صدر ءَ امریکہ ءُ ایران ءِ نیام ءَ اسلام آباد ءِ تپاک نامہ ءِ سر ءَ دستخط کنگ ءَ را وش آتک کت، مزن وزیر، نائب مزن وزیر ءُ دری کارانی وزیر، وفاقی تہی کارانی وزیر ءُ فیلڈ مارشل ءِ ستا  ءُ توسیپ

اسلام آباد۔18جون  (اے پی پی): صدر آصف علی زرداری ءَ امریکہ ءُ ایران ءِ نیام ءَ اسلام آباد ءِ تپاک نامہ ءِ دستخط ءَ را دلجمی ءَ وش اتک کنان ءَ اے تپاک نامہ ءَ را دمگ ءُ دگنیا ءِ واستہ راجدپتری ساھت لیک اتگ۔ پنچ شمبے ءِ روچ ءَ صدارت ءِ پریس ونگ ءِ نیمگ ءَ جاڑی بوتگیں بیان ءِ رد ءَ صدر ءِ مملکت ءَ گوشت کہ فروری 2026 ءَ بندات بوتگیں جیڈھ ءَ دمگ ءِ اُلس ءَ را بے دروریں تکلیف داتگ ءُ جھان ءِ توان ءِ رسگ، تجارت ءُ اقتصادی برجائی ءَ را سک باز تاوان داتگ۔ آئی ءَ اے امیت سہرا کت کہ اے وڑیں سانحہ پدا ہچبر مہ بیت ءُ دمگ ءِ ملک نوں وتی تواناں دیمروئی، وشحالی ءُ وتی اُلس ءِ وشحالی ءِ واستہ ندر کن انت۔ صدر ءِ مملکت ءَ مزن وزیر محمد شہباز شریف، نائب مزن وزیر ءُ درئی کارانی وزیر سینیٹر محمد اسحاق دار، چیف آف آرمی اسٹاف فیلڈ مارشل سید عاصم منیر ءُ وفاقی داخلہ ءِ وزیر محسن نقوی ءَ را وتی بے مٹیں سفارتی کوشست آنی واستہ شگر ءُ منت گپت۔ آئی ءَ گوشت کہ پاکستان ءَ سرجمیں بحران ءِ ساھت ءَ اصولی، متوازن ءُ جوڑیشت ءِ کرد پیلو کتگ ءُ توامیں سیادی داروکیں پریک آنی گوما رابطہ برجم داشتگ، مُدامی گپ ءُ تران، رواداری ءُ جیڈھ آناں ایمنی ءِ گوما گیواری ءِ سر ءَ زور پر داتگ۔ صدر آصف علی زرداری ءَ امریکی صدر ڈونلڈ ٹرمپ، آیت اللہ سید مجتبہ حسین خامنہ ای، ایران ءِ صدر مسعود پشمرگا ءُ درئی کارانی وزیر عباس عرقچی ءِ سروکی ءَ را ھم ساڑات کہ آہاں جیڈھ ءِ سفارتی گیواری ءَ را دل یکیمی کتگ ءُ امن ءِ دیمروئی ءِ تہ ءَ کرد پیلو کتگ۔ صدر ءِ مملکت ءَ قطر، سعودی عرب، ترکی ءُ مصر ءَ ھوار براتیں ملک آنی ارزشتی ایں کمک ءِ ھم ساڑات کہ آوانی کوشست ءُ مذاکرات ءِ دلبڈی ءَ امن ءِ برجائی ءِ کوشست آنی تہ ءَ مزنیں کردے پیلو کتگ۔ صدر ءِ مملکت ءَ توامیں پریک آناں زور پر دات کہ آ اسلام آباد ءِ تپاک نامہ ءِ سرجمیں رنگ ءَ عمل درآمد ءَ را دل یکیمی بہ کن اَنت ءُ داتگیں وھد ءِ تہ ءَ گڈی تپاکی ءِ سر ءَ سر بوھگ ءِ کوشست آناں گیش مھکم بہ کن اَنت تانکہ پائیدار امن ءُ دیمروئی ءِ راہ پچ بہ بیت۔ صدر ءِ مملکت ءَ گوشت کہ ھیرو ھما مردم اَنت کہ جنگ آناں ھلاس کن اَنت، ھما مردم نہ اَنت کہ آ جنگ آناں بندات کنگ ءِ واھشت دار اَنت۔ آئی ءَ امیت سہرا کت کہ اسلام آباد ءُ پاکستان ءِ نام ءَ اے تپاک نامہ خطہ ءَ دائمی ءُ سرجمیں امن ءِ بنیات ثابت بیت ایشی ءَ چہ ملک اقتصادی دیمروئی، توان ءِ شوبگ ءَ کمک ءُ وتی اُلس ءِ گہتری ءِ سر ءَ دلگوشی دیگ ءِ اہل بنت۔ صدر آصف علی زرداری ءَ گوشت کہ جنگ تباہی ءُ ازد ءُ رنج ءَ ابید دگہ ھچ نہ یتکگ، امن دیمروئی ءِ یکیں راہ انت۔ آئی ءَ گوشت کہ پاکستان امن ءُ وشھالی ءِ یکجائی سفر ءَ دمگ ءِ توامیں براتیں ملک آنی گوما یکوئی ءَ اوشتات کنت۔