پاکستان وتی آپی حقانی سرا سمجھوتہ نہ کنت، ڈاکٹر مصدق ملک

اسلام آباد۔29جون  (اے پی پی): موسمیاتی بدلی ءُ چاگردی یکوئی ءِ وفاقی وزیر ڈاکٹر مصدق ملک ءَ گوشت کہ گوستگیں یک ءُ دو ماہ ءِ تہ ءَ سندھ ءِ آپانی معاہدہ ءَ را میاں اوستمانی تک ءَ چست کنگ بوتگ۔ پاکستان ءِ معیشت، روزگار ءُ وردن ءِ سلامتی ءِ مستریں بھمک آپ ءُ کشت ءُ کشاری ءِ سرا انت۔ پمیشکا ملک وتی آپی حقانی سرا ھچ وڑیں سازش نہ کنت۔ پاکستان میاں اوستمانی تک ءَ ھم وتی موقف ءَ را جوانیں رنگ ءَ پدر کنگ ءَ اِنت ءُ آیوکیں میاں اوستمانی کانفرنس ءَ سندھ ءِ آپ ءِ منوگری ءِ کیس، میاں اوستمانی کانود ءُ جہل ءِ تہ ءَ جاہ منندیں ملک آنی آپی ھک آنی سر ءَ سرجمیں رنگ ءَ پیش کنگ بیت۔ آ دوشمبے ءِ روچ ءَ اھوالکاری ءُ نشریات ءِ وفاقی وزیر عطا اللہ تارڑ ءِ گوما پریس کانفرنس ءَ گوں گشتانک دیگ ءَ ات۔ وفاقی وزیر ڈاکٹر مصدق ملک ءَ گشتگ کہ پاکستان ءِ 40 ءَ چہ 50 درسد آبادی کشت ءُ کشاری ءِ سرا بندوک انت، وھدیکہ راجی معیشت ءِ 20 ءَ چہ 25 درسد ھم کشت ءُ کشاری ءَ گوں بندوک انت۔ آئی ءَ گوشت کہ گندم، سبزی ءُ اے دگہ کشت ءُ کشاری سامان کہ ھمک گس ءَ کارمرد کنگ بنت ملک ءِ سد درسد وردن ءُ وراک ءِ ایمنی ءَ گوں بندوک انت۔ پاکستان ءَ 50 درسد روزگار، 20 تاں 25 درسد معیشت ءُ 100 درسد وردن ءُ وراک ءِ ایمنی ءِ بندوک آپ ءُ کشت ءُ کشاری ءِ سرا انت پمیشکا اگاں کسے پاکستان ءِ آپ ءَ دست بہ جنت گڑا ایشی ءَ ملک ءِ معیشت، روزگار ءُ وردن ءِ ایمنی ءِ سرا مستقیم اثر کپیت۔ آئی ءَ گوشت کہ پاکستان وتی آپ ءِ سر ءَ ھچ وڑیں سمجھوتہ نہ کنت۔ ما ھرکس ءَ کہ مئے آپ ءَ دست بہ جنت آئی ءِ دست ءَ کشّ ایں. آئی ءَ گوشت کہ پاکستان ءَ نہ ایوک ءَ اے جار جتگ بلکینگ ءَ گوستگیں یک ءُ نیم سال آنی تہ ءَ دو رند ءَ عملی رنگ ءَ اے گپ ھم ثابت کتگ کہ آ وتی راجی نپ آنی رکھینگ ءِ سرجمیں توان ءَ دار ایت۔ آئی ءَ گوشت کہ مئے قوت دو رند ءَ سیسہ ءِ دیوال ءِ رنگ ءَ اوشتاتگ ءُ اے گپ ءَ پدر کت کہ پاکستان ھرچ ​​وڑ ءَ وتی ھک آنی رکھینگ ءَ کنت۔ ڈاکٹر مصدق ملک ءَ گشتگ کہ اے معاملہ ایوک ءَ پاکستان ءِ نہ انت بلکیں دنیا ءِ ہما درستیں ملکانی انت کہ دریا ءِ جہل ءَ جاہ منند انت۔ آئی ءَ اے جُست چست کُت کہ آیا نوں دگنیا اے رھبند ءَ منّ اِیت کہ بُرزیں دمگاں جاہ منندیں ملک چہ جھلیں دمگاں نندوکیں مردمانی آپ ءَ بند کن اَنت ءُ وتی چُکاں تُنّیگ ءَ دار اَنت؟ اگاں چوش بہ بیت گڑا دنیا ءِ ارباں مردمانی بنیادی حق خطرہ ءِ آماچ بنت۔ گوستگیں روچاں برسلز ءَ بوتگیں دیوان ءُ کانفرنسانی تہ ءَ ھم پاکستان ءَ ھمے موقف پیش کتگ ءُ آیوکیں میاں اوستمانی کانفرنس ءَ ھم اے کیس دگنیا ءِ دیم ءَ ایر کنگ بیت۔ آئی ءَ گوشت کہ دگنیا ءَ اے پیسلہ کنگی اِنت کہ میاں اوستمانی تک ءَ انصاف چی اِنت ءُ ایشی ءِ تہ ءَ جہلیں دمگ آنی تہ ءَ نندوکیں مردم آناں آپ ءِ بنیاتی ھک ھست یا نہ۔ وفاقی وزیر ءَ گوشت کہ دگنیا ءِ گیشتریں دریا ہچ وڑیں منوگری ءِ بدل ءَ میاں اوستمانی رہبند ءُ روایات ءِ رد ءَ چلائینگ بنت۔ آئی ءَ یک مثالے دات ءُ گشت کہ دریائے نیل بازیں ملکاں چہ گوزگ ءَ انت وھدیکہ یورپ ءِ دریا ہم جتاجتائیں ملکاں چہ گوزگ ءَ انت۔ اگاں اسپین ءَ لوٹ اِتیں گڑا پرتگال ءِ آپ ءَ بند کُت کنت بلے اے وڑیں گامگیج ءَ دنیا نہ منّ اِیت۔ آئی ءَ گوشت کہ روانیں آپ ءِ بند کنگ ھما وڑ ءَ غیر فطری اِنت کہ سرحد آنی سر ءَ ھوا یا وشبو ءِ بند کنگ ءِ کوشست کنگ بیت۔ آئی ءَ گوشت کہ آیوکیں کانفرنس بنیاتی رنگ ءَ انصاف ءُ بنیاتی حق آنی کانفرنس انت۔ ایشی ءِ تہ ءَ سندھ ءِ آپ ءِ منوگری ءِ قانونی، تکنیکی ءُ میاں اوستمانی کنونشنز ءِ ھوالگ ءَ درستیں تک ءُ پھنات ھم پیش کنگ بنت۔ بلے اصل جُست ایش بیت کہ آیا دنیا ءِ چار ارب مردمانی آپ ءِ حق کہ کم جہلیں دمگاں نشتگ اَنت ءُ آہانی نیام ءَ آپ ءِ بھمک ءُ بانگ یک خاصیں منوگری ءِ بدل ءَ میان استمانی رہبندانی سرا بندوک اِنت آہانی آپ ءِ حق ءِ رکھینگ بیت یا نہ۔ ڈاکٹر مصادق ملک ءَ گوشت کہ دومی جھان جنگ ءَ چہ پد دگنیا ءَ انصاف، امن ءُ بنیاتی انسانی ھک آنی رکھینگ ءِ واستہ بازیں میاں اوستمانی معاہدہ کتگ ات بلے مرچی اے رھبند چیلنج کنگ بوھگ ءَ انت۔ آئی ءَ گوشت کہ انچوش کہ دگنیا نسل کشی ءَ منگ نہ کنت ھمے رنگ ءَ ھچ راج آپ ءِ وڑیں بنیاتی انسانی ھک ءَ چہ زبھر کنگ نہ بیت۔ آئی ءَ گوشت کہ پاکستان ءَ پیسر ءَ چہ میاں اوستمانی تک ءَ اے کیس چست کتگ ءُ اے کیس ءَ را میاں اوستمانی دیوان آنی تہ ءَ گپ ءُ تران کنگ بوتگ۔ آئی ءَ گوشت کہ انوگ ءَ تاں اے موقف کارآمد نہ بوتگ۔ وفاقی وزیر ءَ گوشت کہ ما محرم ءِ ماہ ءَ نشتگ آں کہ مارا راست ءُ رد ءِ نیام ءَ مھکم بوھگ ءِ سکین ءَ دنت۔ آئی ءَ گوشت کہ ھک ءِ واستہ اوشتگ ءُ ضلورت ءِ وھد ءَ قربانی دیگ مئے 1400سال ءِ کوھنیں روایت انت ءُ مرچی ھم اے روایت ءِ سر ءَ ھچ وڑیں مصالحت نہ بیت۔ آئی ءَ میڈیا ءِ نمائندگ آناں کانفرنس ءَ بھر زوری ءِ دعوت دات کہ ایشی ءِ تہ ءَ سندھ ءِ آپ ءِ منوگری ءِ سرجمیں کانودی ءُ تکنیکی تک ءُ پھنات، میاں اوستمانی کانود، کنونشنز ءُ پاکستان ءِ موقف ءِ سر ءَ سرجمیں بریفنگ دیگ بیت ءُ ھمک جست ءِ پسو دیگ بیت۔