حکومت فاٹا ءُ پاٹا ءِ مہلوک ءِ ھاسیں جیڑہ ءُ لوٹاں سرجمی ءَ سرپد انت، آہانی وشحالی اولی ترجی انت، بلال اظہر کیانی

اسلام آباد۔18اگست  (اے پی پی):وزیر مملکت ءِ ھزانگ بلال اظہر کیانی ءَ گوشت کہ حکومت فاٹا ءُ پاٹا ءِ الس ءِ ھاسیں جیڈھ ءُ لوٹ آنی سر ءَ سرجمی ءَ سرپد اِنت ءُ آھانی وشھالی اولی ترجی اِنت۔ حکومت ناشرکاری ءِ ھلاپ ءَ جنگ ءَ قبائلی مردم ءُ سیکورٹی فورسز ءِ قربانی ءِ ھم ستا ءَ کنت۔ سئے شمبے ءِ روچ ءَ سینیٹ ءِ دیوان ءِ ساھت ءَ سینیٹر عطا الرحمٰن  ءِ کال ٹو اٹینشن نوٹس ءِ سر ءَ وتی ھیال درشان کنان ءَ آئی ءَ گوشت کہ پیسریگیں فاٹا ءُ پاٹا ءِ دمگ آنی تہ ءَ ٹیکس ءِ ھوالگ ءَ پیسلہ گوستگیں سال ءَ یک دراجیں سیاسی شور ءُ سلاھ ءَ پد کنگ بوتگ ایشی ءِ مول ءُ مراد ٹیکس ءِ ناجائز کارمردی ءِ تہ ءَ پری بیلنس برجائی اِنت۔ آئی ءَ گوشت کہ گوستگیں سال ءَ 10 100درسد ایکسائز ٹیکس ءِ ایر کنگ ءِ پیسلہ گوستگیں سال ءَ کنگ بوتگ، وھدیکہ اے سال ءَ 12درسد ءَ سر کنگ بوتگ، ایشی ءِ باوجود اے شرح ملک ءِ دگہ دمگ آنی تہ ءَ ایر کنگ بوتگیں 18درسد ایکسائز ٹیکس ءَ چہ کمتر اِنت ءُ ترجیحی شرح اِنت۔ آئی ءَ گوشت کہ اے پیسلہ ءَ چہ پیسر فاٹا، پاٹا ءُ خیبر پختونخوا ءِ نمائندہ، ھمگرنچیں چاگردی رھشون ءُ ایف بی آر ءِ کارندہ آنی نیام ءَ سرجمیں شور ءُ سلاہ کنگ بوتگ۔ اے عمل ءِ بندات رانا ثنا اللہ ءَ ہما وہد ءَ کتگ ات، ہمے وھد ءَ ایگزیکٹو برانچ ءُ ہمگرنچیں کارندہاں ہم مشاورت ءِ تہا بہر زرتگ ات۔ بلال اظہر کتنی ءَ گوشت کہ فاٹا ءِ واستہ ٹیکس ءِ رعایت ءِ مول ءُ مراد دمگ ءِ ھاسیں محرومی ءُ مشکلات آناں ھیال ءَ دارگ ءَ اودا مردم ءُ کاروباری ادارگ آناں آسراتی دیگ بوتگ، بلے اے رعایت ءِ ناجائز کارمرد کنگ ءِ شکایت ھم دیم ءَ آیگ ءَ اَنت۔ آئی ءَ گوشت کہ جتا جتائیں کاروباری نمائندگ ءُ چیمبرلین آنی نیمگ ءَ چہ ھم شکایت اتکگ کہ فاٹا ءُ پاٹا ءِ نام ءَ ٹیکس ءِ رعایت ءَ را ناجائز کارمرد کنگ بوھگ ءَ انت ءُ اے رعایت ءِ تہ ءَ کاروبار ءُ مردم ھم ھوار کنگ بوتگ انت کہ آ اے دمگاں گوں سیادی نہ دار انت۔ آئی ءَ گوشت کہ حکومت فاٹا ءُ پاٹا ءِ الس آنی ھاسیں جیڈھ ءُ لوٹ آنی سر ءَ سرجمی ءَ سرپد اِنت ءُ آھانی گھبود اولی ترجی اِنت۔ حکومت ناشرکاری ءِ ھلاپ ءَ جنگ ءَ قبائلی مردم ءُ سیکورٹی فورسز ءِ قربانی ءِ ھم ستا ءَ کنت۔ آئی ءَ گوشت کہ حکومت اے سال ءَ ھم ٹیکس ءُ اے دگہ معاملہ آنی سر ءَ سیاسی شور ءُ سلاھ ءِ عمل ءَ را برجاہ دار ایت ءُ فاٹا ءُ پاٹا ءِ نمائندہ آناں دلجمی ءَ زوریت ءُ یک پیسلہ ءِ سر ءَ سر بیت۔ فاٹا ءُ پاٹا ءِ ٹیکس ءِ جیڈھ آنی سر ءَ تران کنان ءَ سینیٹر رانا ثناء اللہ ءَ گوشت کہ اے جیڈھ ءِ سر ءَ جتاجتائیں کاروباری شوبگ ءُ ھمگرنچیں نمائندہ آں گوں شور ءُ سلاھ ھم کنگ بوتگ۔ کاروباری برادری ءَ ٹیکس ءِ انوگیں نظام ءِ بابت ءَ  ھیال ءُ لیکہ  ءِ درشانی کتگ۔ ٹیکس ءِ رعایت ءُ دگہ آسراتی ءَ را جتا جتائیں دور ءُ باریگ ءَ گیش کنگ بوتگ بلے نوں اے نظام ءِ سرا جوانیں ءُ شفافیں رنگ ءَ چار ءُ تپاسی کنگ ءِ ضلورت انت۔ آئی ءَ گوشت کہ فاٹا ءُ پاٹا ءِ واستہ ٹیکس ءِ شرح 10درسد ءَ چہ بندات کنگ بوتگ ءُ اے پیسلہ کنگ بوتگ کہ اے شرح ءَ ھمک سال 2درسد گیش کنگ بیت۔ استراسا رانا ثنا اللہ ءَ گشتگ کہ کاروباری براتی ءِ تحفظات ءُ فاٹا ءُ پاٹا ءِ دمگ آنی ھاسیں لوٹ آناں ھیال ءَ دارگ المی انت دانکہ ٹیکس ءِ نظام گہتر بہ بیت ءُ اقتصادی کاروائی آناں تاوان مہ رسیت۔