مزن وزیر شہباز شریف ءَ چار ءُ تپاسی ءِ دیوان ءَ پنت ءُ شون کتگ کہ نجکاری ءِ درستیں مراگش ایر کتگیں وھد ءِ تہا سرجم کنگ بہ بنت

اسلام آباد۔5اگست  (اے پی پی):مزن وزیر محمد شہباز شریف ءَ ”ڈسکوز“ ءِ نجکاری ءِ تہ ءَ میاں اوستمانی نامداریں سرمایہ کار آناں ھوار کنگ ءِ واستہ یک موثر ءُ جامع حکمت عملی ءِ زورگ ءِ پنت ءُ شون کتگ ءُ گوشت کہ نجکاری ءِ درستیں مراگش ءِ تہ ءَ ٹھینگ بوتگیں رھبند آنی رد ءَ منافع بخشیں رنگ ءَ سرجم کنگ بہ بیت۔ چار شمبے ءِ روچ ءَ مزن وزیر محمد شہباز شریف ءِ سروکی ءَ بجلی ءِ بھر ءُ بانگ ءِ کمپنی آنی نجکاری ءُ نجکاری کمیشن ءِ اصلاحات ءِ ھوالگ ءَ چار ءُ تپاسی دیوان برجم دارگ بوت۔ گند ءُ نند ءَ توانائی ءِ وفاقی وزیر سردار اویس احمد خان لغاری، اقتصادی امور ءِ وفاقی وزیر احد خان چیمہ، انفارمیشن ٹیکنالوجی ءِ وفاقی وزیر شازہ فاطمہ خواجہ، نجکاری ءِ ھوالگ ءَ مزن وزیر ءِ مشیر محمد علی ءُ سیادی داروکیں سرکاری ادارگ آنی کارندہ آں بھر زوری کت۔ مزن وزیر کارگس ءِ میڈیا ونگ ءِ نیمگ ءَ چہ جاڑی بوتگیں پریس ریلیز ءِ رد ءَ دیوان ءَ گوں تران کنان ءَ مزن وزیر ءَ پنت ءُ شون کتگ کہ بجلی ءِ بھر ءُ بانگ ءِ کمپنی آنی نجکاری ءِ تہ ءَ میاں اوستمانی سرمایہ کار آناں ھوار کنگ ءِ واستہ یک موثر ءُ جامع حکمت عملی ءِ زورگ بہ بیت ءُ کمیشن ءِ تہ ءَ برجاھیں ادارگی اصلاحات ءُ نوکیں تنظیم سازی ءِ کار سرجم کنگ بہ بنت۔ مزن وزیر ءَ سرمایہ کار آناں نجکاری ءِ عمل ءَ را ہوار کنگ ءِ واستہ ملک ءِ تہ ءُ ڈن ءَ برجم دارگ بوھوکیں سوبمندیں روڈ شو آنی سر ءَ دل یکیمی ءِ درشانی کنان ءَ گوشت کہ ڈسکو آنی نجکاری ءِ توامیں بھر ءُ بانگ ءِ تہ ءَ منافع بخش رنگ ءَ سرجم کنگ بہ بیت، ایر کتگیں رھبند ءُ جوانیں حکمت عملی ءِ رد ءَ۔ مزن وزیر ءَ نجکاری کمیشن ءِ کار ءِ تہ ءَ میاں اوستمانی معیار ءِ مالیاتی، کانود ءُ انفارمیشن ٹیکنالوجی ءِ ماہرین آناں ھوار کنگ ءِ پنت ءُ شون کت ءُ گوشت کہ نجکاری کمیشن ءِ گنجائش ءَ را گیش کنگ ءُ ادارگ آنی تہ ءَ سرمایہ کاری ءَ را گیش کنگ ءِ واستہ میاں اوستمانی معیار ءِ مردمی قوت ءُ ماہرین کارآمدیں گامگیج آنی تہ ءَ ھمگرنچ بنت۔ آئی ءَ نجکاری ءِ مراگش آنی تہ ءَ جوانیں مشاورتی گنجائش ءِ گوما مشیر ءِ سفارشات کنگ ءُ نجکاری ءِ مراگش آناں آسراتی ءِ واستہ درستیں المی ئیں کانودی بندوبست ءُ ریگولیٹری فریم ورک ءِ وھد ءِ سر ءَ سرجم کنگ ءِ ھم پنت ءُ شون کتگ۔ مزن وزیر ءَ گوشت کہ نجکاری ءِ عمل ءَ صارف ءِ مفاد ءَ را اولیت دیگ بہ بیت، ءُ نجکاری ءَ گوں بندوکیں ادارگ آنی تہ ءَ آیوکیں وھد ءَ صارف آنی شکایت آناں گیواری ءِ واستہ یک جامع ءُ موثر انتظامی ڈھانچے جوڑ کنگ بہ بیت۔ بریفنگ ءِ ساھت ءَ مزن وزیر ءَ را گوشگ بوت کہ نجکاری ءِ اولی بھر ءِ تہ ءَ ھواریں سئے کمپنی اسکو، فیسکو ءُ گپ کام ءَ سرمایہ کار آنی دلگوشی ءِ واستہ ملک ءُ درملک ءَ روڈ شو سرجم کتگ انت۔ ترکی، سعودی عرب ءُ چین ءِ روڈ شوز ءُ نجکاری ءِ تناظر ءَ سرمایہ کار آنی گوما ھوار بوھگ ءَ چہ دلبڈی ءِ آسر دیم ءَ آیگ ءَ انت۔ دیوان ءَ معاوضہ پیکج ءِ اولی بھر ءِ سرجم کنگ ءِ واستہ نجکاری کمیشن ءِ نیمگ ءَ تاں انوگ ءَ کتگیں گامگیج آنی بابت ءَ سرپد کنگ بوت۔ دیمترا نجکاری کمیشن ءِ ادارہ جاتی نوکیں دروشم ءِ رد ءَ جوانیں مردمی قوت ءِ ھوار کنگ ءِ تہ ءَ بوتگیں پیشرفت ءِ سر ءَ ھم بریفنگ دیگ بوت۔