نائب وزیراعظم و وزیر خارجہ اسحاق ڈار تون ترک سفیر نا اوڑدہی

اسلام آباد۔ 18 ستمبر (اے پی پی)نائب وزیراعظم و وزیر خارجہ محمد اسحاق ڈار ترکیہ تون رابطہ و کمکاری ءِ پین ودفنگ نا پاکستان نا عزم انا درشانی ءِ کرینے۔ جمعہ نادے آ دفتر خارجہ غان جاری بیان نا رداٹ نائب وزیراعظم و وزیر خارجہ سینیٹر محمد اسحاق ڈار تون ترکی نا سفیر عرفان نذیراوغلو اوڑدہیکرے۔ ترکیہ نا سفیر نائب وزیراعظم و وزیر خارجہ ءِ پاکستان و ترکی نا نیام اٹ ساڑی آ بڑزکو کہول انا رابطہ غاتیان پد جتا بشخ آتیٹی کمکاری ءِ مون آ دننگ کن جوڑ ہڑتوم آ کنڈآتاادارہ جاتیوڑوڈول نا رداٹ مروک آ پیش رفت آن معلومدار کرے۔ نائب وزیراعظم و وزیر خارجہ اولیتی بشخ آتیٹی ترکی تون رابطہ و کمکاری ءِ پینگہراکننگ کن پاکستان نا عزم انا درشانی ءِ کرے۔ او ہڑتوم آکنڈآتا ایجنڈا ءِ مون آ دننگ کن تعلقدار ادارہ غاتے ہڑتوم آ ملک آتا نیام اٹ بروک آ اسیجائی کمیشن و بڑزکو کہولی سٹریٹجک کمکاری کونسل نا ہشت می دیوان نا تیاری تے کن خڑکی رابطہ کاری ءِ پک کننگ نا گرج آ زور شاغا۔ او ڈیہہ انا بدلینگوک آ حالیت آتیا ہم گپ و تران کریر۔ نائب وزیراعظم و وزیر خارجہ دا ہیت آ زور شاغا کہ ویل آتا ایسری و ڈیہہ اٹی دیرپا امن، سوگوی و شونہالی نا دوئی کننگ کن گپ و تران و سفارت کاری ہیاسٹ انگا عمل نا قابل کسر ءِ۔