چینی کمپنی ءَ پاکستان ءِ ٹائر جوڑ کنگ ءِ صنعت ءَ 120 ملین ڈالر ءِ سرمایہ کاری ءِ جار جتگ

اسلام آباد۔9اپریل  (اے پی پی): وفاقی وزیر برائے تجارت جام کمال خان ءَ پنچ شمبے ءِ روچ ءَ سروس لانگ مارچ ٹائرز لمیٹڈ ءِ چیئرمین مسٹر جن یونگ شینگ  ءُ آئی ءِ ڈل ءَ گوں گند ءُ نند کت۔ گند ءُ نند ءَ پاکستان ءِ ٹائر انڈسٹری ءَ سرمایہ کاری ءَ را دیمروئی دیگ، برآمدات ءِ تہ ءَ گیشی ءُ ٹیرف پالیشی ءِ ھوالگ ءَ گپ ءُ تران کنگ بوت۔ گند ءُ نند ءِ ساھت ءَ کمپنی ءَ پاکستان ءَ 120 ملین ڈالر ءِ گیشیں سرمایہ کاری ءِ جار جتگ کہ اے ملک ءِ صنعتی ءُ اقتصادی توانائی ءِ سر ءَ وتی دل یکیمی ءِ درشان اِنت۔ ڈل ءَ گوشت کہ کمپنی جون 2026ءَ تاں 70ملین ڈالر ءِ برآمدات ءِ ٹارگٹ ءِ سرجم کنگ ءِ نزیک ءَ اِنت وھدیکہ آیوکیں مالی سال ءِ واستہ 100ملین ڈالر ءَ چہ گیش برآمدات ءِ ٹارگٹ ایر کنگ بوتگ، ایشی ءَ چہ کمپنی ءَ را کمیں وھد ءِ تہ ءَ پاکستان ءِ سروکیں غیر ٹیکسٹائل برآمد کنوک آنی تہ ءَ یکے جوڑ بوت کنت۔ وفاقی وزیر برائے تجارت جام کمال خان ءَ گوشت کہ پاکستان ءَ جھان ءِ ٹائر مارکیٹ ءَ مزنیں پیشرفت کتگ، ایشی ءِ تہ ءَ امریکہ ءُ برازیل ءَ برآمدات ءَ گوں ترندی ءَ گوں گیشی بوتگ۔ آئی ءَ گوشت کہ پاکستان امریکہ ءَ ٹائر آنی پنچمی مزنیں برآمد کنوکیں ملک ءُ برازیل ءَ را ھپتمی مزنیں برآمد کنوکیں ملک جوڑ بوتگ، ایشی ءَ چہ لھتیں سال پیسر ءِ نزیک ءَ ھچ وڑیں ھست نہ بوھگ ءَ چہ یک مزنیں گامگیج ءِ دیمروئی اِنت۔ جام کمال خان ءَ گوشت کہ اے سوبمندی ءِ مستریں سبب چینی شریک آنی گوما کمک ءِ وسیلگ ءَ نوکیں ٹیکنالوجی ءُ مہارت ءِ دیم دیگ اِنت ایشی ءَ چہ دمگی پیداوار ءَ را دگنیا ءِ معیار آنی سر ءَ عمل کنگ ءُ دگنیا ءِ تک ءَ مقابلہ کنگ ءِ ھاترا توان داتگ۔ وفاقی وزیر ءَ صنعت ءِ نیمگ ءَ چست کتگیں جیڈھ آناں منگ ءِ وھد ءَ اے عزم ءِ سر ءَ زور پر دات کہ حکومت ھما شوبگ آناں سرجمیں رنگ ءَ کمک کنت کہ آ جوانیں کارکردگی ءُ برآمداتی گنجائش ءِ درشان کنگ ءَ اَنت۔ آئی ءَ گوشت کہ یک متوازن ٹیرف پالیسی ءِ زورگ بہ بیت کہ ایشی ءَ چہ بنجاہی پیداوار ءِ دلبڈی ءِ ھوار جھان ءِ مقابلہ ءِ ھاترا دل یکیمی کنگ بہ بیت۔ آئی ءَ گیش گوشت کہ حکومت پاکستان ءِ صنعتی ڈھانچہ ءَ را گیش ءُ گیوار کنگ ءِ واستہ نوکیں صنعت آناں دیمروئی ءِ سر ءَ کار کنگ ءَ اِنت کہ ایشی ءِ تہ ءَ دیمروئی ءِ مزنیں گنجائش است اِنت۔ ڈل ءَ پاکستان ءُ چین ءِ نیام ءَ صنعتی شراکت داری ءَ را ٹائر سیکٹر ءِ ترندی ءَ گوں دیمروئی ءِ واستہ مزنیں ڈرائیور ءِ رنگ ءَ گوشت۔ نوری آباد ءَ کمپنی ءِ کارجاہ ءَ را یک نوکیں ءُ کارآمدیں صنعتی یونٹ ءِ رنگ ءَ پیش کنگ بوتگ، ایشی ءِ تہ ءَ نزیک ءَ 2000 مردم کار کنگ ءَ اَنت ءُ قابل تجدید توانائی ءِ کارمردی ءَ را ھم دیمروئی دیگ بوھگ ءَ اِنت، ایشی ءَ چہ اے دمگ ءَ پائیدار پیداوار ءِ مثال آنی تہ ءَ یکے جوڑ کنگ بوھگ ءَ اِنت۔ گند ءُ نند ءَ دوئیں نیمگ ءَ اے گپ ءِ سر ءَ تپاک کنگ بوت کہ برآمد ءِ سروکی ءَ دیمروئی ءُ صنعتی توسیپ ءِ واستہ حکومت ءُ صنعت ءِ نیام ءَ کمک ءَ را گیش مھکم کنگ ءِ ضلورت اِنت۔ جام کمال ءَ گوشت کہ پاکستان ءَ را وتی صنعتی گنجائش ءِ تہ ءَ گیشی ءُ جھان ءِ مقابلہ ءِ تہ ءَ گیشی ءِ واستہ ڈائیورسیفیکیشن ءُ میاں اوستمانی شریکداری ءَ چہ سرجمی ءَ پائدگ چست کنگ ءِ ضلورت اِنت۔ سرمایہ کاراں جھان ءِ چیلنج آنی باوجود پاکستان ءِ معیشت ءِ سر ءَ دل یکیمی ءِ درشان کتگ۔