پارلیمنٹ راج ءِ واھشتانی راستیں جارکش ءُ جمہوری نظام ءِ مھکمیں بن پد اِنت بلوچستان ءِ سر وزیر

کوئٹہ۔ 30 جون (اے پی پی): بلوچستان ءِ سر وزیر میر سرفراز بگٹی ءَ گشتگ پارلیمنٹ الس ءِ واھشتانی راستیں جارکش ءُ جمہوری نظام ءِ مھکمیں بن پد انت۔ سئے شمبے ءِ روچ ءَ جھان ءِ پارلیمنٹ ءِ روچ ءِ موہ ءَ وتی کلوہ ءِ تہ ءَ آئی ءَ گوشت کہ یک مھکمیں، سرگرم ءُ بااختیاریں پارلیمنٹ الس ءِ نمائندگی، موثر کانود سازی، احتساب ءُ شفاف حکومت داری ءِ دل یکیمی کنگ ءِ ضامن اِنت۔ بنجاھی وزیر ءَ گوشت کہ پارلیمنٹ ءِ جھان ءِ روچ مارا آئین ءِ بالادستی، کانود ءِ حاکمیت، جمہوری ارزشت آنی دیمروئی ءُ السی ھزمت ءِ واستہ وتی جزم ءِ نوک کنگ ءِ موہ دنت۔ آئی ءَ گوشت کہ جمہوری چاگرد آنی دیمروئی ءِ واستہ انچیں مھکمیں پارلیمانی ادارگ آنی سر ءَ بندوک اِنت کہ آ الس ءِ واھشت آنی رد ءَ کانود جوڑ کن اَنت ءُ راجی نپ ءَ را اولی جاہ ءَ ایر کن اَنت۔ آئی ءَ گوشت کہ بلوچستان حکومت مھکم، توانمند ءُ کارآمدیں پارلیمانی روایات ءِ دیمروئی ءِ سر ءَ ایمان دار ایت ءُ صوبگ ءِ تہ ءَ جمہوری ادارگ آناں مھکم کنگ، شفافیت، احتساب ءُ کانود ءِ حکمرانی ءِ دیمروئی ءِ واستہ عملی گامگیج کنگ ءَ برجاہ اِنت۔ آئی ءَ گوشت کہ بلوچستان اسمبلی الس ءِ جیڈھ آناں گیواری، موثر کانود جوڑ کنگ، راجی نپ آنی رکھینگ ءُ شفافیں حکومت داری ءِ دیمروئی ءِ تہ ءَ کلیدی کرد پیلو کنگ ءَ اِنت ءُ اے گچین بوتگیں السی نمائندہ آنی ذمہ واری اِنت کہ آ الس ءِ بھروسہ ءِ سر ءَ زندگ بہ بنت، آئین ءُ کانود ءِ برجائی ءَ بہ کن اَنت ءُ راجی نپ آناں اولیت بہ دنت۔ بلوچستان ءِ سر وزیر ءَ گوشت کہ جمہوری ادارگ آنی استحکام، آئینی بالادستی، کانود ءِ حکمرانی ءُ الس ءِ بھروسہ پاکستان ءِ رژن، مھکم ءُ وشھالیں باندات ءِ ضمانت انت۔ آئی ءَ اے جزم ءِ یک رندے پدا گوشت کہ صوبائی حکومت جمہوری ارزشت، مھکمیں پارلیمانی نظام ءُ السی ھزمت ءِ دیمروئی ءِ واستہ وتی کوشست آناں برجاہ دار ایت۔