مزن وزیر محمد شہباز شریف ءَ جنوبی وزیرستان ءَ ناشرکاری اُرش ءِ ناکام کنگ ءِ پد ءَ سیکورٹی فورسز ءَ را توسیپ ءُ ستا پیش کتگ

لاہور ۔26جولائی  (اے پی پی): مزن وزیر محمد شہباز شریف ءَ جنوبی وزیرستان ءَ ناشرکاری اُرش ءِ ناکام کنگ ءِ پد ءَ سیکورٹی فورسز ءَ را شگر ءُ منت گپت۔ یک شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ءَ جنوبی وزیرستان ءَ سیکورٹی فورسز ءِ چیک پوسٹ ءِ سر ءَ بھارت ءِ سرپرستی ءَ فتنہ الخریج ناشرکار آنی نیمگ ءَ چہ بزدلیں اُرش ءَ را ناکام کنگ ءُ فورسز ءِ کوش ءِ سر ءَ سیکورٹی فورسز ءَ را شگر ءُ منت گپت۔ مزن وزیر ءَ سیکورٹی فورسز ءِ پیشہ وارانہ ، غیر معمولی دلیری ءُ وھد ءِ سر ءَ کارروائی ءِ ساڑاتگ ءَ گوشت کہ مئے بہادریں سپاھیگ آناں یک رندے پدا اے گپ ثابت کتگ کہ آ دژمن ءِ نا شریں منصوبگ آناں ناکام کنگ ءَ پاکستان ءِ ایمنی ءِ واستہ ھچ وڑیں ھترہ ءِ موہ نہ دنت۔ آئی ءَ گوشت کہ سرجمیں راج وتی بہادریں قوت ءُ کانود ءِ نفاذ ءِ ادارگ آنی گوما اوشتاتگ۔ حکومت ءُ سیکورٹی فورسز آپریشن ”استحکام ءِ تعین“ ءِ چیر دستی ءَ وتی کاروائیاں گوں سرجمیں زور ءَ برجاہ دار اَنت داں کہ ناشرکاری ءِ آفت ملک ءَ چہ سرجمی ءَ ھلاس کنگ بہ بیت۔