ریلوے ءِ وفاقی وزیر ءَ ایران ءِ داخلہ ءِ وزیر ءَ گوں مزن تک ءِ ڈل ءَ گند ءُ نند کتگ ، اسلام آباد ءُ تہران ءُ استنبول ءِ ٹرین سروس ءِ بحالی ءِ بابت ءَ گپ ءُ تران کتگ

اسلام آباد۔22جولائی  (اے پی پی): ریلوے ءِ وفاقی وزیر محمد حنیف عباسی ءَ مزنیں تک ءِ ڈل ءِ گوما ایران ءِ تہی کارانی وزیر اسکندر مومنی ءَ گوں ھاسیں گند ءُ نند کت، ایشی ءِ تہ ءَ پاکستان ءَ ایران ءِ سفیر ڈاکٹر رضا امیری مقدام ھم ھوار ات۔ گند ءُ نند ءِ تہ دوئیں براتیں ملک آنی نیام ءَ ریلوے ءِ کمک، سیم سر ءَ گوں رابطہ ءُ وت مہ وتی بیپاری ءِ دیمروئی ءِ سر ءَ سرجمیں گپ ءُ تران کنگ بوت۔ اے موہ ءِ سر ءَ 1959ءِ دو نیمگی ریلوے معاہدہ ءُ 2025ءِ کمک ءِ فریم ورک ءِ رد ءَ تکنیکی ءُ تجارتی سیادی آناں گیش وسعت دیگ ءِ جزم ءِ پدا زور دیگ بوت۔ اے موہ ءِ سر ءَ ریلوے ءِ وفاقی وزیر حنیف عباسی ءَ گوشت کہ مین لائن تھری پاکستان ءُ ایران ءِ نیام ءَ ریل ءِ رابطہ ءِ مستریں راہداری انت۔ اے ھاسیں لائن ءِ اپ گریڈیشن ءِ کار رواں مالی سال ءَ بندات کنگ ءِ گمان اِنت ءُ دسمبر 2029ءَ تاں سرجم کنگ بیت ایشی ءَ چہ دمگی تجارت ءَ را مزنیں دیمروئی رسیت۔ آئی ءَ گوشت کہ ایران ءِ ریلوے ءِ لوٹ ءِ رد ءَ تفتان ریلوے اسٹیشن ءَ را ’کسٹم کلیئرنس اسٹیشن‘ ءِ درجہ دیگ بوتگ تانکہ سرحد ءِ سرا بار ءِ نقل و حرکت ءَ را آسراتی دیگ بہ بیت۔ حنیف عباسی ءَ زاهدان ءُ تفتان ءِ بہر ءِ بحالی ءِ واستہ ایران ءِ گامگیج آناں ساڑات ءُ گوستگیں بحران ءِ وھد ءَ ایرانی راج ، سروک ءُ سروکی ءِ استحکام ءَ را شگر ءُ منت گپت ءُ شھید آناں شگر ءُ منت گپت۔ ایران ءِ تہی کارانی وزیر اسکندر مومنی ءَ گرمیں مہمانداری ءِ منت گپت کنان ءَ گوشت کہ پاک ایران ءِ سیادی راجدپتری ءُ سک گہتر انت کہ گوستگیں دو سال آنی تہ ءَ مثالی تک ءَ سر بوتگ انت۔ آئی ءَ گوستگیں کش ءُ چیل آنی وھد ءَ پاکستان ءِ بے دروریں کمک ءِ ھاترا ھاسیں رنگ ءَ مزن وزیر شہباز شریف ءُ فیلڈ مارشل سید عاصم منیر ءِ موثر سفارتی کوشست ءُ مخلصیں کوشست آناں وشیں رنگ ءَ شگر ءُ منت گپت۔ ایران ءِ تہی کارانی وزیر ءَ گوشت کہ مشکلیں ساھت ءَ پاکستان ءِ اے براتی ءُ ایمنی ءِ کرد ءَ ایرانی راج مدام ستا ءُ یات ءَ کنت۔