ہیپاٹائٹس سی ءِ اسکریننگ ءِ عمل ءَ را گیش کنگ بوتگ، ھمک  پاکستانی ءَ اے کار ءَ کنگی اِنت، مصطفیٰ کمال

اسلام آباد۔18اگست  (اے پی پی): وفاقی وزیر جان سلامتی مصطفیٰ کمال ءَ گوشت کہ سرجمیں ملک ءَ ہیپاٹائٹس سی ءِ اسکریننگ ءِ عمل ءَ را گیش کنگ بوھگ ءَ اِنت، ہر پاکستانی ءَ وتی اسکریننگ کنگ لوٹ ایت، ءُ وزارت جان سلامتی ءِ درستیں کارندہ آنی واستہ ہیپاٹائٹس سی ءِ ٹیسٹ المی کنگ بیت۔ آئی ءَ اے ھیالانی درشانی سئے شمبے ءِ روچ ءَ میڈیا بریفنگ ءِ ساھت ءَ کت اَنت۔ مصطفیٰ کمال ءَ وت ھیپاٹائٹس سی ءِ ٹیسٹ کتگ کہ آئی ءِ آسر منفی بوتگ۔ آئی ءَ گوشت کہ وزارت جان سلامتی ءِ درستیں کارندہ آنی واستہ اسکریننگ المی بیت، ءُ ھما کارمند آنی سر ءَ کارروائی کنگ بیت کہ آ رھبند آنی رد ءَ ٹیسٹ نہ کن اَنت۔ مصطفیٰ کمال ءَ گوشت کہ اسلام آباد ءَ ہیپاٹائٹس سی ءِ اسکریننگ ءِ واستہ 17 پوائنٹ جوڑ کنگ بوتگ انت، پرائیویٹ ہسپتال آناں اسکریننگ کٹس ءُ المی ئیں سامان پجاری کنگ بنت تانکہ اودا ھم شہری اسکریننگ کنگ بہ بنت۔ وفاقی وزیر ءَ گوشت کہ ہیپاٹائٹس سی ءِ اسکریننگ ءِ دائرہ کار سرجمیں پاکستان ءَ سر کنگ بیت، ءُ اے درگت ءَ توامیں وفاقی وزارت آناں نمدی جاری کنگ بوھگ ءَ اِنت، ایشی ءِ چیر دستی ءَ وزارتی رینک ءِ چیر دستی ءَ توامیں وزارت آنی ملازم آنی اسکریننگ المی کنگ بیت۔ آئی ءَ گوشت کہ پاکستان ءَ نزیک ءَ 11 لکھ مردم ہیپاٹائٹس سی ءَ گوں آماچ انت، اے یک ھترناکیں نادراھی یے کہ ایشی ءِ پجار باز وھد ءَ دیر ءَ بیت ءُ وھد ءِ سر ءَ پجار کنگ مہ بیت گڈا ایشی ءِ پجار جگر ءِ کینسر ءِ آماچ بوت کنت۔ وفاقی وزیر ءَ گوشت کہ مزن وزیر ءِ پروگرام ءِ رد ءَ ہیپاٹائٹس سی ءِ علاج ءِ واستہ دوائی آناں مُپت ءَ پُجاری کنگ بیت ءُ الس اے آسراتی ءَ چہ سرجمی ءَ پائدگ چست بہ کنت۔ آئی ءَ گوشت کہ گلگت بلتستان ءُ اسلام آباد کیپیٹل ٹیریٹری ءَ ھم مزنیں کچے ءَ اسکریننگ کنگ بیت، وھدیکہ ملک ءَ واتر بوھوکیں ڈیپورٹ بوتگیں مردم آنی اسکریننگ ھم المی جوڑ کنگ بوتگ۔ آیوکیں سئے ماہ ءَ تاں بالی گراب ءِ وسیلگ ءَ آیوکیں درستیں مسافر آنی اسکریننگ ءِ منصوبگ است انت۔ مصطفیٰ کمال ءَ گوشت کہ 12سال ءَ چہ گیش عمر ءِ مردم آنی واستہ ہیپاٹائٹس سی ءِ اسکریننگ المی کنگ بیت۔اسکریننگ ءِ عمل ءَ را شناختی کارڈ ءِ ریکارڈ ءَ گوں ھمگرنچ کنگ ءِ واستہ ھم کار کنگ بوھگ ءَ انت۔ درملک ءَ روگ ءَ پیسر اسکریننگ ءَ را المی کنگ ءِ تجویز ھم چار ءُ تپاسی کنگ بوھگ ءَ اِنت۔ وزیر جان سلامتی ءَ گوشت کہ بیورو آف آمار ءَ اسکریننگ ءِ واستہ سامان داتگ ءُ مردم شماری ءِ سافٹ ویئر ھم کارمرد کنگ بوھگ ءَ انت۔ اے نظام ءَ را ناڈرا ریکارڈ ءِ گوما ہمگرنچ کنگ انت تنکہ شہری آنی اسکریننگ ءِ بابت ءَ موثر ڈیٹا جوڑ کنگ بہ بیت۔ آئی ءَ گوشت کہ ہیپاٹائٹس سی ھون ءَ چہ دیم ءَ آیوکیں نادراھی اِنت پمیشکا ایشی ءِ وھد ءِ سر ءَ پجارینگ ءُ درمان کنگ سک باز المی اِنت۔ وفاقی وزیر ءَ گوشت کہ پنجاب ءَ چہ ہیپاٹائٹس سی ءِ اسکریننگ ءِ ھوالگ ءَ لوٹ اتگیں ڈیٹا انگت ءَ نہ رستگ، البت رابطہ جاری انت۔ مصطفیٰ کمال ءَ گوشت کہ آ سر وزیر پنجاب ءَ گوں ذاتی رنگ ءَ گند ءُ نند کنت ءُ ہیپاٹائٹس سی ءِ اسکریننگ ڈیٹا ءُ صوبگ ءِ تہ برجاھیں گامگیج آنی سر ءَ گپ ءُ تران کنت۔ آئی ءَ چہ راج ءَ اپیل کتگ کہ آ چہ ھپاٹائٹس سی ءِ مفتیں اسکریننگ ءِ آسراتی ءَ پائدگ چست بہ کن اَنت ءُ وتی ٹیسٹ ءَ بہ کن اَنت تانکہ نادراھی ءِ وھد ءِ سر ءَ پجارینگ بہ بیت۔