پاک چین ءِ بی ٹو بی فارماسیوٹیکل اینڈ ہیلتھ کیئر انویسٹمنٹ کانفرنس  ءَ  فارماسیوٹیکل سیکٹر   ءِ شش ھاسیں ذیلی شوبگ آنی سر ءَ  ھاسیں دلگوشی،  مصطفیٰ کمال

اسلام آباد۔22جولائی  (اے پی پی):راجی جان سلامتی ءِ وفاقی وزیر سید مصطفیٰ کمال ءَ گوشت کہ پاک چین ءِ بی ٹو بی فارماسیوٹیکل ءُ جان سلامتی ءِ سرمایہ کاری کانفرنس ءَ دواسازی ءِ شوبگ ءِ شش ھاسیں ذیلی شوبگ آنی سر ءَ ھاسیں دلگوشی دیگ بوتگ ایشی ءِ مول ءُ مراد پاکستان ءَ سرمایہ کاری، ٹیکنالوجی ءِ ٹرانسفر ءُ لوکل انڈسٹری ءَ را دیمروئی دیگ اِنت۔ آئی ءَ گوشت کہ پاکستان ءَ کارمرد بوھوکیں 13 ویکسین سرجمی ءَ درآمد کنگ بنت، البت حکومت ءَ ملک ءِ اولی راجی ویکسین پالیشی تیار کتگ، ایشی ءَ چہ بنجاہی تک ءَ ویکسین ءِ پیداوار ءِ راہ پچ بیت۔ اے ھیالانی درشانی آئی ءَ چار شمبے ءِ روچ ءَ پریس کانفرنس ءِ ساھت ءَ کت اَنت۔ آئی ءَ گوشت کہ جان سلامتی ءِ شوبگ سک حساس انت ایشی ءِ واستہ عام نہ بلکینگ ءَ تجربہ کاریں مردم آنی ضلورت انت۔ آئی ءَ گوشت کہ اے وھد ءَ پاکستان 85درسد درمان وت جوڑ کنت، بلے اے درمان آنی جوڑ کنگ ءَ کارمرد بوھوکیں خام مال آنی تہ ءَ نزیک ءَ 95درسد درآمد کنگ بیت۔ مصطفیٰ کمال ءَ گوشت کہ وزارت جان سلامتی ءِ ٹیم ءَ پاکستانی ءُ چینی کمپنی آنی نیام ءَ یک موثریں ’’میچ میکنگ‘‘ ءِ عمل سرجم کتگ ایشی ءِ آسر ءَ دو روچی کانفرنس ءَ 240 ڈل ءُ 140چینی کمپنی آں بھر زرتگ، وھدیکہ 340 دو نیمگی کاروباری گند ءُ نند برجم دارگ بوتگ۔ آئی ءَ گوشت کہ کانفرنس ءِ ساھت ءَ 22 کمپنی آنی گوما 629.5 ملین ڈالر ءِ معاہدہ ءِ سر ءَ دستخط کنگ بوتگ، وھدیکہ 800 ملین ڈالر ءِ مفاہمت نامہ ءِ سر ءَ ھم دستخط کنگ بوتگ۔ آئی ءَ گوشت کہ نوں عملی منصوبگ آنی سر ءَ عمل کنگ ءِ واستہ اے کمپنی آنی گوما باقاعدہ رابطہ ءُ مشورہ کنگ بوھگ ءَ انت۔ وفاقی وزیر ءَ گوشت کہ جان سلامتی ءِ شوبگ مدام دیمروئی کنوکیں شوبگ انت ایشی ءِ تہ ءَ پاکستان ءِ آبادی 260ملین ءَ چہ گوستگ۔ آئی ءَ گوشت کہ پاکستان ءَ ھمک سال نیوزی لینڈ ءِ کلیں آبادی ءِ برابر نوکیں مردم گیش کنگ ءَ انت ءُ تاں 2030 ءَ پاکستان آبادی ءِ رد ءَ دگنیا ءِ چارمی مزنیں ملک جوڑ بیت۔ مصطفیٰ کمال ءَ اسلام آباد پولیس ءِ ازمت آنی توسیپ کنان ءَ گوشت کہ بالی پٹ ءَ وش اتک، نندگ ءُ ایندگر بندوبست آنی رد ءَ ڈل آناں جوانیں رنگ ءَ چار ءُ بچار کنگ بوتگ، ایشی ءِ واستہ دگنیا ءَ پاکستان ءِ بندوبست آنی توسیپ کتگ۔ آئی ءَ گوشت کہ مزن وزیر ءِ ساڑی ءَ 9 ھاسیں معاہدہ ءِ سر ءَ دستخط کنگ بوتگ، وھدیکہ ڈراپ ءِ نظام ءَ مزنیں اصلاحات کنگ بوتگ انت۔ آئی ءَ گوشت کہ یک میڈیکل ڈیوائس ءِ رجسٹریشن کہ پیسر ءَ دو ءُ نیم ءَ چہ سئے سال ءِ وھد زرتگ ات ءُ کرپشن ءِ الزام آنی سر ءَ پُر ات، نوں سرجمی ءَ ڈیجیٹل سسٹم ءِ وسیلگ ءَ کنگ بوھگ ءَ انت۔ وفاقی وزیر ءَ گوشت کہ اے وھد ءَ پاکستان 52 ملک آنی تہ ءَ دوائی آنی برآمد کنگ ءَ انت ءُ آیوکیں یک سال ءِ اندر ءَ ڈراپ ءَ را سد درسد ڈیجیٹل کنگ بیت۔