کش ءُ کرے دمگاں مفت طبی کیمپ برجاہ دارگ بنت، پاکستان ءَ سرمایہ کاری ءِ مزنیں موہ است انت۔ قیصر احمد شیخ

فیصل آباد ۔ 29 مارچ (اے پی پی): سرمایہ کاری بورڈ ءِ وفاقی وزیر قیصر احمد شیخ ءَ گشتگ کہ چنیوٹ ءِ دمگی دمگاں مفت طبی کیمپ ءِ سلسلہ برجاہ دارگ بیت پرچا کہ اے دمگاں طبی آسراتی ءِ کمی ءِ سبب ءَ گریبیں مردم علاج ءِ ھاتر ءَ سکیں مشکلات ءِ آماچ انت، پمیشکا ہر ماہ ءَ دو رند ءَ طبی کیمپ ءِ سیریز مفت بندات کنگ بوتگ۔ ڈاکٹر مفت ءَ نادراہانی پٹ ءُ پول ءُ درمان کنگ ءَ اَنت۔ مرچی چنیوٹ ءِ چک نمبر 12 سالوترانوالا ءِ دمگ ءَ مفت میڈیکل کیمپ ءِ موہ ءَ میڈیا ءَ گوں تران کنان ءَ آئی ءَ گوشت کہ اے دمگ آنی تہ ءَ نہ میڈیکل کالج است ءُ نہ مزنیں نادراھجاہ، وھدے کہ نزیکیں مزنیں شہر آنی تہ ءَ مردم آناں سر بوھگ آسان نہ اِنت، ایشی ءِ سبب ءَ گریبیں نادراہ سکیں مشکل آنی آماچ اَنت۔ وفاقی وزیر ءَ گوشت کہ ڈاکٹر کہ عام طور ءَ نجی کلینک آنی تہ ءَ ھزاراں کلدار زورگ ءَ اَنت آ مفت میڈیکل کیمپ آنی تہ ءَ سروسز کنگ ءَ اَنت، البت ادا گریبیں نادراہ آناں سرجمی ءَ مفت ءَ علاج کنگ بوھگ ءَ اِنت۔ آئی ءَ گوشت کہ انوگیں سیلاب ءَ پد دوریں دمگ آنی تہ ءَ ھم نادراھی آنی آسر گندگ بوھگ ءَ انت ءُ مزنیں کساس ءَ مردم اے میڈیکل کیمپ آنی تہ ءَ سیت زورگ ءَ انت۔ آئی ءَ وتی جزم ءِ درشان کت کہ مفت میڈیکل کیمپ آنی اے سلسلہ باقاعدہ رنگ ءَ برجاہ دارگ بیت تانکہ گیش ءَ چہ گیش نادراہ آناں علاج ءِ آسراتی پجاری کنگ بہ بیت۔ قیصر احمد شیخ ءَ ملکی ءُ میاں اوستمانی جاور ھال آنی سر ءَ تران کنان ءَ گوشت کہ مزن وزیر شہباز شریف ءُ فیلڈ مارشل سید عاصم منیر ءِ یکجائی کوشست آنی سبب ءَ پاکستان جھان ءِ تک ءَ جوانیں ءُ موثر کرد پیلو کنگ ءَ انت۔ پاکستان ءِ گوں وتی ھمساھگیں ملک ایران ءَ نزیکیں سیادی اَنت ایشی ءِ تہ ءَ خلیج ءِ ملک ھوار اَنت وھدیکہ پاکستان ءِ گوں امریکا ءُ چین ءَ ھم مھکمیں سیادی اَنت ۔ آئی ءَ گوشت کہ پاکستان ءِ توازن ءِ درئی پالیشی ءُ اصولی موقف ءِ سبب ءَ پاکستان ءِ سر ءَ میاں اوستمانی براتی ءِ بھروسہ گیش بوھگ ءَ انت ءُ دگنیا پاکستان ءَ را یک زمہ وار ءُ ھاسیں ملک ءِ رنگ ءَ چارگ ءَ انت۔ وفاقی وزیر ءَ گوشت کہ پاکستان ءَ سرمایہ کاری ءِ سک باز موہ است اَنت، جھان ءِ تک ءَ پاکستان ءِ سر ءَ دل یکیمی گیش بوھگ ءَ اِنت۔ آئی ئَ گوشت کہ بندرگاہ آنی تہ ئَ ٹرانس شپمنٹ ءِ تہ ئَ مزنیں گیشی بوتگ ایشی ئَ چہ پدر بیت کہ گلوبل تجارت ءِ دیم پاکستان ءِ نیمگ ئَ روگ ئَ اِنت۔ آئی ءَ گوشت کہ کراچی بندر ءَ ھوار دگہ بندرگاہ آنی تہ ءَ کاروباری چست ءُ ایر آنی تہ ءَ گیشی بوھگ ءَ انت ءُ حکومت ایشانی گنجائش آنی تہ ءَ گیشی ءِ واستہ گامگیج کنگ ءَ انت تانکہ تجارت ءَ را گیش دیمروئی دیگ بہ بیت۔ آئی ءَ گوشت کہ پاکستان یک امن ءُ ایمنی ءِ ملک انت کہ اودا سرمایہ کاری ءِ جوانیں موہ است انت۔ آئی ءَ گیش گوشت کہ حکومت درملکی سرمایہ کاری ءَ را دیمروئی دیگ ءُ نوکیں صنعت آنی جوڑ کنگ ءِ واستہ گامگیج زورگ ءَ اِنت تانکہ روزگار ءِ موہ پیداک بہ بنت ءُ عام مردم ءِ زندمان گہتر بہ بیت۔ آئی ءَ گوشت کہ حکومت الس آناں ریلیف پجاری ءِ واستہ ھم جوانیں گامگیج چست کنگ ءَ انت، وھدیکہ اقتصادی برجائی ءِ واستہ ھاسیں پیسلہ کنگ ءِ گوما حکومت، کابینہ ءُ ریاستی ادارگ ملک ءِ دیمروئی ءُ برجائی ءِ واستہ یکجائی ءَ کار کنگ ءَ انت، ایشی ءِ جوانیں آسر زوت پدر بنت۔ ایشی ءَ چہ پیسر وفاقی وزیر ءَ چنیوٹ ءِ جتا جتائیں دمگاں ہزاراں مستحقیں زالبول آناں سوٹ ھم بھر ءُ بانگ کتگ۔