پاکستان ءُ برطانیہ ءِ نیام ءَ براہ راست بالی گراب آنی بندات ءَ چہ ملک ءَ سیل ءُ سواد ءِ شوبگ ءَ را مزنیں کساسے ءَ دیمروئی رسیت، آفتاب الرحمن رانا

اسلام آباد۔28مارچ (اے پی پی): پاکستان ءُ برطانیہ ءِ نیام ءَ ھاسیں رنگ ءَ اسلام آباد ءُ لاہور ءَ چہ لندن ءَ براہ راست بالی گراب آنی بندات ءَ چہ پاکستان ءِ سیل ءُ سواد ءِ شوبگ ءَ را مزنیں کساسے ءَ دیمروئی رسیت۔ اے گپ پاکستان سیل ءُ سواد ءِ دیمروئی کارپوریشن ءِ منیجنگ ڈائریکٹر آفتاب الرحمان رانا ءَ گشتگ۔ اے جوانیں دیمروئی ءِ وش اتک کنان ءَ آفتاب الرحمان رانا ءَ گوشت کہ برطانیہ ءِ وڑیں کلیدی میاں اوستمانی مارکیٹ آنی گوما گہتریں بالی رابطہ کاری ءَ چہ درملکی سیل ءُ سواد ءِ پاکستان ءَ سر بوھگ ءَ را ھاسیں رنگ ءَ مزنیں پاکستانی کمیونٹی ءُ میاں اوستمانی مسافر آنی واستہ کہ آ مستندیں دود ءُ ربیدگی ءُ مہم جوئی ءِ تجربگ ءِ شوھاز ءَ انت۔ آئی ءَ گوشت کہ ششسال ءِ وھد ءِ پد ءَ 29مارچ 2026ءَ چہ لندن ءَ براہ راست بالی گراب آنی بندات کنگ ملکی سیل ءُ سواد ءِ زندگ بوھگ ءِ نیمگ ءَ یک ھاسیں گامگیج اِنت۔ ایشی ءَ چہ نہ ایوک ءَ سفر ءِ آسراتی رسیت بلکینگ ءَ پاکستان ءِ سر ءَ یک ایمن، متحرک ءُ مہمان نوازیں سیل ءُ سواد ءِ جاہ ءِ بستار ءَ جھان ءِ اعتماد ءِ بحالی ءَ ھم کمک رسیت۔ آئی ءَ گیش زور پر دات کہ پاکستان ءَ سیل ءُ سواد ءِ معیشت ءَ را دیمروئی دیگ ءِ واستہ یورپ، میاں اوستمانی ایشیا ءُ دور مشرق ءِ گیشیں شہر آنی تہ ءَ براہ راست بالی گراب آنی بنگیج کنگ المی اِنت۔ برطانیہ پاکستان ءِ واستہ سیل ءُ سواد ءِ مزنیں وسیلہ بوتگ۔ اسلام آباد، لاہور ءُ لندن ءِ نیام ءَ گہتریں رابطہ کاری ءَ چہ سیل ءُ سواد ءِ آیگ ءَ گیشی ءِ گمان اِنت، ورثہ ءُ دود ءُ ربیدگ ءِ سیل ءُ سواد ءَ را گیش کنگ ءُ کاروباری ءُ سرمایہ کاری ءِ سفر ءَ را گیش کنگ ءِ گمان اِنت۔ پاکستان ءِ سیل ءُ سواد ءِ واستہ یک انچیں کشش ءِ است انت کہ ایشی ءِ تہا شمال ءِ دم کشیں کوہانی ندارگ، کوھنیں آثار قدیمہ ءِ جاہ، رنگ ءُ دروشم ءِ دود ءُ ربیدگ ءُ جتائیں کھان ءِ تجربہ ھوار انت۔ بین الاقوامی رسائی ءِ گہتری ءَ گوں اے ملک ءَ را دنیا ءِ دراھیں دمگاں چہ سیل ءُ سواد ءِ ھاتر ءَ جوانیں جاہ ءُ بستار ءِ ھست۔ پاکستان سیل ءُ سواد ءِ دیمروئی کارپوریشن سرکاری ءُ نجی شعبہ ءِ شریک آنی کمک ءَ پاکستان ءَ را یک سروکیں سیل ءُ سواد ءِ منزل ءِ رنگ ءَ دیم ءَ برگ ءُ پائیدار ءُ ذمہ واریں سیل ءُ سواد ءِ دیمروئی ءِ واستہ جزم انت۔