آجوئی مئے واستہ وشّی، منت واری، پھر ءُ جزم ءِ نوک کنگ ءِ روچ انت، بنجاھی وزیر منصوبگ بندی

اسلام آباد۔14اگست  (اے پی پی): منصوبگ بندی، دیمروئی ءُ ھاسیں گامگیج آنی وفاقی وزیر احسن اقبال ءَ آجوئی ءِ روچ ءِ 79می سالروچ ءِ درگت ءَ وتی کلوہ ءِ تہ ءَ پاکستان ءِ آجوئی ءِ روچ ءِ سر ءَ راج ءَ را دل ءِ جہلانکی ءَ چہ مبارک بات دات ءُ گوشت کہ آجوئی ءِ روچ مارا وشھالی، منت واری، پھر ءِ روچ اِنت۔ وزارت ءِ منصوبگ بندی ءِ نیمگ ءَ جمعہ ءِ روچ ءَ جاڑی بوتگیں بیان ءِ تہ ءَ وفاقی وزیر ءَ گوشت کہ مرچی اللہ تعالیٰ ءِ شگر ءُ منت ءِ درشان کنگ ءُ راجی کامیابی آناں وش آتک کنگ ءِ روچ اِنت۔ احسن اقبال ءَ گوشت کہ ما انصاف ءِ جنگ ءَ کامیابی آنی پد ءَ اللہ تعالیٰ ءِ شگر ءُ منت ءَ گوں آجوئی ءِ روچ ءَ برجم دارگ ءَ ایں ۔ آئی ءَ گوشت کہ مرچی آجوئی ءِ رکھینگ ءِ ھواری ءَ مارا معیشت ءِ جنگ ءَ ھم پاکستان ءِ آہنی ارادہ پیش کنگی انت۔ مارا یک راجے ءِ رنگ ءَ تپاک بوھگی اِنت ءُ پاکستان ءَ را اقتصادی پڑ ءَ یک مھکم ءُ شرپداریں ملکے جوڑ کنگی اِنت ۔ پاکستان ءِ دیمروئی، وشھالی ءُ اقتصادی آجوئی ءِ واستہ سرجمیں راج ءَ را یک مشت ءُ تپاکی ءَ گوں دیم ءَ روگی اِنت۔ پروفیسر احسن اقبال ءَ گوشت کہ مرچی ما نہ ایوک ءَ پاکستان ءِ آجوئی ءِ روچ ءِ 79 سالی روچ ءَ برجم دارگ ءَ ایں بلکیں پاکستان ءِ بن ھشت ایر کنوک قائداعظم محمد علی جناح ءُ علامہ محمد اقبال ءِ 150سالی سالروچ ءَ را ھم برجم دارگ ءَ ایں ۔ آئی ءَ گوشت کہ قائداعظم محمد علی جناح ءُ علامہ محمد اقبال ءَ آزات ءُ آزاد پاکستان ءِ واب دیستگ۔ آجوئی ءِ روچ ءَ مارا یک موہ یے رس ایت کہ ما قائداعظم محمد علی جناح ءُ علامہ محمد اقبال ءِ مزنیں جہد، وژن ءُ قربانیانی سرا توسیپ ءُ ستا پیش بہ کنیں۔ ما قائداعظم ءِ یکوئی، ایمان ءُ نظم ءُ ضبط ءِ اصولاں وتی راجی زند ءِ بہرے جوڑ بہ کنیں۔ منصوبگ بندی، دیمروئی ءُ ھاسیں گامگیج آنی وفاقی وزیر احسن اقبال ءَ گوشت کہ مرچی مارا وعدہ کنگی اِنت کہ ما پاکستان ءَ را یک مھکم، وشھال، آزات ءُ دیمروئی کتگیں ملک جوڑ کنگ ءِ واستہ وتی توامیں توان آناں کارمرد کناں۔ پروفیسر احسن اقبال ءَ گوشت کہ آجوئی ایوک ءَ سیم سر آنی سر ءَ نہ رکھینگ بیت بلکیں اقتصادی، اکیڈمک، سائنسی ءُ ٹیکنالوجی ءِ پڑ آنی تہ ءَ سوبمندی ءِ وسیلگ ءَ ھم رکھینگ بیت۔