پاکستان ءُ چین ءِ سیاسی، معاشی ءُ بنیاتی ڈھانچہ ءِ پڑ ءَ مھکمیں سیادی است انت، اورنگزیب خان کھچی

اسلام آباد۔10اگست  (اے پی پی): راجی مڈی ءُ دود ءُ ربیدگ ءِ وفاقی وزیر اورنگزیب خان کھچی  ءَ گوشت کہ پاکستان ءُ چین ءِ دوستی کوہ ءَ چہ بُرز تر، دریا ءَ چہ گہتر ءُ شہد ءَ چہ شیرکن تر اِنت وھدیکہ دوئیں ملک آنی نیام ءَ مردم آنی نیام ءَ رابطہ ءُ دود ءُ ربیدگی تبادلہ اے دیریں دوستی ءِ اصل بُن ھشت اِنت۔ آئی ءَ دو شمبے ءِ روچ ءَ اسلام آباد ءِ آثار قدیمہ ءُ عجائب گھر ءِ محکمہ ءَ "دی لینگویج آف دی ایسٹرن سلک روڈ — برجنگ چائنا اینڈ پاکستان، سیلیبریٹنگ شیئرڈ کلچرل اسپلنڈر” ءِ چیر دستی ءَ چینی زبان ءُ چینی دود ءُ ربیدگ ءِ سر ءَ آزمائشی کورس ءِ بنگیج ءِ مراگش ءَ گوں تران کنان ءَ گشتانک دیگ ءَ ات۔ وفاقی وزیر ءَ گوشت کہ پاکستان ءُ چین ءِ سیاسی، اقتصادی ءُ بنیاتی ڈھانچگ ءِ شوبگ آنی تہ ءَ مھکمیں سیادی است انت، وھدیکہ چین پاکستان اقتصادی راہداری ءِ چیر دستی ءَ ھم کمک جاری انت۔ آئی ءَ گوشت کہ دوئیں ملک آنی الس آنی نیام ءَ براہ راست رابطہ ءُ دود ءُ ربیدگی تبادلہ وت مہ وتی سیادی ءَ را گیش مھکم کنگ ءِ واستہ ھاسیں کرد ءَ پیلو کنت۔ آئی ءَ گوشت کہ زبان کجام ھم راج ءِ راجی پجار ءُ دود ءُ ربیدگ ءِ سرپد بوھگ ءِ دروازگ انت۔ اے چینی زبان ءُ دود ءُ ربیدگ ءِ پروگرام پاکستانی ءُ چینی ورنا آنی نیام ءَ دود ءُ ربیدگ ءِ بدلی ءِ واستہ دراجیں مدت ءِ پلیٹ فارم ءِ پجاری ءَ کنت۔ آئی ءَ گوشت کہ پروگرام ءِ وسیلگ ءَ بھر زوروکیں مردم بنیاتی چینی گال، تعارف، نمبر ءُ روچ ءِ گالبنداں چہ سرپد بنت۔ اورنگزیب خان کھچی  ءَ گوشت کہ اے پروگرام ایوک ءَ زبان ءِ وانگ ءَ گوں بندوک نہ اِنت بلکیں آھاں چینی دود ءُ ربیدگ ءِ جتا جتائیں تک ءُ پھنات آنی گوما آشنا کنگ ءِ موہ ھم رس ایت، ایشی ءِ تہ ءَ چینی خطاطی، روایتی میلہ ءُ ورگ ھوار اَنت۔ آئی ءَ گوشت کہ دود ءُ ربیدگ دل آناں یکجا کنت ءُ اے رنگیں گامگیج وت مہ وتی عزت ءُ شرپ، تپاکی ءُ برجمیں دوستی ءِ دیمروئی ءَ کمک کن اَنت۔ وفاقی وزیر ءَ چینی سفارتخانہ، آثار قدیمہ ءُ عجائب گھر ءِ محکمہ ءُ چینی ءُ پاکستانی استاد ءُ منتظمین ءِ پروگرام ءِ برجم دارگ ءِ ھاتر ءَ کوشست آناں ساڑات۔ آئی ءَ شریکیں ورنا آناں زور پر دات کہ آ اے بے دروریں موہ ءَ چہ گیش ءَ چہ گیش کار بہ کن اَنت ءُ زبان ءُ دود ءُ ربیدگ ءِ سفیر جوڑ بوھگ ءَ پاک چین ءِ دوستی ءَ را گیش مھکم کنگ ءِ واستہ وتی کرد ءَ پیلو بہ کن اَنت۔ مراگش ءَ گوں تران کنان ءَ چینی سفارتخانہ ءِ دود ءُ ربیدگ ءِ مشیر واجہ چن پینگ ءَ گوشت کہ پاکستان ءُ چین کوہ ءُ دریا آنی وسیلگ ءَ یکجاھیں نزیکیں ھمساھگ اَنت ءُ دوئیں ملک آنی نیام ءَ دوستی وھد ءِ گوزگ ءَ گوں گیش مھکم بوتگ۔ آئی ءَ گوشت کہ اقتصادی ءُ تجارتی کمک ءِ گوما پاک چین ءِ دوستی ءَ را پائیدار جوڑ کنگ ءَ دود ءُ ربیدگی وت مہ وتی وانگ ءِ ھم ھاسیں کرد انت۔ چن پینگ ءَ گوشت کہ پاکستان ءِ گندھارا ءِ مڈی ءُ چین ءِ ڈن ہوانگ ءِ موگاؤ گْور کوھنیں ریشم ءِ راہ ءِ وسیلگ ءَ تہذیبی رابطہ ءُ دود ءُ ربیدگ ءِ تبادلہ ءِ وشیں مثال اَنت۔ آئی ءَ گوشت کہ گندھارا آرٹ ءَ جتا جتائیں تہذیب آنی اثر آناں یکجا کنگ بوتگ، وھدیکہ ڈن ہوانگ ءِ آرٹ ورک آنی تہ ءَ ھم کوھنیں ریشم ءِ راہ ءِ وسیلگ ءَ چین ءَ جتا جتائیں دود ءُ ربیدگ آنی آیگ ءِ درشان کنگ بوتگ۔ چینی دود ءُ ربیدگی مشیر ءَ پاکستان ءُ چین ءِ نیام ءَ آثار قدیمہ ءُ دود ءُ ربیدگی مڈی ءِ رکھینگ ءِ پڑ ءَ برجاھیں کمک ءِ توسیپ کت ءُ گوشت کہ 2023ءَ بیجنگ ءِ حرامیں شہر ءَ پاکستانی گندھارا دود ءُ ربیدگی مڈی ءِ 173نمونہ آنی نمائش کنگ بوتگ۔ آئی ءَ آثار قدیمہ ءُ عجائب گھر ءِ شعبہ ءُ پیکنگ یونیورسٹی ءِ نیام ءَ کمک ءِ ھم ذکر کت ءُ ٹیکسیلا ءِ دود ءُ ربیدگی مڈی ءِ رکھینگ ءِ واستہ یکجائی لیبارٹری ءِ جوڑ کنگ ءِ منصوبگ ءِ سر ءَ چمشانک دات۔ واجہ چن پینگ ءَ گوشت کہ چین ءَ جتا جتائیں تہذیب آنی منفردیں پجار ءُ دود ءُ ربیدگ آناں شرپ کتگ ءُ دود ءُ ربیدگ ءِ مڈی ءِ رکھینگ ءِ تہ ءَ ”تنوع ءِ تہ ءَ ھمگرنچی“ ءِ رھبند ءِ سر ءَ باور کتگ۔ آئی ءَ گوشت کہ چین دود ءُ ربیدگی مڈی ءِ رکھینگ ءِ شوبگ ءَ وتی تجربت ءُ ٹیکنالوجی ءَ را پاکستان ءِ گوما بھر ءُ بانگ کنگ ءَ تیار اِنت، ایشی ءِ تہ ءَ 3D اسکیننگ، ڈیجیٹل ماڈلنگ ءُ میوزیم آرٹیفکٹس ءِ ڈیجیٹل پریزرویشن ھوار اَنت۔ آئی ءَ ”گندھارا گارڈینز“ منصوبگ ءِ ھم ھال داتگ کہ ایشی ءِ وسیلگ ءَ چینی ءُ پاکستانی ماہرین راجدپتری جاھ آنی رکھینگ ءِ بابت ءَ دمگی زھگ ءُ چاگرد آنی تہ ءَ سرپدی دیگ ءَ اَنت۔ آئی ءَ آیوکیں وھد ءَ یکجائی آثار قدیمہ ءِ کھدائی، دود ءُ ربیدگی مڈی ءِ بحالی ءُ رکھینگ، ڈیجیٹلائزیشن، ماہرین ءِ تبادلہ ءُ جھان ءِ مڈی ءِ تہ ءَ کمک ءَ را گیش دیمروئی دیگ ءِ واھشت ءِ درشان کت۔ محکمہ آثار قدیمہ ءُ عجائب گھر ءِ ڈائریکٹر جنرل سیدا تنزیلہ صباحت ءَ وتی وش اتکی گشتانک ءِ تہا پاکستان ءُ چین ءِ نیام ءَ دود ءُ ربیدگی تبادلہ ءِ دیمروئی ءِ ھاتر ءَ جزم ءِ درشانی کت۔ آئی ءَ گوشت کہ اے چینی زبان ءُ دود ءُ ربیدگ ءِ اے پروگرام دوئیں ملک آنی ورنا آناں یک دومی ءِ زبان ءُ دود ءُ ربیدگ ءِ سرپد بوھگ ءِ یک انچیں موہ ءِ دات کنت ءُ السی تک ءَ وت مہ وتی سیادی ءَ را گیش مھکم کنگ ءَ کمک رسیت۔ چینی زبان ءُ چینی دود ءُ ربیدگ ءِ بابت ءَ اے آزمائشی کورس چین ءِ دود ءُ ربیدگ ءِ مرکز پاکستان ءُ آثار قدیمہ ءُ عجائب گھر ءِ محکمہ ءِ نیمگ ءَ پاکستان ءُ چین ءِ دود ءُ ربیدگ ءُ اقتصادی دیمروئی ءِ انجمن ءِ کمک ءَ کنگ بوھگ ءَ اِنت۔ اے پروگرام 10 ءَ بگر داں 13 اگست 2026 ءَ برجاہ بیت کہ ایشی ءِ تہ ءَ 50 ءِ کساس ءَ چینی ءُ پاکستانی مہمان، نودربر ءُ کارندہ بھر زوری کنگ ءَ اَنت۔ پروگرام ءِ ساھت ءَ بھر زوروکاں چینی بُنکی گال ءُ گالبند، چینی خطاطی، روایتی میلہ، ورگ ءُ دود ءُ ربیدگ ءِ جتا جتائیں تک ءُ پھناتاں گوں آشنا کنگ بیت۔ مراگش ءِ گڈسرا چینی زبان ءُ چینی دود ءُ ربیدگ ءِ بابت ءَ تجرباتی کورس ءِ باقاعدہ بندات ءِ جار جنگ بوت ءُ پاکستان ءُ چین ءِ نیام ءَ یاتگاری تختی ھم بدل کنگ بوت۔