بنجائی وزیر داخلہ نا کماشی ٹی ایف آئی اے زونل آفس لاہور اٹ دیوان، انسانی سمگلنگ، حوالہ ہنڈی، و کسبی ڈوہدار گینگ آتا برخلاف کارروائی تا جاچ ءِ ہلنگا

لاہور۔ 27 اگست (اے پی پی)بنجائی وزیر داخلہ محسن نقوی ایف آئی اے زونل آفس لاہور نا دورہ ءِ کرے و خصوصی دیوان  نا کماشی ءِ کرے، دیوان اٹ ایف آئی اے زونل آفس نا اپ گریڈیشن پراجیکٹ، انسانی سمگلنگ، حوالہ ہنڈی و کسبی ڈوہدارگینگ آتا برخلاف کارروائی و ایلو امور تا جاچ ءِ ہلنگا۔ ایف آئی اے نا ترجمان نا رداٹ وزیر داخلہ محسن نقوی ایف آئی اے زونل آفس نا اپ گریڈیشن پراجیکٹ آ پیش رفت نا جاچ ءِ ہلسا ڈٹ ءِ زوت پورو کننگ نا پارت کرے۔ او انسانی سمگلنگ و حوالہ ہنڈی ٹیاوار مافیا نا برخلاف گچین کارروائی نا پرمان جاری کرسا پارے کہ انسانی سمگلنگ و حوالہ ہنڈی نا مافیا نا مچ آ چین ءِ کانود نا گرفت اٹ اتنگے۔ محسن نقوی پارے کہ کسبی ڈوہدار گینگ آتا برخلاف پبی کریک ڈاؤن ایف آئی اے نا زمواری ءِ، دا بابت عملی نتیجہ بایدے نظر برے ۔ ایف آئی اے نا آفیسر و عملہ ءِ ہر ممکن آسانی و وسیلہفراوان کننگ اُن و پین ہم کینہ ۔ دیوان اٹ مچ آ ملک انا ایئرپورٹآتیا امیگریشن کاؤنٹر تیا لگوک آ متکن آکیمرہ غاتے بدل کننگ نا فیصلہ کننگا، وخت اس کہ پوسکن انگا ٹیکنالوجی نا کیمرہ غاتا خلنگ نا اصولی منظوریءِ ہم تننگا۔ غاو نوشتہ کننگ کن پاک آئی ڈی ایپ نا خذمت آتے ہلنگ نا ہم اصولی فیصلہءِ کننگا۔ ڈائریکٹر ایف آئی اے زونل آفس لاہور دیوان ءِ اپ گریڈیشن پراجیکٹ آ پیش رفت و کارکڑد نا بابت حوال تس۔ حوال اٹ پاننگا کہ تدوک آ اسہ سال اٹ 1670 ایف آئی آر نوشتہ کننگا، وخت اس کہ 5 ہزار انکوائری تیان 4 ہزار انکوائری تے سرتننگا۔ دا وخت اٹ 295 اشتہاریدوبہ دارآتے دزگیر کننگا۔ دیوان اٹ ڈی جی ایف آئی اے، ڈائریکٹر ایف آئی اے زونل آفس لاہور و غٹ سرکل انچارج آک بشخ ہلکر۔