زرئی کار ءِ وفاقی وزیر ءِ گشگ انت کہ برآمد کنوک ءُ درآمد کنوکاں یک مشترکہ دریائی آسان سروس سنٹر ءِ جوڑ کنگ بیت

اسلام آباد۔5ستمبر  (اے پی پی): وفاقی وزیر برائے میری ٹائم محمد جنئید انور چوہدری ءَ یکجائی میری ٹائم ایزی سروس سینٹر ءِ جوڑ کنگ ءِ تجویز داتگ تانکہ یک چھت ءِ چیر ءَ برآمد کنوک ءُ درآمد کنوک آناں بندرگاہ ءِ ھوالگ ءَ درستیں سروسز پجارینگ بہ بنت۔ آئی ءَ اے تجویز بندرگاہاں ھوالگ ءَ جتاجتائیں منصوبگ آنی دیمروئی ءِ چار ءُ تپاسی ءِ واستہ برجم داشتگیں دیوان ءِ سروکی ءَ کنان ءَ کت۔ شمبے ءِ روچ ءَ وزارت ءِ میری ٹائم امور ءِ نیمگ ءَ جاڑی بوتگیں بیان ءِ رد ءَ وفاقی وزیر ءَ اے موہ ءِ سر ءَ گوشت کہ یک جاھ ءَ پیش کرتگیں مرکز ءَ سیادی داروکیں ادارگ آنی نمائندگ ھوار بنت، ایشی ءِ تہ ءَ کاروباری مردم بندرگاہ آنی ھوالگ ءَ جتا جتائیں کارگس آناں تر ءُ تاب کنگ ءِ ضلورت ءَ ابید جتا جتائیں آسراتی آنی رسگ ءِ موہ رس ایت۔ آئی ءَ گوشت کہ ھر یک سیادی داروکیں ادارگ کاروباری مردم آنی کمک ءِ واستہ یک فوکل پرسن ءِ گچین کنت، وھدیکہ درخواست ءُ کیس آناں کارروائی کنگ بیت ءُ آوانی پیشرفت ءِ سر ءَ ھم مرکزی کارگس آنی گوما سیادی داروکیں یکجاھیں نظام ءِ وسیلگ ءَ چار ءُ بچار کنگ بیت۔ محمد جند انور چوہدری ءِ رد ءَ اے گامگیج ءَ چہ ٹرکنگ، کنٹینر، اسٹوریج، ڈیمریج، جہاز ءِ تاخیر ءُ انتظامی جیڈھ آنی ھوالگ ءَ ھرچ ءُ درچ کم کنگ بوت کنت، ایشی ءَ چہ کاروباری مردم، درآمد کنوک ءُ برآمد کنوک ءُ بندرگاہ ءِ سروسز ءَ کارمرد کنوکیں کاروباری مردم آناں فائدگ رسیت۔ آئی ءَ گوشت کہ کارروائی آناں معیاری کنگ ءَ چہ ٹیکس ءِ جم کنگ ءَ را گہتر کنگ ءُ مالیاتی بے رھبندی آناں کم کنگ ءَ ھم کمک رسیت، وھدیکہ تجارت ءِ کساس ءَ را گیش کنگ ءَ چہ بندرگاہ ءِ سروسز، کارگو ہینڈلنگ، کسٹم ءَ گوں سیادی داروکیں کار ءُ رسد ءِ وسیلگ ءَ گیشیں آمدنی پیداک کنگ بوت کنت۔ وفاقی وزیر ءَ گوشت کہ مجوزہ سروس سینٹر ءِ مول ءُ مراد میری ٹائم سیکٹر ءَ گوں سیادی داروکیں ادارگ آنی نیام ءَ ھمگرنچی ءَ را گہتر کنگ، طریقہ کار ءِ رکاوٹ آناں دور کنگ ءُ میاں اوستمانی تجارت ءَ گوں بندوکیں کاروباری مردم آناں بندرگاہ ءِ سروسز ءِ رسائی ءَ را آسراتی دیگ اِنت۔ آئی ءَ سرکاری محکمہ ءُ میری ٹائم سیکٹر ءِ سٹیک ہولڈر آنی دیوان ءِ لوٹ کتگ تانکہ مرکز ءِ ڈھانچہ ءُ کارروائی ءِ بابت ءَ سوج ءُ پنت ءِ گرگ بہ بیت۔ دیوان ءَ محکمہ ماہی گیری ءُ کورنگی فش ہاربر ءِ حکام ءَ ابید بینک، شپنگ لائنز، کلیئرنگ ءُ فارورڈنگ ایجنٹ، ماہی گیری انجمن ءُ پرائیویٹ سیکٹر ءِ ایندگر نمائندگ بہر زور اَنت۔ وفاقی وزیر ءَ گوشت کہ توامیں سیادی داروکیں اسٹیک ہولڈر آنی گوما شور ءُ سلاھ کنگ بیت ءُ آھانی سفارش آناں پیش کرتگیں منصوبگ ءِ تہ ھوار کنگ بیت تانکہ آسن خدمت مرکاز برآمد کنوک ءُ درآمد کنوک آنی عملی لوٹ آناں پیلو بہ کنت۔