بلوچستان نا وزیراعلیٰ نا سلاہکار گوازینا کماشی ٹی دیوان، بروک آ گوازی تا بھلا ایونٹ آتا تیاری و گراؤنڈ آتا جوڑکننگ نا جاچ ءِ ہلک

کوئٹہ۔ 08 ستمبر (اے پی پی)بلوچستان نا وزیراعلیٰ نا سلاہکار گوازی و امور نوجوانان مینا مجید بلوچ نا کماشی ٹی اہم ءُ دیوان اس اڈ ہلک، ہراٹی بروک آ گوازی تا ایونٹ آتا تیاری و گوازی نا میدان آتا جوڑ کننگ نا جاچ ءِ ہلنگا۔ دیوان اٹی صوبائی سیکرٹری گوازی و امور نوجوانان دُرا بلوچ، ڈائریکٹر جنرل گوازی ڈاکٹر یاسر خان بازئی، ڈائریکٹریوتھ افیئرز سجاد اسلم و ایڈیشنل سیکرٹری سپورٹس امجد حسینئسک بشخ ہلکر۔ محکمہ گوازی بلوچستان نا ترجمان نا رداٹ دیوان اٹی انٹرا پروونشل چیلنج کپ، ششم آل پاکستان وزیراعلیٰ بلوچستان فٹبال گولڈ کپ، یوتھ گیمز و ویمن لیڈرشپ گرلز کانفرنس تون اوار ایلو بروک آ گوازی تا ایونٹ آتا بندوبست آتیا گپ و تران مس۔ دیوان اٹی کرکٹ اکیڈمی، کیو ڈی اے فٹسال گراؤنڈ، اسپنی روڈ فٹسال گراؤنڈ و شاہوانی فٹبال گراؤنڈ تون اوار جتا جتا گراؤنڈ آتا جوڑ کننگ ، گوازی نا آسراتی و ایونٹ آتے کن گراؤنڈ آتا تیاری نا جاچ ہم ہلکر، دیوان اٹی انٹرا پروونشل چیلنج کپ نا بابت سرجم گپ و تران مس۔ ٹورنامنٹ نا بناء  8 ستمبر آن کوئٹہ ٹی مریک، ہراٹی بلوچستان نا 16 ضلع غاتا ٹیمک بشخ ہلیرہ ۔ ٹورنامنٹ اٹی انڈر 19 و انڈر 23 نا ورنا گوازی گرآک بشخ ہلیرہ ، وخت اس کہ ٹورنامنٹ نا فائنل 14 ستمبر آ ایوب کرکٹ اسٹیڈیم اٹی مریک ۔