نائب مزن وزیر محمد اسحاق ڈار ءَ منیلا ءَ بنگلہ دیش ءِ درئی کارانی وزیر خلیل الرحمٰن  ءَ گوں گند ءُ نند

منیلا۔22جولائی  (اے پی پی): آسیان ءِ دمگی وزیرانی دیوان ءِ ساھت ءَ نائب مزن وزیر ءُ درئی کارانی وزیر سینیٹر محمد اسحاق ڈار ءَ بنگلہ دیش ءِ دری کارانی وزیر ءُ اقوام متحدہ ءِ جنرل اسمبلی ءِ 81می دیوان ءِ نوک گچین بوتگیں صدر خلیل الرحمان ءَ گوں گند ءُ نند کت۔ چار شمبے ءِ روچ ءَ درئی کارانی کارگس ءِ رد ءَ دوئیں سروک آناں پاکستان ءُ بنگلہ دیش ءِ نیام ءَ سیادی آنی تہ ءَ جوانیں دیمروئی ءِ سر ءَ چار ءُ تپاسی کتگ ءُ گوستگیں سال ءَ نائب مزن وزیر ءِ بنگلہ دیش ءِ تر ءُ تاب ءَ چہ دو نیمگی سیادی ءَ را داتگیں نوکیں رپک ءِ ساڑاتگ۔ آہاں دو نیمگی سیادی ءَ را گیش مھکم کنگ ءِ واستہ وتی یکجائی جزم ءِ پدا زور دات۔ آہاں دوئیں ملک آنی نیام ءَ گیش بوھوکیں سیادی آناں وش آتک کت، ایشی ءِ تہ ءَ مردم آنی نیام ءَ گیش بوھوکیں تبادلہ ءُ اے سال ءَ چہ دیم پہ دیم بالی گراب آنی بندات ءَ چہ رابطہ ءِ تہ ءَ گہتری ھوار اِنت ءُ اے جوانیں دیمروئی ءِ برجاہ دارگ ءِ سر ءَ تپاک کت۔ دوئیں رہشون آں وت مہ وتی دلچسپی ءِ دمگی ءُ میاں اوستمانی جیڈھ آنی سر ءَ ھم گپ ءُ تران کت۔