بجلی ءِ بہر ءُ بانگ ءِ کمپنیانی نجکاری ءِ درستیں مراگش ایر کتگیں وھد ءِ تہا سرجم کنگ بہ بنت، مزن وزیر شہباز شریف ءَ یک چار ءُ تپاسی دیوان ءِ تہا پنت ءُ شون

اسلام آباد۔5اگست  (اے پی پی): مزن وزیر محمد شہباز شریف ءَ ”ڈسکو“ ءِ نجکاری ءِ تہ ءَ میاں اوستمانی سرمایہ کار آنی بھر زوری ءِ آسراتی ءِ واستہ یک موثر ءُ جامع حکمت عملی ءِ زورگ ءِ پنت ءُ شون کتگ ءُ گوشت کہ نجکاری ءِ درستیں پڑ ءِ تہ ءَ منافع بخشیں رنگ ءَ سرجم کنگ بہ بیت ءُ تپاک کتگیں رھبند آنی رد ءَ سرجم کنگ بہ بیت۔ چار شمبے ءِ روچ ءَ مزن وزیر محمد شہباز شریف ءِ سروکی ءَ بجلی ءِ بھر ءُ بانگ ءِ کمپنی آنی نجکاری ءُ نجکاری کمیشن ءِ نوک جوڑیشت ءِ ھوالگ ءَ چار ءُ تپاسی دیوان برجم دارگ بوت۔ گند ءُ نند ءَ وفاقی وزیر توانائی سردار اویس احمد خان لغاری، وفاقی وزیر برائے اقتصادی امور احد خان چیمہ،  وفاقی وزیرانفارمیشن ٹیکنالوجی شزا فاطمہ خواجہ،  نجکاری ءِ ھوالگ ءَ مزن وزیر ءِ مشیر محمد علی ءُ سیادی داروکیں سرکاری ادارگ آنی کارندہ آں بھر زوری کت۔ دیوان ءَ گوں تران کنان ءَ مزن وزیر ءَ پنت ءُ شون کت کہ بجلی ءِ بہر ءُ بانگ ءِ کمپنی آنی نجکاری ءِ تہ ءَ میاں اوستمانی سرمایہ کار آناں ھوار کنگ ءِ واستہ یک موثر ءُ جامع حکمت عملی ءِ زورگ بہ بیت ءُ نجکاری کمیشن ءِ برجاھیں ادارگی اصلاحات ءُ نوک جوڑیشت یک ماہ ءِ تہ ءَ سرجم کنگ بہ بیت۔ مزن وزیر ءَ سرمایہ کار آناں نجکاری ءِ عمل ءَ را ہوار کنگ ءِ واستہ ملک ءِ تہ ءُ ڈن ءَ برجم دارگ بوھوکیں سوبمندیں روڈ شو آنی سر ءَ دل یکیمی ءِ درشانی کنان ءَ گوشت کہ ڈسکو آنی نجکاری ءِ توامیں مراگش ایر کتگیں وھد ءُ پاس ءِ تہ ءَ منافع بخشیں رنگ ءَ سرجم کنگ بنت، ایشی ءِ تہ ءَ جوڑ بوتگیں رھبند ءُ جوانیں حکمت عملی ءِ رد ءَ سرجمی کنگ بیت۔ مزن وزیر ءَ نجکاری کمیشن ءِ کار ءِ تہ ءَ میاں اوستمانی سٹینڈرڈ فنانشل، لیگل ءُ انفارمیشن ٹیکنالوجی ءِ ماہرین آناں ھوار کنگ ءِ پنت ءُ شون کت ءُ گوشت کہ نجکاری کمیشن ءَ را ادارگ آنی تہ ءَ وتی گنجائش ءُ سرمایہ کاری ءَ را گیش کنگ ءِ واستہ جوانیں گامگیج چست کنگ ءِ اہل جوڑ کنت۔ آئی ءَ نجکاری ءِ عمل ءِ آسراتی ءِ واستہ لوٹوکیں درستیں کانودی بندوبست ءُ ریگولیٹری فریم ورک آناں وھد ءِ سر ءَ سرجم کنگ ءُ جوانیں مشاورتی صلاحیت آنی گوما یک مشیر ءِ سوج آنی سر ءَ ھم پنت ءُ شون کتگ۔ مزن وزیر ءَ گوشت کہ نجکاری ءِ عمل ءَ صارف آنی مفاد ءَ را اولیت دیگ بہ بیت، ءُ آیوکیں وھد ءَ نجکاری ءَ گوں بندوکیں ادارگ آنی تہ ءَ صارف آنی شکایت آناں گیواری ءِ واستہ یک جامع ءُ موثر انتظامی ڈھانچے جوڑ کنگ بہ بیت۔ مزن وزیر ءَ را بریفنگ ءِ ساھت ءَ گوشگ بوت کہ بجلی ءِ بھر ءُ بانگ ءِ کمپنی اسکو، فیسکو ءُ گیپکو ءِ تہ ءَ سرمایہ کار آنی دلچسپی ءَ را وتی نیمگ ءَ رازیگ کنگ ءِ واستہ ملک ءُ درملک ءَ روڈ شوز سرجم کنگ بوتگ اَنت کہ اے کمپنی نجکاری ءِ اولی بھر ءَ ھوار اَنت۔ آئی ءَ گوشت کہ ترکی، سعودی عرب ءُ چین ءَ روڈ شوز ءُ نجکاری ءِ درگت ءَ سرمایہ کار آنی گوما رابطہ ءَ چہ دلبڈی ءِ آسر دیم ءَ آیگ ءَ انت۔ گند ءُ نند ءَ جتاجتائیں کمپنی آنی نجکاری ءِ اولی بھر ءِ سرجم کنگ ءِ واستہ نجکاری کمیشن ءِ نیمگ ءَ تاں انوگ ءَ چست کتگیں گامگیج آنی بابت ءَ سرپد کنگ بوت۔ دیمترا نجکاری کمیشن ءِ ادارہ جاتی نوکیں دروشم ءِ رد ءَ جوانیں مردمی قوت ءِ ھوار کنگ ءِ تہ ءَ بوتگیں پیشرفت ءِ سر ءَ ھم بریفنگ دیگ بوت۔