بجلی ءِ شعبہ ءِ اصلاحات ءَ چہ تاوان ءُ سرکلر بار ءَ مزنیں کساسے ءَ کمی اتکگ، اویس  لغاری

اسلام آباد۔2اگست  (اے پی پی): توان ءِ وفاقی وزیر سردار اویس احمد خان لغاری ءَ گوشت کہ بجلی ءِ شوبگ ءَ حکومت ءِ نوکیں اصلاحات ءِ گامگیج آنی آسر ءَ بجلی ءِ بھر ءُ بانگ ءِ کمپنی آنی مالی تاوان، سرکلر ڈیبٹ ءُ صارف آنی سر ءَ مالی بوجھ ءَ را مزنیں کساسے ءَ کم کتگ۔ حکومت بجلی ءِ گرگ، آئی پی ءِ گرگ، شمسی توانائی، نیٹ میٹرنگ ءُ ڈسکو آنی نجکاری ءِ واستہ دائمی پالیسی فریم ورک جوڑ کنگ ءَ اِنت وھدیکہ آیوکیں سال آنی تہ ءَ بجلی ءِ نرخ آنی تہ ءَ گیش استحکام ءُ کمی حکومت ءِ مستریں مول ءُ مراد اِنت۔ یک شمبے ءِ روچ ءَ نجی ٹی وی ءِ سر ءَ ھاسیں پوڈ کاسٹ ءِ تہ ءَ تران کنان ءَ وفاقی وزیر ءَ گوشت کہ 2018 ءَ پد کلدار ءِ تہ ءَ مزنیں کساسے ءَ کمی ءِ سبب ءَ ڈالر ءِ تہ ءَ بجلی ءِ پیداوار ءِ کنٹریکٹ آنی ھرچ ءُ درچ گیش بوتگ ایشی ءَ چہ بجلی ءِ نرخ آنی سر ءَ براہ راست اثر کپتگ۔ اگاں کلدار ءِ شرف انچو کمزور مہ بوتیں گڈا بجلی ءِ نھاد استیں کچ ءَ سر نہ بوتگ ات ۔ آئی ءَ گوشت کہ گوستگیں دو ءُ نیم سال ءِ ساھت ءَ حکومت ءَ بجلی ءِ شوبگ ءَ انچیں اصلاحی رھبند آناں دیم ءَ آؤرتگ کہ ایشی ءِ چیر دستی ءَ آیوکیں وھد ءَ حکومت نوکیں بجلی ءِ براہ راست گرگ ءِ بدل ءَ مقابلہ ءِ مارکیٹ ءَ را کار کنگ ءِ اجازت دنت وھدیکہ نیشنل گرڈ ءَ را ھم ھمے نظام ءِ رد ءَ نوک کنگ بوھگ ءَ اِنت۔ وفاقی وزیر ءَ گوشت کہ ڈسکو آناں نجکاری اصلاحات پروگرام ءِ یک ھاسیں بھرے انت۔ وزارت ءِ اگدہ ءِ سر ءَ قبضہ کنگ ءِ وھد ءَ ڈسٹری بیوشن کمپنی آنی تاوان 586ارب کلدار بوتگ کہ نوں ایشی ءِ کساس 320ارب کلدار بوتگ وھدے کہ ٹیکس دہندگانی سر ءَ مالی بوجھ ھم باز کم بوتگ۔ آئی ءَ گوشت کہ سرکار ءَ ھزاراں میگاواٹ گیشیں بجلی ءِ بھا زورگ ءِ منصوبگ بند کتگ انت کہ اے المی انت ءُ آیوکیں وھد ءَ بجلی ءِ بھا زورگ ءِ واستہ ھاسیں رہبند ایر نہ کتگ انت تانکہ ضلورت ءَ چہ گیش گرانیں بجلی گرگ مہ بیت۔ سردار اویس لغاری ءَ گوشت کہ حکومت شمسی توانائی ءِ سرجمیں کمک ءَ کنت، البت نیٹ میٹرنگ ءِ واستہ بنداتی معاہدہ ھما وھد ءَ کنگ بوتگ اَنت کہ سولر پینل گران بوتگ اَنت، نوں کہ ٹیکنالوجی ارزان اِنت، شرح گیش حقیقت پسندانہ جوڑ کنگ بنت۔ آئی ءَ گوشت کہ آیوکیں وھد ءَ بیٹری اسٹوریج ٹیکنالوجی ءِ دیمروئی ءَ گوں صارف گیش ءَ چہ گیش بجلی ءِ ذخیرہ کنگ ءِ وس ءَ دار اَنت ایشی ءَ چہ راجی گرڈ ءِ سر ءَ دباؤ کم بیت ءُ بجلی ءِ نظام ءِ استحکام ءَ را گیش گہتر بیت۔ آئی پی پاور ءِ بابت ءَ گپ ءُ تران کنان ءَ وفاقی وزیر ءَ گوشت کہ حکومت ءَ جتا جتائیں آزات بجلی گس آنی گوما معاہدہ آنی سر ءَ دوبر گپ ءُ تران کتگ ایشی ءِ آسر ءَ آیوکیں سال آنی تہ ءَ کھرباں کلدار ءِ گنجائش ءِ ادائیگی ءِ مالی بوجھ کم کنگ بیت۔ آئی ءَ گوشت کہ بازیں معاہدہ آناں وت مہ وتی رضامندی ءَ ابید آمید گس آنی تہ ءَ چار ءُ تپاسی کنگ بوتگ۔ آئی ءَ گوشت کہ بجلی ءِ دُزی ءُ ریکوری ءِ جاور ھال آنی تہ ءَ مزنیں گہتری بوتگ، اگاں چہ چاریں آپریٹنگ کمپنی آنی گوما جیڈھ انگت است اَنت۔ نلمے جھلم پن بجلی منصوبگ ءِ بابت ءَ گپ ءُ تران کنان ءَ وفاقی وزیر ءَ گوشت کہ منصوبگ ءِ تہ ءَ دیر کنگ ءَ چہ نہ ایوک ءَ جوڑیشت ءِ ھرچ ءُ درچ گیش بیت بلکیں ملک ءَ را ارزانیں پن بجلی ءَ چہ ھم زبھر کنت، ایشی ءِ سبب ءَ ایل این جی، کوئلہ یا فرنس آئل ءَ چہ گرانیں بجلی پیداک کنگ لوٹ ایت۔ آئی ءَ گوشت کہ مزن وزیر محمد شہباز شریف ءَ منصوبگ ءِ زندگ کنگ ءِ واستہ سیادی داروکیں ادارگ آناں المی ئیں ہدایت داتگ، وھدیکہ واپڈا ءِ نوکیں انتظامی اے رد ءَ گامگیج کنگ ءَ انت۔ آئی ءَ گوشت کہ حکومت ءَ توان ءِ شوبگ ءِ واستہ 2035ءَ تاں یک ٹوھیں منصوبگ جوڑ کتگ ایشی ءِ چیر دستی ءَ آیوکیں وھد ءَ گیشتریں نوکیں بجلی ہائیڈرو پاور، قابل تجدید وسیلگ ءُ ایٹمی توان ءَ چہ پیداک کنگ بیت وھدیکہ تھرمل پاور ءِ تہ ءَ گیشیں گیشی کنگ نہ بیت۔ آئی ءَ گوشت کہ درآمدیں کوئلہ ءِ سر ءَ چلوکیں استیں بجلی گس آناں کم کم ءَ لوکل کوئلہ آنی تہ ءَ مٹ کنگ بوھگ ءَ انت ایشی ءَ چہ زرّ ءِ بچت بیت ءُ بجلی ءِ ھرچ ءُ درچ ھم کم بیت۔ وفاقی وزیر ءَ گوشت کہ اے وھد ءَ 76درسد بجلی چہ دمگی وسیلگ آنی وسیلگ ءَ پیداک کنگ بوھگ ءَ اِنت ءُ حکومت ءِ منصوبگ ءِ رد ءَ اے شرح 2032 یا 2033ءَ تاں 96درسد ءَ سر بیت۔ آئی ءَ گوشت کہ حکومت سبسڈی ءِ نظام ءَ را گیش کارآمد جوڑ کنگ لوٹ ایت تانکہ سبسڈی ایوک ءَ ھکدار آناں تاں محدود بہ بیت۔ سردار اویس لغاری ءَ گوشت کہ گوستگیں دو ءُ نیم سال آنی تہ ءَ صنعت ءِ واستہ بجلی ءِ بہا ءِ تہ ءَ نزیک ءَ 35درسد کمی بوتگ وھدیکہ جتا جتائیں ملکی سلیب آنی تہ ءَ 10 ءَ چہ 16درسد کمی بوتگ۔ عویس لغاری ءَ گوشت کہ حکومت ءِ مول ءُ مراد آیوکیں سال آنی تہ ءَ بجلی ءِ شرح آنی تہ ءَ گیش استحکام ءُ گہتری آرگ اِنت ءُ استیں جاور ھال آنی تہ ءَ بجلی ءِ نرخ آنی تہ ءَ سرجمیں رنگ ءَ گیشی ءِ ھچ وڑیں امکان نیست۔ آئی ءَ گوشت کہ ایوک ءَ بجلی ءِ بل آنی ڈھانچہ ءَ را آسان کنگ بوتگ تانکہ صارف آناں جوانیں رنگ ءَ سرپد بہ بنت، وھدیکہ بل ءِ سر ءَ کیو آر کوڈ اسکین کنگ ءَ چہ ھم درستیں چارج آنی تفصیل آناں سرپدی رس ایت۔ وتی زاتی کارانی بابت ءَ گپ جنان ءَ آئی ءَ وتی روحانی وابستگی، ن لیگ ءِ تہ ءَ ھوار بوھگ ءُ پارٹی سروکی ءِ گوما وتی تجربت آنی بابت ءَ گپ جتگ ءُ گوشت کہ ن لیگ ءِ سروک محمد نواز شریف ءُ مزن وزیر محمد شہباز شریف سکیں محنتی رہشون اَنت۔ مزن وزیر مارا یک ٹیم ءِ بستار ءَ سک باز سرگرم دار ایت۔ سر وزیر پنجاب مریم نواز ءِ کارکردگی ءَ گوں پارٹی ءِ مقبولیت گیش بوتگ۔ جنوبی پنجاب ءِ گورننس ءِ ھوالگ ءَ آئی ءَ گوشت کہ حکومت الس ءَ را گیش ءَ چہ گیش آسراتی دیگ ءِ واھشت مند اِنت۔ وتی ذاتی زند ءِ بابت ءَ گپ جنان ءَ سردار اویس لیگاری ءَ گشتگ کہ امریکہ ءِ نودربری ءِ زمانگ ءَ من پیزا ہٹ ءِ تہا ہم کار کتگ دانکہ وانگ ءِ ھرچ ءُ درچ ءَ ابید دگہ لوٹاں پیلو بہ کناں۔ آئی ءَ گوشت کہ ورنا آنی تہ ءَ محنت، زمہ واری ءُ وت مہ وتی ءِ جذبہ ءَ را ایرجنگ وھد ءِ ضلورت اِنت، وھدیکہ حکومت ملک ءِ توامیں پد منتگیں تبک آناں پجارینگ ءِ واستہ سک باز کار کنگ ءَ اِنت۔ اے کوشست کنت کہ دمگاں دیمروئی، وانگ ءُ زانگ، جان سلامتی ءُ روزگار ءِ واستہ برابریں موہ ءُ موہ ءِ دیم ءَ آرگ بہ بیت۔