وانگ ءُ زانگ، بیپار ءُ رسانکدر پاکستان ءُ تاجکستان ءِ نیام ءَ کمک ءَ را نوکیں بالاد ءَ سر کنت، تاجکستان ءِ سفیر یوسف شریف زاده

اسلام آباد۔26جولائی  (اے پی پی): پاکستان ءَ جمہوریہ تاجکستان ءِ سفیر یوسف شریف زاده ءَ گوشت کہ پاکستان ءُ تاجکستان ءِ نیام ءَ وانگ ءُ زانگ، تجارت، سیل ءُ سواد ءُ میڈیا ءِ پڑ ءَ کمک ءِ بے کساس موہ است انت ءُ دوئیں براتیں ملک آناں وت مہ وتی ءَ را گیش مھکم کنگ ءِ واستہ یکجائی کوشست کنگ لوٹ ایت۔ آئی ءَ گوشت کہ تاجکستان پاکستانی نودربر آنی واستہ جھان ءِ تک ءِ وانگ ءُ زانگ ءِ دروازگ آناں پچ کنگ ءَ انت، وھدیکہ دوئیں ملک آنی نیام ءَ میڈیا ءُ السی سیادی آنی دیمروئی ءَ چہ دو نیمگی سیادی ءَ را گیش مھکم بیت۔ اے ھیالانی درشانی آئی ءَ اسلام آباد ءَ پرائیویٹ کنسلٹنسی کارگس ءِ بنگیج کنگ ءِ مراگش ءَ گشتانک دیان ءَ کت۔ مراگش ءِ تہ ءَ آل پاکستان ءِ روتاک ءُ الیکٹرانک میڈیا ءِ کارندہانی کنفیڈریشن ءِ مرکزی چیئرمین محمد صدیق انزار، میڈیا ورکرز آرگنائزیشن ءِ صدر کلیم شمیم، محمد شیراز، ملک منیر احمد، صوبیہ خان، مہویش ممتاز احمداج بیگ، شکیل احمد، آر آئی یو جے ءِ صدر طارق عثمانی، سینئر اھوالکار تازین اختر، گلزار گیلانی ءُ ایندگر شخصیت آں تاجکستان ءِ سفیر ءَ را گرمیں وش اتک کت۔ سفیر ءِ گوما تاجک سفارت ءِ ماموریت ءِ معاون سروک معروف عبدالرحمان ھم ھوار بوتگ۔ تاجکستان ءِ سفیر یوسف شریف زاده ءَ گوشت کہ تاجکستان پاکستانی نودربر آنی واستہ جھان ءِ درجہ ءِ وانگ ءُ زانگ ءِ واستہ جوانیں موہ پجاری کنگ ءَ انت ءُ دوئیں ملک آنی نیام ءَ وانگ ءُ زانگ ءِ کمک ءَ را گیش پراھ کنگ وھد ءِ ضلورت انت۔ آئی ءَ گوشت کہ ابن سینا تاجک اسٹیٹ میڈیکل یونیورسٹی دمگ ءِ کوھن تر ءُ نامداریں میڈیکل وانگ ءُ زانگ ءِ ادارگ آنی تہ ءَ یکے، ایشی ءِ تہ ءَ مزنیں کساس ءَ درملکی نودربر وانگ ءَ اَنت۔ آئی ءَ گوشت کہ پاکستان ءُ تاجکستان ءِ نیام ءَ راجدپتری، مذہبی ءُ تاجکستان ءِ سیادی سک باز مھکم انت، ایشاں وانگ ءُ زانگ، تجارت، سیل ءُ سواد ءُ رسانکدر ءِ وسیلگ ءَ گیش مھکم کنگ بوت کنت۔ آئی ءَ دل یکیمی دات کہ تاجک سفارت خانہ دوئیں ملک آنی نیام ءَ ھمک رنگ ءِ کمک ءَ را دیمروئی دیگ ءِ واستہ وتی کرد ءَ برجاہ دار ایت۔ مراگش ءِ ساھت ءَ اھوالکار آناں سفیر ءَ چہ دو نیمگی تجارت، سرمایہ کاری، سیل ءُ سواد، میڈیا ءِ تبادلہ ءُ وانگ ءُ زانگ ءِ سیادی ءِ ھوالگ ءَ جتا جتائیں جُست ءُ پُرس کت، ایشی ءِ سر ءَ آئی ءَ سرجمیں رنگ ءَ پسو دات ءُ گوشت کہ دوئیں ملک آنی نیام ءَ کمک ءِ مزنیں امکان است انت ءُ نجی شعبہ، میڈیا ءُ وانگ ءُ زانگ ءِ ادارگ اے رد ءَ ھاسیں کرد پیلو کت کن اَنت۔