معذور بندغ آتا راجی آسودہی بیرہ حکومت نا زمواری اف بلکن پورو راج انا اسیجائی زمواری ءِ، ڈی جی میر سیف اللہ کھیتران

کوئٹہ۔ 04 ستمبر (اے پی پی)ڈائریکٹر جنرل سوشل ویلفیئر بلوچستان سیف اللہ کھیتران پارینے کہ صوبائی حکومت معذور بندغ آتا بحالی،خودانحصاری ،واکداری و اوفتے راج انا فعال و عزتدار بشخ اس جوڑ کننگ کن عملی گام گیج کننگ ءِ، دا چرجوئی ٹی محکمہ سوشل ویلفیئر بلوچستان نا کنڈآن حقدارمعذور بندغ آتے ہن و بر ناآسانیفراوان کننگ کن سکوٹیز (مخصوص موٹر سائیکل) و ٹرائی سائیکل آتا فراوانی نا چرجوئی برجاء ءِ، دا خیال آتا درشانی او معذور بندغ آتے ٹرائی موٹر سائیکل تننگ نا دود آن تران کرسا کرے۔ او پارے کہ صوبائی وزیر و پارلیمانی سیکرٹری سوشل ویلفیئر حاجی ولی محمد نورزئی نا خاص کلہو و راہشونی ٹی محکمہ سوشل ویلفیئر معذور بندغ آتا راجی آسودہی و اوفتے راج اٹ بریبر وارخواہی تننگ کن جتا جتا عملی گام گیجکننگ ءِ۔ ڈائریکٹر جنرل سوشل ویلفیئر سیف اللہ کھیتران پارے کہ سکوٹی و ٹرائی سائیکل نا فراوانی نا مسخت معذور بندغ آتے ہن و بر اٹی آسانی تننگ، اوفتا پت اٹی ودکی و اوفتے خودانحصاری نا کنڈآ دننگ ءِ تانکہ او تینا ہڑدے ئی زند انا کاریمتے زیات آسانی اٹ سرتننگ کیر۔ او پارے کہ محکمہ سوشل ویلفیئر بلوچستان دا ہیت ءِ پک کننگ کن کوشست کننگ ءِ کہ راج انا حقدار و خاص بندغ آتے اوفتا حق ءِ بے پرخ تننگے و اوفتے عزتدار، باوقار و وتواجہ زند اس گدریفنگ کن ہر وڑ انا کمک تننگے۔ سیف اللہ کھیتران پارے کہ معذور بندغ آتا راجی آسودہی بیرہ حکومت نا زمواری اف بلکن پورو راج انا اسیجائی زمواری ءِ، انتئے کہ راج انا غٹ تپہ غاتا فرض ءِ کہ او خصوصی بندغ آتا بحالی، تعلیم، روزگار و خودانحصاری کن تینا کڑد ءِ ادا کیر۔ او دا عزم انا درشانی ءِ کرے کہ محکمہ سوشل ویلفیئر بلوچستان آخبت اٹ ہم معذور بندغ آتا گرج آتے مون آ تخسا آسودہی گام گیج آتا چرجوئی ءِ برجاء تخک تانکہ اوفتے راج انا واکدار ، متحرک و فعال بشخ اس جوڑ کننگ مرے۔