پاکستان ءَ گریجویٹانی ضلورت انت کہ آ جیڑہاں گیش ءُ گیوار بہ کن انت، روزگار پیداک بہ کن انت ءُ ملک ءِ دیمروئی ءَ وتی کرد ءَ پیلو بہ کن انت، چیئرمین سینیٹ

پشاور۔ 30 جون (اے پی پی): سینیٹ ءِ چیئرمین سید یوسف رضا گیلانی ءَ گوشت کہ پاکستان ءَ گریجویٹ آنی ضلورت اِنت کہ آ جیڈھ آناں گیش ءُ گیوار بہ کن اَنت، روزگار پیداک بہ کن اَنت ءُ ملک ءِ دیمروئی ءَ کمک بہ کن اَنت ءُ سول ءُ ملٹری سروکی امریکہ ءُ ایران ءِ نیام ءَ امن ءِ تہ ءَ کرد پیلو کنگ ءِ ھاترا مبارکی ءِ مستحق اِنت۔ اے ھیالانی درشانی آئی ءَ سئے شمبے ءِ روچ ءَ غلام اسحاق خان انسٹی ٹیوٹ سوابی ءِ سالی کانووکیشن ءَ ھاسیں مہمان ءِ بستار ءَ گشتانک دیان ءَ کت۔ چیئرمین سینیٹ یوسف رضا گیلانی ءَ گوشت کہ صدر آصف علی زرداری ءِ نیمگ ءَ غلام اسحاق خان انسٹی ٹیوٹ ءِ سالی کانووکیشن ءَ شمئے نیام ءَ ساڑی بوھگ منی واستہ شرپ ءِ گپ اِنت۔ من کلیں گریجویٹاں مبارک بات دیاں، اے سوبمندی شمئے محنت ءِ آسر اِنت۔ من ھم چہ دل ءِ تہ ءَ تئی مات ءُ پت ءُ استاداں مبارک بات دیان آں کہ آھانی منت ءَ تو اے سوبمندی ءِ سفر ءَ سرجم کتگ۔ آئی ءَ گوشت کہ پاکستان ءَ ہائیر ایجوکیشن ءِ دیمروئی ءِ تہ ءَ اے مزنیں وانگ ءُ زانگ ءِ ادارگ ءِ ھاسیں کرد انت، اے مزنیں پھر ءِ گپ انت کہ اے ادارگ کمپیوٹنگ، انجینئرنگ، سائنس، ٹیکنالوجی ءُ مینجمنٹ ءِ شوبگ ءَ سروکیں کرد ءَ پیلو کنگ ءَ انت۔ آئی ءَ گوشت کہ نالج اکانومی ءِ دیمروئی ءَ غلام اسحاق خان انسٹی ٹیوٹ ءِ کلیدی کرد انت، ھما ملک کہ علم ءَ را ارزشت دنت آ دیم ءَ روان کن انت ءُ ھما ملک کہ نوکیں دور ءِ لوٹ آنی رد ءَ علم ءِ پڑ ءَ دومی ءِ سر ءَ انحصار کن انت آ پد منتگ انت۔ آئی ءَ گوشت کہ پاکستان ءِ چیلنج پدر انت، مارا انحصار ءِ بدل ءَ پیداوار ءِ سر ءَ دلگوشی دیگی انت، نوآبادیاتی نیمگ ءَ جنزگی انت ءُ دیمروئی ءِ سر ءَ دلگوشی دیگی انت ایشی ءِ تہ ءَ غلام اسحاق خان انسٹی ٹیوٹ ءِ وڑیں ادارگ آنی ھاسیں کرد انت۔ آئی ءَ گوشت کہ یونیورسٹی آناں گریجویٹ آنی کساس ءَ چہ نہ بلکینگ ءَ نوکیں دور ءِ لوٹ آنی رد ءَ پٹ ءُ پول ءَ چہ پگار کنگ بیت۔ آئی ءَ گوشت کہ پاکستان دگنیا ءِ تہ ءَ ورنا آنی آبادی ءِ گیشیں ملک اِنت کہ ایشی ءِ تہ ءَ 60درسد ءَ چہ گیش اِنت، ایشی ءَ را کارمرد کنگ ءِ ضلورت اِنت ءُ اے ھما وھد ءَ ممکن بیت کہ ما وتی ورنا آناں زانت ءُ زانشت ءَ چہ لیس کن ایں ۔ آئی ءَ گوشت کہ مارا انجینئر، سائنسدان ءُ پٹ ءُ پولکار آنی ضلورت انت۔ آئی ءَ گوشت کہ پاکستان ءَ گریجویٹ ءِ ضلورت انت کہ آ جیڈھ آنی گیواری ءَ بہ کن انت، روزگار پیداک بہ کن انت ءُ ملک ءِ دیمروئی ءَ وتی کرد ءَ پیلو بہ کن انت۔ آئی ءَ گوشت کہ مدام منی واھشت بوتگ کہ ملک ءَ ہائیر ایجوکیشن دیما برگ بہ بیت ءُ شہید بے نظیر بھٹو ءِ وژن ھم ھمے بوتگ۔ آئی ءَ گوشت کہ وھدے آ مزن وزیر بوتگ آں وانگ ءُ زانگ آئی ءِ ترجی آنی سر ءَ بوتگ، ما وانگ ءُ زانگ ءِ شوبگ ءَ سرمایہ کاری کتگ ءُ مرچی چیئرمین سینیٹ ءِ بستار ءَ من وانگ ءُ زانگ، سائنس، ٹیکنالوجی ءُ ریسرچ ءِ دیمروئی ءِ واستہ جزم آں۔ آئی ءَ گوشت کہ انسٹی ٹیوٹ ءِ کانووکیشن ءِ واستہ اے ھال کم نہ انت، منی سوج انت کہ دیم ءِ کانووکیشن اسلام آباد ءِ کانووکیشن ہال ءَ بہ بیت۔ آئی ءَ گوشت کہ اے موہ ءِ سر ءَ پاکستان ءِ سول ءُ ملٹری سروکی ءَ را مبارک بات ءُ خراج پیش کن آں کہ آھاں امریکہ ءُ ایران ءِ نیام ءَ امن ءِ برجائی ءَ کرد پیلو کتگ ءُ اے امن عمل ءِ سوبمندی ءِ واستہ دعا کناں۔ اے یک مزنیں کامیابی یے ایشی ءَ چہ سرجمیں دگنیا سیت زورگ لوٹ ایت۔ آئی ءَ گوشت کہ مسلمان آنی سر ءَ ناشرکار بوھگ ءِ بھتام جنگ بوتگ بلے اے امن ءِ عمل ءَ نوں اے گپ پدر کتگ کہ اسلام امن ءِ دین اِنت، ما ناشرکار نہ آں بلکیں امن ءُ مفاہمت ءِ سر ءَ ایمان داریں۔ ایشی ءَ چہ پیسر چیئرمین سینیٹ ءِ نیمگ ءَ انسٹی ٹیوٹ ءِ گریجویشن کنوکیں نودربر آناں سرٹیفکیٹ بھر ءُ بانگ کنگ بوتگ ءُ جوانیں کارکردگی پیش داشتگ آھاں میڈل دیگ بوتگ۔ اے موہ ءِ سرءَ گورنر خیبر پختونخوا فیصل کریم کندی، سلیم سیف اللہ خان، فیکلٹی ءِ باسک ءُ اے دگہ کارندہ ھم ساڑی اتنت۔ ایشی ءَ چہ پیسر چیئرمین سینیٹ ءَ را ادارگ ءَ سر بوھگ ءَ گوں گرمیں وش آتک کنگ بوتگ۔