بلوچستان اٹ کانود نافذ کروک آادارہ غاک اِرا سال اٹی 133 ارب روپئی نا منشیات ضبط کریر، وزیر اعلیٰ بلوچستان

کوئٹہ۔ 04 ستمبر (اے پی پی)وزیر اعلیٰ بلوچستان میر سرفراز بگٹی پارینے کہ صوبائی حکومت منشیات نا برخلاف جنگ اٹی زیرو ٹالرنس پالیسی آ عمل کننگ اٹی ءِ، ورنا چین ءِ منشیات نا ناسور آن رکھ کننگ حکومت نا اولیت ءِ و دا مسخت کن غٹ دوئی وسیلہ غاتے کاریم اٹ اتنگ انگ ءِ۔ راجی رابطہ نا ویب سائٹ ایکس آ تینا بیان اٹی وزیر اعلیٰ بلوچستان پارے کہ تدوک آ اِراسال اٹی بلوچستان اٹ کانود نافذ کروک آادارہ غاتا گچین کارروائیتیٹی 133 ارب روپئی آن زیات نا منشیات ضبط و تلف کننگانے، ہرا منشیات نا برخلاف حکومت نا پکاعزم و کانود نافذ کروک آادارہ غاتا گچین کارکڑد نا درشانی ءِ۔ میر سرفراز بگٹی پارے کہ منشیات نا برخلاف کارروائیتیٹی 1,638 کلوگرام آئس (کرسٹل) و 620 کلوگرام چرس دوئی کرسا تلف کننگانے، وخت اس کہ بلوچستان اٹ تدوک آ اِراسال اٹی 27 ہزار آن زیات درملکی شراب و بیئر نا بوتل و کین ہم ضبط کرسا تلف کننگا۔ وزیر اعلیٰ پارے کہ منشیات نا برخلاف برجاکارروائیبیرہ کانود نافذ کننگ نا سرگرمی اف بلکن صوبہ نا ورنا چین و بروک آ نسل آتا آخبت نا رکھ اکن اسہ جامع کوشست اسے ۔ حکومت بلوچستان ورناتے منشیات نا لعنت آن رکھ تخنگ کن انسدادِ منشیات نا گام گیج آتے پینگچین جوڑ کننگ تون اوار اوار اونا راجی اثرات آتون مون تننگ کن ہم گام گیج آتے برجاتخک۔ او پارے کہ منشیات نا چٹفنگ کن کانود نافذ کروک آادارہ غاتا کارروائی تے پینگچین و مربوط جوڑ کننگک و منشیات نا فراوانی ،بہاو کاریم اٹ اتنگ نا برخلاف بے پرخ کارروائی ءِ پک کننگک۔ میر سرفراز بگٹی پارے کہ منشیات آن پاک بلوچستان حکومت نا اولیت آتیٹی اوار ءِ۔ ورنا تا آخبت ءِ رکھ جوڑ کننگ کن ہر ممکن گام گیجآتے برجاتخنگک و منشیات نا کاروبار اٹی اوار زموارآتا برخلاف کانود نا رداٹ کارروائی کننگک۔ وزیر اعلیٰ پارے کہ حکومت بلوچستان اسہ رکھ، جان جوڑ و منشیات آن پاک راج اس جوڑ کننگ کن سنبرینگوک ءِ، ہراڑے ورناک تیناتوانائی تے تعلیم،کسب ، گوازی و مثبت سرجزآتیٹی کاریم اٹ اتنگ کیر۔