پارلیمنٹ جمہوری ملک ءِ مستریں بن پد اِنت، راج ءِ واھشتانی راستیں جارکش اِنت، اسپیکر راجی اسمبلی

اسلام آباد۔29جون  (اے پی پی): راجی اسمبلی ءِ اسپیکر سردار ایاز صادق ءَ گوشت کہ پارلیمنٹ کجام ھم جمہوری ملک ءِ مستریں بن پد انت ءُ الس ءِ واھشت آنی راستیں جارکش انت۔ پارلیمنٹ ءِ بالادستی جمہوری نظام ءِ استکارندہ، آئینی بالادستی، قانون ءِ حاکمیت ءُ لس مھلوک ءِ اعتماد ءِ ضامن اِنت۔ یک فعال، شفاف ءُ موثر پارلیمنٹ ءِ وسیلگ ءَ راجمانی جیڑہ ءُ راجی دیمروئی ءِ پائیداریں گیواری ءِ بنیات ءِ ھاتر ءَ دیم ءَ کیت۔ اے ھیالانی درشانی آئی ءَ میاں اوستمانی پارلیمنٹرین روچ ءِ موہ ءَ کت کہ سرجمیں دگنیا ءَ ھمک سال 30جون ءَ اقوام متحدہ ءِ چیردستی ءَ دارگ بیت۔ اسپیکر قومی اسمبلی ءَ گوشت کہ پاکستان ءِ قومی اسمبلی جمہوری ارزشت، آئینی بالادستی، شفافیں کانود سازی ءُ موثر احتساب ءِ واستہ وتی آئینی ذمہ واری آنی پیلو کنگ ءَ سرگرمیں کرد پیلو کنگ ءَ انت۔ آئی ءَ گوشت کہ کانود سازی ءِ مول ءُ مراد ایوک ءَ کانود جوڑ کنگ نہ انت بلکینگ ءَ یک ٹوھیں، کارآمد ءُ الس دوستیں کانود ءِ نظام ءِ جوڑ کنگ انت کہ ایشی ءَ چہ الس ءِ وشھالی، چاگردی انصاف، اقتصادی دیمروئی ءُ راجی یکوئی ءَ را دیم ءَ برگ بیت۔ آئی ءَ گوشت کہ قومی اسمبلی ءَ کانود سازی ءِ عمل ءَ را گیش جوانیں، شفاف ءُ نتیجہ جوڑ کنگ ءِ واستہ پارلیمانی کمیٹی آنی کرد ءَ را گیش مھکم کنگ بوھگ ءَ انت۔ آئی ءَ گیش گوشت کہ نوکیں ٹیکنالوجی، پٹ ءُ پول، ڈیجیٹل سسٹم ءُ پارلیمانی گنجائش ءَ را گیش کنگ ءِ وسیلگ ءَ کانود سازی ءِ کوالٹی ءَ را گہتر کنگ ءِ سر ءَ ھاسیں دلگوشی دیگ بوھگ ءَ اِنت۔ اسپیکر سردار ایاز صادق ءَ گوشت کہ جمہوری نظام ءِ مھکم کنگ ءِ واستہ الس ءُ پارلیمنٹ ءِ نیام ءَ موثر رابطہ ءُ الس ءِ شریکداری المی انت۔ آئی ءَ گوشت کہ پارلیمنٹ ءِ بنجاہی ذمہ واری انت کہ آ انتظامیہ ءَ را احتساب بہ کنت ءُ بدل بوھوکیں وھد ءِ رد ءَ کانود جوڑ کنان ءَ وتی وتی حلقہ آناں سرجمی ءَ نمائندگی بہ کنت۔ اسپیکر راجی اسمبلی ءَ ملکی سیاسی قوت آناں وتی اختلاف آناں شموشگ ءُ راجی مفاد، جمہوری برجائی ءُ پارلیمنٹ ءِ مھکم کنگ ءِ واستہ وت مہ وتی کمک، رواداری ءُ جوانیں سیاسی گپ ءُ تران ءَ را دیم ءَ برگ ءِ ضلورت ءِ سر ءَ زور پر دات۔ آئی ءَ گوشت کہ مھکمیں پارلیمنٹ مھکم، مھکم ءُ وشھالیں پاکستان ءِ ضمانت اِنت۔ آئی ءَ گوشت کہ پاکستان ءِ راجی اسمبلی بین الاقوامی پارلیمانی یونین ءِ فعالیں باسک ءِ بستار ءَ جہانی تک ءَ جمہوریت، انسانی ھک، کانود ءِ حکمرانی، زالبول ءُ ورنا آنی سیاسی بھر زوری، پارلیمانی سفارتکاری ءُ برجمیں دیمروئی ءِ واستہ جہانی تک ءَ جوانیں کرد پیلو کنگ ءَ انت۔ آئی ءَ اے جزم ءِ یک رندے پدا گوشت کہ راجی اسمبلی بین الاقوامی پارلیمانی یونین ءُ ایندگر میاں اوستمانی پارلیمانی فورم آنی کمک ءَ جھان ءِ امن، بین الاقوامی پارلیمانی کمک ءُ برجمیں دیمروئی ءِ مول ءُ مراد آناں سر کنگ ءِ واستہ وتی کوشست آناں برجاہ دار ایت۔ اسپیکر راجی اسمبلی ءَ دمگی ءُ جھان ءِ امن، استکارندہ ءُ دیمروئی ءِ واستہ بین پارلیمانی سیادی آناں ناگزیر لیک اتگ ءُ گوشت کہ پارلیمانی سفارتکاری جتا جتائیں ملک آنی نیام ءَ اعتماد ءِ جوڑ کنگ، تپاک، تجربگ آناں تبادلہ ءُ یکجائی کانود سازی ءِ دیمروئی ءِ واستہ ھاسیں کرد پیلو کنت۔ آئی ءَ اے جزم ءِ یک رندے پدا گوشت کہ راجی اسمبلی آئین ءِ بالادستی، جمہوری تسلسل، شفافیں گورننس ءُ موثر کانود سازی ءِ اصول آنی سر ءَ عمل کنگ ءِ وھد ءَ یک مھکم، باوقار، نوکیں ءُ موثر پارلیمانی نظام ءِ دیمروئی ءِ واستہ وتی کرد ءَ را برجاہ دار ایت۔