وفاقی جان سلامتی ءِ وزیر مصطفیٰ کمال ءَ جنیوا ءَ پولیو ءِ نگرانی بورڈ ءِ چیئرمین ڈاکٹر کرس ایلس ءَ گوں گند ءُ نند کتگ، جان سلامتی ءِ شوبگ ءَ برجاھیں کمک ءِ بابت ءَ گپ ءُ تران

اسلام آباد۔23مئی  (اے پی پی): وفاقی جان سلامتی ءِ وزیر مصطفیٰ کمال ءَ جنیوا ءَ پولیو ءِ نگرانی بورڈ ءِ چیئرمین ڈاکٹر کرس ایلس ءَ گوں گند ءُ نند کتگ۔ وزارت جان سلامتی ءِ جارکش ءِ رد ءَ اے موہ ءِ سر ءَ پاکستان ءَ پولیو ءِ ھلاسی ءُ جان سلامتی ءِ پڑ ءَ برجاھیں کمک ءِ ھوالگ ءَ سرجمیں رنگ ءَ گپ ءُ تران کنگ بوت۔ کرس ایلس ءَ پاکستان ءَ جان سلامتی ءِ شوبگ ءَ انوگیں پیشرفت ءُ  وزیر مصطفیٰ کمال ءِ سروکی ءَ یکجاھیں حکمت عملی ءَ را ساڑات ءُ  گوشت کہ گیٹس فاؤنڈیشن پاکستان ءَ ویکسین ءِ دستیابی ءُ  پولیو ءِ ھلاسی ءَ را برجاہ دار ایت۔ گند ءُ نند ءِ ساھت ءَ تران کنان ءَ مصطفیٰ کمال ءَ گوشت کہ پاکستان پولیو ءِ سرجمی ءَ ھلاسی ءِ واستہ جزمیگ انت، پولیو ءِ ھلاسی مئے راجی کار انت ۔ آئی ءَ گوشت کہ یکجاھیں حکمت عملی ءُ کوالٹی ویکسینیشن مہم ءِ وسیلگ ءَ پاکستان زوت پولیو ءَ چہ پاک بیت۔ مصطفیٰ کمال ءَ گیش گوشت کہ مزن وزیر ءِ سروکی ءُ  وژن ءِ چیر دستی ءَ جان سلامتی ءِ شوبگ ءَ اصلاحات بوھگ ءَ انت ءُ  آ پولیو ءِ ھلاسی ءِ واستہ گیٹس فاؤنڈیشن ءِ کمک ءَ را ساڑات کنت۔ کرس ایلس ءَ گوشت کہ من اے سال ءِ جولائی ءَ پاکستان ءِ تر ءُ  تاب ءَ کناں۔