ھوا ءِ آلودگی ءِ گر ءُ دار ءِ واستہ راجی پڑ ءَ یکجائی ءُ ھمگرنچیں کوشست المی اَنت، ڈاکٹر مصدق ملک

اسلام آباد۔18اگست  (اے پی پی): موسمیاتی بدلی ءُ چاگردی یکوئی ءِ وفاقی وزیر ڈاکٹر مصدق ملک ءَ گوشت کہ ہوا ءِ آلودگی انسانی جان سلامتی ءِ واستہ مزنیں چیلنج اِنت، ایشی ءِ کنٹرول ءِ واستہ راجی تک ءَ یکجائی ءُ یکجاھیں کوشست المی اِنت۔ حکومت ملک ءَ الیکٹرک گاڑی آناں دیمروئی دیگ ءِ واستہ گامگیج زورگ ءَ اِنت کہ ایشی ءَ چہ ھوا ءِ آلودگی ءَ را کم کنگ ءَ ھاسیں کرد پیلو بوت کنت۔ آئی ءَ اے کوشست آنی درشان سئے شمبے ءِ روچ ءَ پاکستان راجی ساپیں ھوائی پالیشی ءِ نفاذ منصوبگ ءِ ھوالگ ءَ یک روچی مزن تک ءِ مراگش ءَ ھاسیں مہمان ءِ بستار ءَ گشتانک ءِ ساھت ءَ کت۔ اے مراگش ءِ برجم دارگ ءِ وزارت ءِ موسمی بدلی ءُ چاگردی یکوئی، پاکستان ءِ چاگردی رکھینگ ءِ ادارگ اسلام آباد ءُ میاں اوستمانی دیمروئی بینک ءِ کمک ءَ کنگ بوتگ۔ مراگش ءَ گوں تران کنان ءَ وفاقی وزیر ءَ گوشت کہ ساپیں ھوا ھر شہری ءِ المییں ھک اِنت، وھدیکہ ھوا ءِ کوالٹی ءَ را گہتر کنگ ءِ واستہ موثر نگرانی، ضوابط آنی سر ءَ سکیں عملی کنگ ءُ درستیں سیادی داروکیں شوبگ آنی تہ ءَ اصلاحات المی اِنت۔ آئی ءَ گوشت کہ ساپیں ھوا ءِ ھاترا صنعت، ٹرانسپورٹ ءُ توان ءِ شوبگ ءَ جوانیں اصلاحات کنگ لوٹ ایت۔ آئی ءَ گوشت کہ ھوا ءِ آلودگی ءَ را کم کنگ ءِ واستہ نوکیں ٹیکنالوجی ءِ کارمردی ءُ ساپیں توان ءِ دیمروئی ھم وھد ءِ ضلورت انت۔ ڈاکٹر مصدق ملک ءَ گوشت کہ حکومت ملک ءَ الیکٹرک گاڑی آناں دیمروئی دیگ ءِ واستہ گامگیج کنگ ءَ انت، ایش ھوا ءِ آلودگی ءَ را کم کنگ ءَ ھاسیں کرد پیلو کت کنت۔ وفاقی وزیر ءَ گوشت کہ چاگردی رکھینگ ایوک ءَ حکومت ءِ ذمہ واری نہ انت بلکینگ ءَ چاگرد ءِ توامیں تک ءُ پھنات آناں اے رد ءَ وتی کرد پیلو کنگی انت۔ ساپیں ھوا ءُ جوانیں چاگرد ءِ ھاتر ءَ الس ءِ سرپدی ءِ گیش کنگ ھم مئے یکجاھیں ذمہ واری اِنت۔ آیوکیں نسل آنی واستہ ساپ ءُ سلہ، ایمن ءُ جان سلامتی ءِ چاگرد جوڑ کنگ ءِ واستہ ھمک رنگ ءِ گامگیج کنگ ءِ جزم ءِ درشان کت۔ دیم ءَ برگ بیت۔ ڈاکٹر مصادق ملک ءَ گوشت کہ چاگردی پالیشی ءِ مستریں مکسد ایوک ءَ پالیسی جوڑ کنگ نہ انت بلکیں ایشی ءِ عملی سیت آناں الس ءَ سر کنگ انت، چاگردی رکھینگ ءِ مکسد انسانی جان ءِ رکھینگ انت۔ وفاقی وزیر ءَ گوشت کہ چاگردی رکھینگ ءِ ھوالگ ءَ کتگیں گامگیج، استیں پالیشی ءُ ایشی ءِ سر ءَ عمل درآمد ءِ تہ ءَ دیم ءَ اتکگیں جیڈھ آناں زانتکار گیش زانتگ انت۔ ڈاکٹر مصدق ملک ءَ گوشت کہ استیں پالیشی ءِ وھد ءَ اتکگیں بدلی ءُ جیڈھ آنی پجارینگ ءِ ھمراھی ءَ ایوک ءَ ماہرین وتی ممکنہ گیواری ءِ گیواری ءَ را شرتر پیش کت کن اَنت۔ پالیسی ءِ تہا المی بدلی آرگ ءُ استیں پالیسی ءِ فریم ورک ءَ را گیش جوانیں رنگ ءَ کارمرز کنگ ءِ ضلورت انت۔ آئی ءَ گوشت کہ چاگرد ءِ رکھینگ کجام ھم ادارگ یا حکومت ءِ زمہ واری نہ انت بلکینگ ءَ چاگرد ءِ درستیں تک ءُ پھنات آنی یکجائی زمہ واری انت۔ NGO ءُ ماحولیاتی شعبہ ءِ گوں ہمگرنچیں بازیں مردماں وتی زند ماحولیات، آب و ہوا، ساپیں ہوا، ءُ قدرتی وسیلگ ءِ رکھینگ ءِ ہاترا ندر کتگ۔ وفاقی وزیر ءَ گوشت کہ دیریں انسانی کار آنی آسر ءَ پیداک بوتگیں آلودگی ءُ چاگردی جیڈھ آنی گیواری مئے درست آنی ذمہ واری اِنت۔ ہوا ءِ آلودگی انسانی جان سلامتی ءَ را مستقیم ءَ تاوان دیگ ءَ اِنت ءُ ایشی ءِ آسر ءَ دل ءُ پُپ ءِ نادراہی ءَ ھوار بازیں جان سلامتی ءِ جیڑھ پیداک بوھگ ءَ اَنت۔ یک ذاتی واقعہ ءِ حوالہ ءَ ڈاکٹر مصدق ملک ءَ گشتگ کہ لہتیں وھد پیسر آ ہسپتال ءَ یک مردمے ءِ ہمراہی ءَ حاضر بوتگ کہ آ بے ہوش بوتگ ءُ زند ءِ گڈی تبک ءَ بوتگ۔ اے موہ ءِ سر ءَ آئی ءِ دل ءَ یک واھگے ودی بوت کہ آئی ءَ را بس یک روچے گیش گوں اے مردم ءَ گوازینگ ءِ موہ رس ایت دانکہ آ ھرچی کہ زند ءِ تہ ءَ ھست ات آ آئی ءَ بہ گشیت۔ پد ءَ وھدے آئی ءَ یک رپورٹے ونت کہ ھوا ءِ آلودگی ءَ چہ مردم ءِ زند بازیں سالاں کم بوت کنت گڑا آئی ءَ ھمے مردم یات اتک کہ آ وھد ءَ نادراھجاہ ءَ ماسک ءِ وسیلہ ءَ ساہ کشگ ءَ ات ءُ زند ءُ مرگ ءِ ھاترا جھد کنگ ءَ ات۔ وفاقی وزیر ءَ گوشت کہ اے وڑیں مردم ایوک ءَ یک مٹّے نہ اَنت بلکیں مئے شھر ءُ سرجمیں ملک ءَ ھزاراں مردم ھوا ءِ آلودگی ءُ چاگردی جیڈھ آنی آماچ اَنت۔ ہاں، زھگ، ورنا، پیر ءُ چاگرد ءِ ھر یک مردمے چہ یک آلودہیں چاگردے ءَ متاثر بوت کنت۔ آئی ءَ گوشت کہ اگاں ما چاگرد ءَ را شر کن ایں گڈا ما نا ایوک ءَ چاگرد ءِ رکّینگ ءَ بئیں بلکینگ ءَ انسانی جان ءَ را ایمن جوڑ کنگ ءَ ایں ۔ اے بُنکی گپ مئے چاگردی پالیسی، ترجیحات ءُ عملی گامگیجانی مرکز بہ بیت۔ ڈاکٹر مصدق ملک ءَ وتی جزم ءِ درشان کت کہ چاگردی جیڈھ آں گوں گر ءُ چیل بوھگ ءِ واستہ پالیسی جوڑ کنگ، ایشی ءِ جوانیں رنگ ءَ عمل کنگ، ماہرین ءِ گوما شور ءُ سلاہ ءُ عملی گامگیج آنی سر ءَ حاصیں دلگوش دیگ بہ بیت تانکہ ساپ ءُ سلہیں چاگرد جوڑ کنگ بہ بیت۔