مات ءِ شیر زھگانی جان سلامتی، جوانیں وردن ءُ پاکستان ءِ پائیداریں آیوکیں وھد ءِ بُن ھشت اِنت،  وزیر مملکت برائے جان سلامتی

اسلام آباد۔10اگست  (اے پی پی): جان سلامتی ءِ وزیر ءِ مملکت ڈاکٹر مختار احمد بھرتھ ءَ گوشت کہ مات ءِ شیر زھگ آنی جان سلامتی، جوانیں وردن ءُ پاکستان ءِ پائیداریں آیوکیں وھد ءِ بُن ھشت اِنت۔ آئی ءَ ورلڈ بریسٹ فیڈنگ ویک ءِ ھوالگ ءَ وتی پیغام ءِ تہ ءَ گوشت کہ پاکستان ءَ زھگ ءِ شیر ءِ ورگ ءِ دیمروئی ءِ تہ ءَ مزنیں پیشرفت بوتگ، البت زھگ ءِ پیدائش ءَ چہ زوت ءَ پد شیر ءِ ورگ ءِ رجحان ءَ را گیش گیش کنگ ءِ ضلورت اِنت ءُ اولی شش ماہ ءَ ھاسیں رنگ ءَ زھگ ءِ شیر ءِ ورگ ءِ ضلورت اِنت۔ ڈاکٹر مختار بھارت ءَ گوشت کہ ایوک ءَ جان سلامتی مراگش آنی تہ ءَ محدود گامگیج زھگ ءِ شیر ءِ ورگ ءِ دیمروئی ءِ واستہ سرجم  نہ اَنت بلے کمیونٹی ءِ تک ءَ جوانیں کمک ءُ سرپدی ءِ نظام ءَ را مھکم کنگ ھم المی اِنت۔ آئی ءَ گوشت کہ مات ءُ ھاندان آنی واستہ جوانیں چاگرد ءِ پجارینگ ءِ واستہ ھاندان دوستیں پالیسی آناں جوانیں رنگ ءَ عمل کنگ ءَ را دل یکیمی کنگ بہ بیت۔ زچگی ءِ وھد ءَ نوکری ءِ ایمنی، کارجاہ ءَ شیر ءِ ورگ ءِ واستہ جوانیں آسراتی ءُ ھمگرنچیں کانود آنی جوانیں نفاذ ءِ وھد ءِ لوٹ اِنت۔ وزیر مملکت ءَ گوشت کہ مات ءُ ھاندان آناں مات ءِ شیر ءِ بدل ءِ گمراہ کنوکیں اشتہار ءَ چہ رکھینگ راجی اولویت انت۔ اے درگت ءَ کانود ءُ ضوابط ءِ سر ءَ سک باز عمل کنگ بہ بیت۔ وزیر مملکت ءَ گوشت کہ وفاقی حکومت صوبائی حکومت، دیمروئی شریک ءُ سول سوسائٹی ءِ گوما کمک ءَ سرجمیں ملک ءَ شیر ءِ ورگ ءِ دیمروئی ءِ واستہ جزم انت۔ آئی ءَ گوشت کہ یکجاہ ءَ مارا اے گپ ءَ را دل یکیمی کنگ لوٹ ایت کہ ہر زھگ ءَ را زند ءِ تہ ءَ جان سلامتی ءِ بندات رس ایت۔