میاں اوستمانی پارلیمنٹ ءِ روچ جمہوری ادارگ، آئینی بالادستی ءُ الس ءِ نمائندگی ءِ مھکم کنگ ءِ جزم ءِ نوک کنگ ءِ روچ اِنت، سینیٹر شیری رحمان

اسلام آباد۔30جون  (اے پی پی): پیپلز پارٹی ءِ نائب صدر سینیٹر شیری رحمان ءَ گوشت کہ میاں اوستمانی پارلیمنٹ ءِ روچ جمہوری ادارگ، آئینی بالادستی ءُ السی نمائندگی ءِ مھکم کنگ ءِ جزم ءِ نوک کنگ ءِ روچ اِنت۔ پیپلز پارٹی ءَ ھمک دور ءَ پارلیمنٹ ءِ آجوئی ءُ جمہوری رچ  ءِ واستہ راجدپتری کرد پیلو کتگ۔ سئے شمبے ءِ روچ ءَ میاں اوستمانی پارلیمنٹ ءِ روچ ءِ درگت ءَ وتی کلوہ ءِ تہ ءَ شیری رحمان ءَ گوشت کہ شہید ذوالفقار علی بھٹو ءَ الس ءَ را سیاسی سرپدی، آئینی ھک ءُ پارلیمانی بالادستی ءِ راہ پیش داشتگ، وھدیکہ شہید بے نظیر بھٹو ءَ ھم الس ءِ جمہوریت ءُ الس ءِ حق ءِ بحالی ءِ واستہ بے دروریں قربانی داتگ۔ آئی ءَ گوشت کہ ایوک ءَ یک مھکمیں پارلیمنٹ ءِ وسیلگ ءَ کانود سازی ءُ راجی پالیشی ءِ تہ ءَ الس ءِ واھشت آناں جوانیں رنگ ءَ جوڑ کنگ بیت کنت، اختلاف ءِ شرپ، گپ ءُ تران ءُ آئینی راہ جمہوری چاگرد آنی راستیں زور اِنت۔ آئی ءَ گوشت کہ جمہوری نظام ءَ را ایوک ءَ زالبول، ورنا ءُ درستیں تبک آنی بامردیں بھر زوری ءَ گوں گیش مھکم کنگ بیت ءُ پیپلز پارٹی الس ءِ ھک آنی دیمروئی ءِ واستہ وتی جزم ءِ سر ءَ مھکم اِنت، آئین ءِ بالادستی ءُ جمہوری قدر ءُ قیمت آنی تہ ءَ مھکم اِنت۔ شیری رحمان ءَ گوشت کہ جھان ءِ تک ءَ پارلیمنٹ آنی نیام ءَ کمک، یکے دومی ءِ شرپ ءُ یکجائی کوشست دائمی امن ءِ بنیات اِنت۔