ہچ سیاسی رہشون پاکستان ءَ چہ مستر نہ انت، بیرسٹر دانیال چوہدری

راولپنڈی۔27مارچ (اے پی پی): وفاقی پارلیمانی سیکرٹری برائے انفارمیشن اینڈ براڈکاسٹنگ ءِ بیرسٹر دانیال چوہدری ءَ گشتگ کہ ہچ سیاسی رہشون پاکستان ءَ چہ مزن نہ انت ءُ ملک ءِ وقار ءَ را تاوان دیگ ناقابل برداشت انت، پاکستان ءِ حلاف ءَ مہم ءِ عناصر ءُ آہانی آسراتی ءِ دیم ءَ آرگ بوتگ انت۔ مزن وزیر شہباز شریف ءِ سروکی ءَ حکومت جھان ءِ توان ءِ بحران ءِ باوجود الس ءَ را گیش ءَ چہ گیش ریلیف پجاری ءِ واستہ جوانیں گامگیج زورگ ءَ انت۔ آئی ءَ اے ھیالانی درشانی جمعہ ءِ روچ ءَ چکلالا اسکیم تھری ولایت کالونی سٹریٹ 3 اے ءَ نوک سرجم بوتگیں سوئی گیس پائپ لائن ءِ بنگیج ءِ ساھت ءَ کت۔ اے موہ ءِ سر ءَ مزنیں کساسے ءَ دمگ ءِ بزرگ ءُ مہلوک ھم ھوار بوتگ اَنت۔ بیرسٹر دانیال چوہدری ءَ گوشت کہ میاں اوستمانی جاور ھال آنی تہ ءَ ثالثی ءِ بستار ءَ پاکستان ءِ کرد دیم ءَ اتکگ ءُ جھان ءِ تک ءَ پاکستان ءِ سفارتی کوشست آناں ساڑاھگ بوھگ ءَ انت۔ آئی ءَ گوشت کہ مزن وزیر شہباز شریف ءُ فیلڈ مارشل سید عاصم منیر ءَ جہانی تک ءَ پاکستان ءِ سفارتی بستار ءَ را مہکم کتگ ءُ دگنیا پاکستان ءِ جوانیں کرد ءَ را منگ ءَ انت۔ دانیال چوہدری ءَ گوشت کہ پاکستان ءِ سفارتی سوبمندی آنی سبب ءَ بھارت ھیران ءُ ھیران اِنت ءُ بھارتی رسانکدر ھم آئی ءِ سرکار ءِ سر ءَ ایراد گرگ ءَ اِنت۔ آئی ءَ گوشت کہ جنیوا ءِ دیوان ءَ یک افسوسناکیں دیمروئی یے ھم دیم ءَ اتکگ کہ ایشی ءِ تہ ءَ پی ٹی آئی ءِ بانی ءِ چک ءِ گشتانک ءَ پاکستان ءِ جھان ءِ نام ءَ را تاوان داتگ۔آئی ءَ گوشت کہ پی ٹی آئی ءَ گوستگیں وھد ءَ آئی ایم ایف ءِ نیمگ ءَ چہ پاکستان ءِ کمک ءِ بند کنگ ءِ گپ کتگ ات ءُ نوں پاکستان ءِ جی ایس پی پلس ءِ درجہ ءِ کشگ ءِ کوشست کتگ ات، اے گامگیج راجی نپ ءِ ھلاپ انت۔ وفاقی پارلیمانی سیکرٹری ءَ گوشت کہ استیں حکومت السی گہبود ءِ ایجنڈا ءِ رد ءَ کار کنگ ءَ انت ءُ شہری آناں بنیاتی آسراتی آوانی درپگ ءِ سر ءَ پجاری اولی ترجی انت۔ دیمروئی منصوبگ آنی وھد ءُ پاس ءُ کوالٹی ءِ سرجمی ءَ را دل یکیمی کنگ بوھگ ءَ انت ءُ سیادی داروکیں ادارگ آناں ھاسیں ھدایت جاڑی کنگ بوتگ انت۔آئی ءَ گوشت کہ السی جیڈھ آنی گیواری ءِ تہ ءَ ھچ وڑیں لاپرواہی ءُ تاخیر برداشت کنگ نہ بیت، وھدیکہ ھرچ قیمت ءَ شفافیت ءُ کوالٹی ءَ را دل یکیمی کنگ بوھگ ءَ اِنت۔ آئی ءَ گوشت کہ حلقہ ءَ برجاھیں دیمروئی منصوبگ السی لوٹ آنی رد ءَ بندات کنگ بوتگ انت ایشانی نیمگ ءَ چہ نگرانی کنگ بوھگ ءَ انت تانکہ ایشانی میوہ دیم پہ دیم الس ءَ سر بہ بنت۔ مراگش ءَ بہر زوروکیں دمگ ءِ پیرین ءُ مہلوک ءَ حکومت ءِ کوشست آناں ساڑات ءُ گوشت کہ سوئی گیس پائپ لائن آہانی دیریں لوٹ بوتگ کہ ایشی ءِ سرجمی ءَ چہ دمگ ءِ بنیاتی آسراتی آنی تہ ءَ مزنیں کساسے ءَ گہتری کیت ءُ الس ءَ را ریلیف رس ایت۔