کیڈٹ کالج پیٹارو ءِ نودربر پارلیمنٹ ہاؤس ءِ تر ءُ تاب ءَ کتگ

اسلام آباد- 18 جون (اے پی پی ): کیڈٹ کالج پیٹارو ءِ 35 باسکی نودربر ڈل ءَ فیکلٹی ءِ باسک آنی گوما پنچ شمبے ءِ روچ ءَ پارلیمنٹ ہاؤس ءِ مطالعہ ءِ تر ءُ تاب کتگ۔ پارلیمنٹ گس ءَ سر بوھگ ءِ وھد ءَ سینیٹ سیکرٹریٹ ءِ کارندہ آنی نیمگ ءَ ڈل ءَ را وش آتک کنگ بوت۔ سینیٹ سیکرٹریٹ ءِ نیمگ ءَ شنگ بوتگیں ھالانی رد ءَ نودربر ڈل ءَ را سینیٹ میوزیم ءَ برگ بوتگ کہ اودا آھاں پاکستان ءِ پارلیمانی راجدپتر، سینیٹ ءِ جوڑیشت ءُ ردوم، آئی ءِ آئینی سفر ءُ راجی کانود سازی ءِ تہ ءَ ایوان بالا ءِ کرد ءِ بابت ءَ سرجمیں بریفنگ دیگ بوتگ۔ اے موہ ءِ سر ءَ سینیٹ ءِ راجدپتر ءُ کارکردگی ءِ سر ءَ دستاویزی فلم ھم ڈل ءَ را پیش دارگ بوت۔ ڈل ءَ سینیٹ ءِ دیوان ءِ کارروائی آنی ھم چار ءُ تپاسی کت ءُ سینیٹ ءِ باسک آنی نیمگ ءَ کانود سازی، راجی جیڈھ آنی گیواری ءُ راجی ارزشت ءِ جیڈھ آنی سر ءَ گپ ءُ تران ءِ تہ ءَ سک باز دلگوشی ءِ درشانی کت۔ نودربراں پارلیمانی کارروائی، قانون سازی ءِ جتا جتائیں پڑ ءُ ایوان بالا ءِ آئینی ذمہ واری آنی ھوالگ ءَ جُست ءُ پُرس کتگ کہ ایشی ءِ سر ءَ سینیٹ سیکرٹریٹ ءِ کارندہ آں سرجمیں ءُ وشیں پسو داتگ۔ ڈل ءِ تہ ءَ ایڈمنسٹریٹو آفیسر ہیرو ٹھاکر، اسسٹنٹ پروفیسر مسعود اختر، اسسٹنٹ پروفیسر غلام علی ءُ لیکچرر مزمل میمن ھم ھوار اتنت۔ اے موہ ءِ سر ءَ نودربراں پارلیمنٹ ہاؤس ءِ تر ءُ تاب ءَ را سک باز زانتکاری ءُ کارآمد لیک اِتگ ءُ گوشت کہ اے وڑیں اسٹڈی ٹور نوکیں نسل ءِ تہ ءَ جمہوری ارزشت، آئینی سرپدی ءُ راجی ادارگ آنی بابت ءَ سرپدی پیداک کنگ ءَ ھاسیں کرد پیلو کن اَنت۔ آہاں تر ءُ تاب ءِ جوانیں بندوبست ءُ سرجمیں بریفنگ ءِ ھاتر ءَ سینیٹ سیکرٹریٹ ءِ کارندہ ءِ منت گپت۔