سندھ ءِ آپ ءِ منوگری پاکستان ءِ 240 ملین مردمانی جان اِنت، منوگری ءِ یک نیمگی مھتل کنگ یا بدل کنگ ممکن نہ اِنت، عطا اللہ تارڑ

اسلام آباد۔30جون  (اے پی پی): وفاقی وزیر ءِ اھوالکاری ءُ شنگکاری عطا اللہ تارڑ ءَ گوشت کہ سندھ ءِ آپ ءِ منوگری پاکستان ءِ 240ملین مردم آنی جان اِنت، ایشی ءِ تہ ءَ یک نیمگی ترمیم، منسوخی یا مھتل کنگ ءِ ھچ وڑیں امکان نیست۔ بھارت ءَ یک نیمگی ءَ اے منوگری ءِ مھتل کنگ ءِ ناکامیں کوشست کتگ ات کہ ایشی ءِ سبب ءَ آئی ءَ را جتا جتائیں میاں اوستمانی دیواناں شرمندگی ءِ دیمپانی کنگی بوتگ ات۔ پاکستان آپ ءِ ھک ءِ رکھینگ ءِ واستہ ھمک پڑ ءَ گام گیج کنت ۔ آئی ءَ اے ھیالانی درشانی سئے شمبے ءِ روچ ءَ جناح کنونشن سینٹر ءَ ’’سندھ ءِ آپی منوگری، امن ءُ دمگی برجائی ءِ ھاسیں وسیلگ‘‘ ءِ سرھال ءَ میاں اوستمانی سیمینار ءِ بنداتی دیوان ءَ گشتانک دیان ءَ کت۔ اے موہ ءِ سر ءَ وزیر دفاع خواجہ محمد آصف، سابق وفاقی وزیر خرم دستگیر، سابق صدر نیشنل ڈیفنس یونیورسٹی لیفٹینٹ جنرل (ر) لسر ریاض، انسٹیٹیوٹ آف ریجنل سٹڈیز کے صدر ایمبیسیڈر جوہر سلیم، سابق وفاقی وزیر قانون احمد بلال صوفی، انڈس واٹر ٹریٹی کمشنر سید مہر علی شاہ  ءَ ھوار میاں اوستمانی آپ  ءِ علم ءَ شاھوکار  ھم ھوار اتنت۔ وفاقی وزیر ءِ اھوالکاری ءَ گوشت کہ مرچی ما ایوک ءَ سندھ ءِ آپ ءِ منوگری ءِ سر ءَ گپ ءُ تران کنگ ءَ نہ ایں بلکینگ ءَ پاکستان ءِ 240لکھ ءَ چہ گیش مردم آنی جوگولر وین ءِ سر ءَ گپ ءُ تران کنگ ءَ ایں ۔ درّے سندھ ءِ تہذیب مئے راجی پجار ءُ مئے یک راجی پجار ءِ بُن ھشت اِنت۔ ما ھمے مزنیں تہذیب ءِ وارث ایں۔ ما یک راجے کہ دریائے سندھ ءُ آئی ءِ کش ءُ گوراں نندوک ایں ۔ آپ زندگی انت، دریائے سندھ ءَ پاکستان ءَ را زندگی داتگ۔ آئی ءَ گوشت کہ دریائے سندھ مئے جگولر رگ اِنت ءُ ایشی ءِ آپ ءِ سر ءَ پاکستان ءِ 24لکھ اُلس آناں ناگزیریں ھک است اِنت۔ آئی ءَ گوشت کہ پاکستان ءِ واستہ آپ ایوک ءَ یک وسیلگ ءِ نہ انت بلکینگ ءَ زندمان ءِ گپ انت۔ سندھ دریا ءِ آپی نظام ءَ صدیاں چہ دنیا ءِ کوھن تریں تہذیباں چہ یکے ءَ آپ داتگ۔ آئی ءَ گوشت کہ گلگت بلتستان ءِ برزیں کوہ آں چہ بگر داں پنجاب ءُ سندھ ءِ زرخیزیں دشتاں اے آپ ءَ مارا جغرافیہ ءُ راجدپتر ءَ گوں ہمگرنچ کتگ۔ پاکستان ءِ کسہ بازیں وڑا دریائے سندھ ءِ کسہ انت۔ وفاقی وزیر ءِ اھوالکاری ءَ گوشت کہ 1960ءِ سندھ ءِ آپانی منوگری ءِ میاں اوستمانی سیادی آنی تہ ءَ یک جتائیں جاگہ ​​ءِ واھند اِنت۔ اے منوگری کہ ورلڈ بینک ءِ چیردستی ءَ دستخط کنگ بوتگ، جنگ، سیاسی آشوب ءُ دیریں کش ءُ چیل ءِ باوجود وتی جاہ ءَ برجاہ بوتگ۔ آئی ءَ گوشت کہ شش دہائی ءَ چہ گیش وھد ءَ اے منوگری ءِ مھکمی اے گپ ءِ درشان ءَ کنت کہ کمک، گپ ءُ تران ءُ میاں اوستمانی جزم آنی سر ءَ پاسداری امن ءِ واستہ یکیں پائیداریں راہ انت۔ اے منوگری ءِ سرا رہبندانی سرا مبنی میاں اوستمانی نظام ءِ یک برجمیں مثالے کہ ایشی ءِ تہا نیک نیتی، منوگری ءِ شرپ ءُ تنازعات ءِ پرامن گیواری ءِ اصولانی عکاسی کنگ بوتگ۔ آئی ءَ گوشت کہ اے ایوک ءَ قانونی بزانت نہ اَنت بلکیں ھما بنیات اَنت کہ ایشی ءِ سر ءَ بھروسہ جوڑ کنگ بیت۔ وفاقی وزیر ءَ گوشت کہ مزن وزیر شہباز شریف، فیلڈ مارشل سید عاصم منیر ءُ وزیر دفاع خواجہ محمد آصف ءَ جتا جتائیں موہ آنی سر ءَ اے گپ پدر کتگ کہ پاکستان ءِ الس ءَ دریائے سندھ ءِ آپ ءِ سر ءَ ھک ھست ءُ سندھ ءِ آپ آنی منوگری ءَ را یک نیمگی رنگ ءَ ترمیم، رد کنگ یا منسوخ کنگ نہ بیت۔ عطا اللہ تارڑ ءَ گوشت کہ اے منوگری وت مہ وتی رضامندی ءَ چہ وجود ءَ اتکگ ءُ ایشی ءِ تہ ءَ ھرچ ترمیم یا ترمیم ءِ واستہ ایوک ءَ وت مہ وتی رضامندی لوٹ ایت۔ آئی ءَ گوشت کہ بھارت ءَ اے منوگری ءَ را یک نیمگی مھتل کنگ ءِ ناکامیں کوشست کتگ ءُ جھان ءِ تک ءَ کانود فورم ءَ ھوار جتا جتائیں فورم آنی تہ ءَ شرمندگی ءِ دیمپانی کنگی بوتگ۔ آئی ءَ گوشت کہ نزوریں بُن ھشت آنی سر ءَ جوڑ بوتگیں ڈھانچہ ھلاس بیت۔ وفاقی وزیر ءِ اھوالکاری ءَ گوشت کہ اے وھد ءَ کہ موسمیاتی بدلی ءِ رفتار ترند بوھگ ءَ اِنت، گلیشیر  گوں ترندی   ءَ آپ بوھگ ءَ اِنت ءُ آپ ءِ کمی مئے دور ءِ مزنیں چیلنج جوڑ بوھگ ءَ اِنت، اے منوگری ءِ رکھینگ ءِ ضلورت گیش گیش بوتگ۔ آئی ءَ گوشت کہ ھمے ضلورت ءِ چیر دستی ءَ مرچی اے دیوان ءَ میاں اوستمانی زانتکار آناں یکجا کنگ بوتگ تانکہ آپ ءِ ارزشت، موسمی بدلی، آپ ءِ کمی ءُ درستاں چہ گیش سندھ آپانی منوگری ءِ ارزشت ءِ سر ءَ گپ ءُ تران کنگ بہ بیت۔ آئی ءَ گوشت کہ جنوبی ایشیا ءَ دگنیا ءِ نزیک ءَ یک چارمی بھر ءِ آبادی نشتگ۔ مئے اجتماعی آیوکیں باندات ءِ سرا ما آپ ءَ را تنازعہ ءِ بدل ءَ تعاون ءِ وسیلہ جوڑ بہ کنیں۔ آئی ءَ گوشت کہ راجدپتر مارا اے سکین ءَ دنت کہ دریا تہذیب آناں بہر نہ کن اَنت بلکیں آھاں یکجاہ کن اَنت۔ آئی ءَ گوشت کہ دریا سیمسر، سیاست ءُ نسل آناں چہ دیم ءَ رؤنت۔ آئی ءَ گوشت کہ فطرت سیمسراں نہ من ایت ءُ انسانیت ءِ یکجائی چیلنج آناں یکجائی گیواری ءِ ضلورت انت۔ وفاقی وزیر ءَ گوشت کہ آپ ءِ بند کنگ یا بند کنگ ءِ ھرچ وڑیں کوشست مدام ناکام بیت پرچا کہ آپ وتی راہ ءَ وت شوھاز کنت۔ آئی ءَ گوشت کہ آپ ءَ را سلاھ ءِ رنگ ءَ کارمرد کنگ یا یک نیمگی ءَ تپاک کتگیں بندوبست آناں بدل کنگ ءِ کوشست نہ ایوک ءَ دمگی امن ءُ ایمنی ءَ را ھراب کنت بلکیں میاں اوستمانی کانود ءِ گیشیں فریم ورک ءَ را ھم تاوان دنت۔ آئی ءَ گوشت کہ میاں اوستمانی منوگری آناں آسراتی ءِ رد ءَ مھتل کنگ یا یلہ کنگ نہ بیت۔ راجانی نیام ءَ اعتماد ءِ برجاہ دارگ ءُ میان استمانی رھبند ءِ برجائی ءِ ھاترا منوگری آنی شرپ المی اِنت۔ آئی ءَ گوشت کہ پاکستان مدام ایمن سیادی، جوڑیشت گپ ءُ تران ءُ منوگری آنی ایمانداری ءَ گوں عمل کنگ ءِ واستہ جزمیگ بوتگ۔ بلے اگاں پاکستان ءِ آپ ءِ بند کنگ ءِ کوشست کنگ بہ بیت گڑا مئے راجی سروکی پاکستان ءِ راج ءِ آپ ءِ حق ءِ پچ کنگ ءِ ھاترا یک موثریں پسو ءِ دیگ ءِ ھاترا جزم اِنت۔ آئی ءَ گوشت کہ وزارت ءِ اھوالکاری ءُ نشریات ءَ اے درگت ءَ میڈیا ءُ اسٹریٹجک کمیونیکیشن ءِ کرد ءَ را من ایت۔ ردیں ھال ءُ اھوال ءُ گمراہ کنوکیں بیانیہ ءِ دور ءَ اے المی انت کہ دروگیں بیانیہانی سرا حقائق ءُ پروپیگنڈا ءِ سرا راستی غالب بہ بنت۔ آئی ئَ گوشت کہ زمہ واریں رسانکدر ئِ تپاکی، امن ئِ دیمروئی ئُُ اعتماد سازی ئِ گامگیج آنی مھکم کنگ ئَ ھاسیں کرد ئِ پیلو کت کنت۔ وفاقی وزیر ءَ گوشت کہ مرچی اے سیمینار ءِ وسیلگ ءَ سرجمیں دگنیا ءِ نامداریں پالیسی ساز، کانود ءِ ماہرین، اکیڈمک ءُ پیشہ ور یکجا کنگ بوتگ اَنت کہ آھانی یکجائی بصیرت ءُ ھیال ءُ لیکہ ءَ چہ مئے سرپدی ءَ را یقینی رنگ ءَ گہتر کنگ بیت ءُ اے ھاسیں تپاکی ءِ رکھینگ ءُ میاں اوستمانی مھکم کنگ ءِ واستہ ارزشتی ایں سفارش آنی تیاری ءَ کمک رسیت۔ آئی ءَ گوشت کہ مرچی مارا اے جزم ءِ پدا پدر کنگ لوٹ ایت کہ ما نہ ایوک ءَ اے منوگری ءِ تقدس ءِ رکھینگ ءَ ہر قیمت ءَ کن ایں بلکینگ ءَ دریائے سندھ ءِ آپ آنی سر ءَ پاکستان ءِ 240لکھ اُلس ءِ ناگزیریں ھک ءِ رکھینگ ءِ واستہ ھمک ممکنیں گامگیج چست کن ایں ۔ وفاقی وزیر برائے اھوالکاری ءَ گوشت کہ دریائے سندھ ءِ آپ ھزاراں سال ءَ چہ روان اِنت، ایشی ءِ تہ ءَ بدلی گندگ بوتگ، ایشی ءَ انگت ءَ بے رکاوٹ ءَ زندمان ءِ کمک کنگ ءَ اِنت۔ آئی ءَ گوشت کہ آیوکیں نسل آنی واستہ امن ءِ علامت ءُ یکجائی وشھالی ءِ رنگ ءَ اے آپ آنی برجائی مئے یکجائی ذمہ واری اِنت۔ آئی ءَ اے سیمینار ءِ برجم دارگ ءِ ھاتر ءَ انسٹی ٹیوٹ آف ریجنل اسٹڈیز ءُ درستیں شریک آناں شگر ءُ منت گپت۔ وفاقی وزیر برائے اھوالکاری ءَ وتی جزم ءِ درشان کت کہ ما پاکستان ءِ الس ءِ آپ ءِ ھک ءِ رکھینگ ءِ واستہ توامیں میاں اوستمانی دیوان آنی تہ ءَ کوشست کن ایں، بھارت ءِ نیمگ ءَ اے منوگری ءِ بدل کنگ ءِ یا یک نیمگی رنگ ءَ بدل کنگ ءِ ناجائزیں کوشست کنگ بوھگ ءَ انت، اے گپ ممکن نہ انت۔ آئی ءَ گوشت کہ آپ ءِ حق دائم ءَ مقدس مان ایت ۔ وفاقی وزیر ءَ گوشت کہ پاکستان ءِ الس گیشتر کشت ءُ کشاری ءِ سر ءَ انحصار کن اَنت، کشت ءُ کشاری مئے ملک ءِ مڈی اِنت۔ آئی ءَ گوشت کہ مارا موسمیاتی بدلی ءِ وڑیں چیلنج آنی دیمپان اِنت، البت مارا مرچی اے گپ ءِ سر ءَ دل یکیمی کنگ لوٹ ایت کہ اے منوگری برجاہ مان ایت ءُ پاکستان دریائے سندھ ءَ گوں سیادی داروکیں پاکستانی آنی روزگار ءُ زندمان ءِ رکھینگ ءِ وتی جزم ءِ سر ءَ مھکم اِنت۔