آرٹیکل 370 ءُ 35 اے ءِ ھلاس کنگ ءِ ھندی گامگیج میان اُستمانی کانود ءِ ھلاپ بوتگ، بلوچستان ءِ سر وزیر

کوئٹہ۔ 05 اگست (اے پی پی): بلوچستان ءِ سر وزیر سرفراز بگٹی ءَ کشمیر ءِ استحصال ءِ روچ ءِ درگت ءَ وتی ھاسیں کلوہ ءِ تہ ءَ گوشت کہ آ وتی ءُ بلوچستان ءِ الس ءِ نیمگ ءَ ناجائزیں ھندوستان ءِ قبضہ ءِ چیر ءَ جموں ءُ کشمیر ءِ الس ءَ گوں سرجمیں یکوئی ءِ درشان کن آں ۔ آئی ءَ گوشت کہ 5اگست 2019 ءَ بھارت ءِ نیمگ ءَ آرٹیکل 370ءُ 35اے ءِ ھلاس کنگ ناجائز، یک نیمگی ءُ میاں اوستمانی کانود ءِ ھلاپ اِنت، ایشی ءِ مول ءُ مراد کشمیری راج ءِ پجار، ھک ءُ راجدپتری ھک آنی سر ءَ تاوان دیگ بوتگ۔ بنجاھی وزیر ءَ گوشت کہ گوستگیں بازیں دہائی ءَ چہ کشمیری راج ءِ سر ءَ زلم ءُ زوراکی، سرکچ ءُ انسانی ھک آنی مزنیں لگتمالی ءِ آماچ بوھگ ءَ انت۔ آئی ءَ گوشت کہ کشمیری اُلس ءَ را وتی سرڈگار ءِ سر ءَ اقلیت ءِ جوڑ کنگ ءِ کوشست نہ ایوک ءَ مذمت ءِ لائک انت بلکینگ ءَ اقوام متحدہ ءِ قرارداد ءُ میاں اوستمانی کانود آنی پدریں ھلاپ ورزی انت۔ سرفراز بگٹی ءَ گوشت کہ بلوچستان ءِ اُلس ھندوستان ءِ اے گامگیج آنی تْرندی ءَ مذمت کن اَنت ءُ کشمیری اُلس ءِ وت واجھی ءِ ھک ءِ سرجمی ءَ کمک کن اَنت ۔ آئی ءَ اے گپ ءِ سر ءَ زور پر دات کہ کشمیر ءِ جیڈھ ءِ یکیں انصاف ءُ دائمی گیواری ایوک ءَ اقوام متحدہ ءِ سلامتی کونسل ءِ ھمگرنچیں قرارداد ءُ کشمیری اُلس ءِ واھشت آنی رد ءَ ممکن اِنت۔ سر وزیر بلوچستان ءَ گوشت کہ بھارت ءِ ناجائزیں قبضہ ءِ چیر دستی ءَ جموں ءُ کشمیر ءَ انسانی ھک آنی لگتمالی آنی سر ءَ میاں اوستمانی براتی ءَ را جوانیں نوٹس زورگ لوٹ ایت، کشمیری راج ءِ سر ءَ بوتگیں ظلم ءُ زوراکی آناں پدر کنگ لوٹ ایت ءُ بھارت ءِ سر ءَ وتی میاں اوستمانی ذمہ واری آنی سر ءَ عمل کنگ ءِ واستہ دباؤ گیش کنگ لوٹ ایت۔ آئی ءَ گوشت کہ بلوچستان حکومت وفاقی حکومت ءِ گوما سرجمی ءَ یکوئی ءَ لوٹ کنت کہ اے جنز ھما جزم ءُ یکوئی ءَ گوں برجاہ بہ بیت کہ پاکستان گوستگیں بازیں دہائیاں چہ کشمیری راج ءَ را سیاسی، سفارتی ءُ اخلاقی کمک کنگ ءَ انت۔ آئی ءَ گوشت کہ پاکستان ءُ بلوچستان ءِ الس کدی وتی کشمیری برات ءُ گھار آناں ایوک ءَ نہ یلہ کنت ءُ وت واجئی ءُ آجوئی ءُ انصاف ءِ ھک ءِ واستہ ھمک تک ءُ پھنات ءَ اخلاقی کمک ءَ برجاہ دار ایت۔ بنجاھی وزیر ءَ گوشت کہ کشمیر استحصال ءِ روچ اے جزم ءِ نوک کنگ ءِ روچ اِنت کہ پاکستان ءُ بلوچستان ءِ الس ھمک گرانیں ساھت ءَ کشمیری الس ءِ ھمراھی ءَ اوشتاتگ ءُ وتی سرجمیں اخلاقی ءُ سفارتی کمک ءَ را برجاہ دار اَنت داں آ وتی جائزیں ھک ءَ سر بہ بنت۔