد حفیظ، عورت فاؤنڈیشن نا ریجنل ڈائریکٹر علاؤالدین خلجی و ایلوفکبشخ ہلکر۔ صوبائی وزیر داخلہ پارے کہ پرامن چاگڑداٹ ہی تینامخلوق کن کاریم کننگ مریک،بدبختی اٹ بلوچستان اٹ دہشت گردی نا ریسہ برجاءِ ۔ اونا رداٹ دہشت گردی نا پد اٹ اٹ بھارت ءِ و اوغانستان نا ڈغار ءِ کاریم اٹ اتنگ انگ ءِ، ہرانا مسخت پاکستان و بلوچستان نا امن و ایمنی ءِ خراب کرسا سی پیککون آڈٹ آتے ٹیاڑاند شاغنگ و بلوچستان نا شونداری ءِ توننگ ءِ ۔ او پارے کہ پاکستان ءِ سافٹ ٹارگٹ تکسا پاکستان و چین نا مفاد آتے نسخان تننگ نا کوشست کننگ انگ ءِ، دا وڑنا حالیت آتیٹی ملک انا مثبت دروشم ءِ تالان کننگ کن غٹ مکتبہ فکر آن تعلق تخوک آ بندغ آتے تینا کڑد ءِ ادا کروئی مریک ۔ میر ضیاء اللہ لانگو پارے کہ پسماندگی بیرہ بلوچستان نا ویل اف بلکن سندھ و پنجاب نا چندی علاقہ غاتیٹی ہم پسماندگی ساڑیءِ ، ولے تینا حق آتے کن جمہوری کسر ساڑیءِ ۔ دا نا مطلب دا اف کہ کس اس توفک ہرفسا تینا ملک انا برخلاف جنگ کے۔ او پارے کہ بلوچستان کرار کرار آشونداری کننگ ءِ، اسہ دہائی مست چندی علاقہ غاک ویل آتا گواچی ئسر ولے داسہ دہشت گرد آک اووسیلہ و تنصیبات آتے شست جوڑ کننگ ءُ۔ دہشت گرد آک تیناناپاک مسخت آتے دوئی کننگ کن کودک بندغ آتے خلنگ ءُ۔ صوبائی وزیر داخلہ دعویٰ کرے کہ ہزارہ کمیونٹی نا اِرا بندغ آتے برمتہ کرسا اوفتیان 70 لکھ روپئیہلنگا ۔ او پارے کہ دا آجوئی نا جنگ اف بلکن دُشمن نا ایجنڈا آ عملدرآمد ءِ ۔ دہشت گرد زموار آک بلوچستان نا وسیلہ و تنصیبات آتے شست جوڑ کننگ ءُ۔ او پارے کہ اگہ ویل پسماندگی نا مسکہ تواسکول، ہسپتال و سڑک آتا جوڑ کننگ نا بابت بیانیہ مون آ بسکہ ، ولے گڑاس زموار ملک ءِ پرغنگ نا ہیتءِ کننگ ءُ۔ دشمن نا پیسہ غاتا کمک اٹ پاکستان ءِ پرغنگ نا کوشست کننگ انگ ءِ ہرافتے ہچ ءُ وڑ اٹ موکل تننگپک۔ میر ضیاء اللہ لانگو پارے کہ غیر سرکاری تنظیم آک الس نا ویل آتا ایسر و شونداری کن گچین کاریم کننگ ءُ۔ پاکستان نا برخلاف جوڑ کروک آ بیانیہ و سازش ءِ ننے غٹ ءِ اواری اٹ بے سہب کروئی ءِ۔