وفاقی داخلہ ءِ وزیر ءَ علامہ اقبال انٹرنیشنل  بالی پٹ لاہور ءِ تر ءُ تاب کتگ، امیگریشن ءِ کار  ءِ سرا چار ءُ تپاسی

لاہور۔9اگست  (اے پی پی): وفاقی تہی کارانی وزیر محسن نقوی ءَ علامہ اقبال ءِ میاں اوستمانی بالی پٹ لاہور ءِ تر ءُ تاب کتگ ءُ مسافر آنی امیگریشن ءِ عمل ءِ چار ءُ تپاسی کتگ۔ آئی ءَ امیگریشن کاؤنٹر آنی چار ءُ تپاسی کتگ ءُ امیگریشن ءِ عمل ءُ مسافر آناں داتگیں آسراتی آنی بابت ءَ کارندہ آں چہ جست ءُ پرس کتگ۔ وفاقی وزیر ءَ امیگریشن ءِ ودار ءَ نشتگیں مسافراں ​​گوں ھم گند ءُ نند کتگ ءُ امیگریشن ءِ عمل ءَ زورگ بوتگیں وھد ءِ بابت ءَ جست ءُ پرس کتگ۔ مسافراں ​​گشتگ کہ امیگریشن ءِ عمل ءَ را 30منٹ ءِ کساس ءَ وھد زورگ ءَ انت ءُ ایشی ءِ بندوبست ءَ را گیش گہتر کنگ ءِ ضلورت انت۔ وزیر داخلہ ءَ مسافر آنی شکایت آنی ترندیں نوٹس زرتگ ءُ امیگریشن ءِ عمل ءَ را ترند کنگ ءِ واستہ بالی پٹ ءَ توامیں کاؤنٹر آناں پچ کنگ  ءِ پرمان داتگ۔ آئی ءَ گوشت کہ دگہ کاؤنٹر آنی ھم پچ بوھگ ءَ چہ امیگریشن ءِ تہ ءَ ھچ وڑیں دیر نہ بیت ءُ مسافر آناں گیش آسراتی رس ایت۔ وزیر داخلہ ءَ مسافر آناں دل یکیمی دات کہ امیگریشن ءِ عمل ءَ را ترند ءُ جوان جوڑ کنگ بیت ءُ مسافر آناں بے وسی ءِ ودار ءِ دیم ءَ دارگ نہ لوٹ ایت۔ اے موہ ءِ سر ءَ یک مسافرے ءَ ھم ایجنٹ ءِ زرّ زورگ ءِ شکایت کتگ۔ وزیر داخلہ ءَ شکایت جاہ ءِ سر ءَ نوٹس زرتگ ءُ معاملہ ڈائریکٹر ایف آئی اے ءِ دست ءَ داتگ ءُ سیادی داروکیں ایجنٹ ءِ دزگیر کنگ ءِ پرمان داتگ۔ وزیر داخلہ ءَ ایف آئی اے ءِ کارندہ آناں ہدایت کتگ کہ نا سرجمیں سفری دستاویزات ءِ سر ءَ کس ءَ را سفر کنگ ءِ اجازت دیگ مہ بیت، وھدیکہ سرجمیں دستاویزات ءِ واھندیں مسافر ءَ را سفر ءَ چہ بند کنگ مہ بیت۔ آئی ءَ گوشت کہ نوکیں ٹیکنالوجی ءِ کارمردی ءَ چہ امیگریشن ءِ عمل آسان ءُ ترند بوتگ، وھدیکہ دروگیں  کاگد آنی سر ءَ سفر کنوک آنی سر ءَ کارروائی گیش ترند کنگ بوھگ ءَ انت۔ مسافراں ​​سرجمیں سفری دستاویزات ءِ گوما درستیں استیں آسراتی دیگ بہ بنت ءُ آ غیر ضروری مشکلات ءِ آماچ مہ بنت۔