پاکستان و جاپان نا نیام اٹ نوکاپ آن رکھ انا ڈٹ اکن گرانٹ معاہدہ غا دستخط

اسلام آباد۔ 07 ستمبر (اے پی پی)پاکستان و جاپان نا نیام اٹ نوکاپ آن رکھ انا ڈٹ اکن گرانٹ معاہدہ غا دستخط مس۔ وزارت اقتصادی امور نا کنڈآن دوشنبے نادے آداڑے جاری بیان نا رداٹ جاپان سندھ اٹ نوکاپ آن رکھ انا ڈٹ اکن 2.58 ارب جاپانیین (16.4 ملین امریکی ڈالر) نا گرانٹ فراوان کیک۔ ڈٹ انا مسخت سندھ اٹی نوکاپ آن بچفنگ نا بنداوی پنجر ءِ سوگو کننگ ءِ، ڈٹ آن نوکاپ نا خطرہ غاتا گواچی آبادی تا قدرتی آفت آتون مون تننگ نا لائخی ٹی ودکی مریک۔ ڈٹ انا رداٹ لاڑکانہ ٹی دریائے سندھ انا راستی کنڈ آ واقع اولڈ آباد بند ءِ گچین و سوگو کننگک، وزارت اقتصادی امور نا رداٹ ایکسچینج آف نوٹس و ریکارڈ آف ڈسکشن آ سیکرٹری اقتصادی امور محمد حمیر کریم و پاکستان اٹ جاپان نا سفیر اکاماتسو شوئچی دستخط کریر، گرانٹ معاہدہ غا ایڈیشنل سیکرٹری اقتصادی امور سبینہ قریشی و جاپانی شونداری ادارہ جائیکا نا سینئر نمائندہ سوگاوارا تاکایوکی دستخط کریر۔ سیکرٹری اقتصادی امور دا وخت آ پارے کہ جاپان پاکستان نا متکن و قابلِ قدر شونداری شریدار ءِ و جاپان نا پدریسہ سنگتی و فراخدلانہ شونداریکمکاری قدر اناقابل ءِ۔ او پارے کہ پاکستان نا راجی و اقتصادی شونداری کن جاپان نا پائیدار عزم انا ستاءِ کینہ۔ پاکستان اٹ جاپان نا سفیر دا وخت آ پارے کہ پاکستان تون سنگتی تعلقداری و ہڑتوم آ کنڈ آتا کمکاری ءِ پین سوگو کینہ۔