ناشرکاری ءِ ھلاپ ءَ جنگ ءَ پد نہ کنت بلوچستان ءِ سر وزیر

کوئٹہ۔ 09 اپریل (اے پی پی): بلوچستان ءِ سر وزیر میر سرفراز بگٹی ءَ گشتگ کہ بلوچستان یک حساسیں دمگے کہ اودا جاور ھال مدام بدل ءُ بدل بنت، البت حکومت کجام ھم جاوراں ناشرکاری ءِ ھلاپ ءَ جنگ ءَ پد کشگ ءَ تیار نہ انت۔ آئی ءَ گوشت کہ پاکستان پیپلز پارٹی ءَ مدام ناشرکاری ءِ ھلاپ ءَ جنگ ءِ رھشونی کتگ ءُ اے جُنز ءَ بے نظیر بھٹو ءَ ھوار سداں کارکناں وتی سر ندر کتگ۔ اے ھیالانی درشانی آئی ءَ جیک آباد ءَ پیپلز پارٹی ءِ باسک ءُ چیف وپ میر اعجاز حسین جکھرانی ءِ گوما میر احمد نواز عرف میر بابل خان جکھرانی ءِ پت ءِ بیرانی ءِ پد ءَ میڈیا ءَ گوں تران کنان ءَ کت۔ بلوچستان ءِ سر وزیر ءَ پٹرول ءِ نھاد ءِ بابت ءَ جُست ءِ پسو ءَ درائینتگ کہ بلوچستان ءَ سرکاری پٹرول ءِ نھاد ٹھینگ نہ بوتگ بلے سیمسر ءِ دمگاں گوں ایران ءَ غیر رسمی بیپار ءِ سبب ءَ نھادانی تہ ءَ فرق گندگ ءَ کیت وھدے کہ عمومی نرخ ملک ءِ دگہ دمگ آنی وڑ ءَ یک اَنت۔ امریکہ ءُ ایران ءِ جنگ ءِ جاورحالانی سرا گپ ءُ تران کنان ءَ آئی ءَ گشتگ کہ اگاں جنگ بندی مہ بوتیں گڈا ایشی ءِ آسر سرجمیں دمگ ءُ حاص بلوچستان ءِ سرا سک باز بوتگ انت پرچا کہ ما ہمساہگ ایں ۔ آئی ءَ صدر آصف علی زرداری، مزن وزیر شہباز شریف ءُ ھاسیں رنگ ءَ فیلڈ مارشل سید عاصم منیر ءِ سروکی ءَ را توسیپ کت ءُ گوشت کہ ایشانی زانتکاریں حکمت عملی ءِ سبب ءَ نہ ایوک ءَ پاکستان یک مزنیں بحران ءَ چہ رکینتگ بلکیں جھان ءِ تک ءَ ملک ءِ بستار ھم گہتر بوتگ۔ مرچی سرجمیں دگنیا ءِ چم پاکستان ءَ سک اَنت ۔ بنجاھی وزیر ءَ گوشت کہ مرچی پاکستان یک زمہ واریں ریاست ءِ بستار ءَ جھان ءِ تک ءَ ھاسیں کرد ءَ پیلو کنگ ءَ انت، ایشی ءَ چہ سرجمیں راج ءِ واستہ فخر ءِ وسیلہ انت۔ بنجاہی وزیر میر سرفراز بگٹی ءَ میر احمد نواز خان ءِ بیرانی ءِ سر ءَ سک باز رنج ءُ گم ءِ درشانی کتگ ءُ گشتگ کہ اے تاوان ایوک ءَ جخرانی ءِ ھاندان یا قبیلہ ءِ تاوان نہ انت بلکیں دمگ ءِ سرجمیں قبیلہانی تاوان انت کہ آہانی نہ بوھگ ءَ مدام محسوس کنگ بیت۔ اے موہ ءِ سرءَ میر سلیم کھوسہ، ظہور بلیدی، عبدالمجید بادینی، مولوی نور اللہ، حاجی برکت رند  ءُ دگہ بازیں مردم ہم آئی ءِ ہمراہ اتنت۔