چیئرمین سینیٹ ءَ کفایت شعاری ءِ مہم ءِ چیر دستی ءَ راجی خزانہ ءَ 26 کروڑ 50 لکھ  کلدار جم کنگ ءِ پرمان داتگ

اسلام آباد۔27مارچ (اے پی پی): سینیٹ ءِ چیئرمین سید یوسف رضا گیلانی ءَ مزن وزیر محمد شہباز شریف ءِ نیمگ ءَ جار جتگیں کفایت شعاری ءِ مہم ءِ چیر دستی ءَ کفایت شعاری ءِ گامگیج آنی سر ءَ سرجمی ءَ عمل کنگ ءَ را دل یکیمی کنگ ءِ ہدایت کتگ۔ سینیٹ سیکرٹریٹ ءِ نیمگ ءَ چہ جاڑی بوتگیں بیان ءِ رد ءَ چیئرمین ءِ ہدایت ءِ پد ءَ سیکرٹریٹ ءَ وتی ھرچ ءُ درچ آنی سرجمیں چار ءُ تپاسی ءَ پد 265ملین کلدار زوتیں گامگیج ءِ رنگ ءَ وزارت ءِ ھزانگ ءِ حوالہ کتگ تانکہ اے زرّ راجی خزانہ ءَ جم کنگ بہ بنت۔ ایشی ءَ ابید آیوکیں ہفتگ آنی تہ ءَ غیر ضروری ھرچ ءُ درچ ءَ را کم کنگ ءَ گیشیں بچت ءِ پجارینگ ءِ واستہ ھم گامگیج زورگ بوھگ ءَ اِنت تانکہ گیشیں زرّ ھم راجی خزانہ ءَ جم کنگ بہ بنت۔ چیئرمین سینیٹ ءَ گوشت کہ سینیٹ یک ھاسیں آئینی ادارگ ءِ بوھگ ءِ سوب ءَ استیں اقتصادی جاور آنی تہ ءَ مالیاتی نظم و ضبط ءِ ارزشت ءَ را سرجمی ءَ سرپد اِنت ءُ ملک ءِ اقتصادی برجائی ءِ واستہ حکومت ءِ کوشست آناں سرجمی ءَ کمک کنت۔ آئی ءَ سینیٹ سیکرٹریٹ ءِ سیادی داروکیں محکمہ آناں ہدایت کت کہ آ کفایت شعاری ءِ ھوالگ ءَ ہدایت آنی سر ءَ سک باز عمل بہ کن اَنت، ایشی ءِ تہ ءَ غیر ضروری ھرچ ءُ درچ ءَ را کم کنگ، آپریشنل ھرچ ءُ درچ ءَ را کم کنگ ءُ دستیابیں وسیلگ آناں جوانیں رنگ ءَ کارمرد کنگ ھوار اِنت ءُ اے گپ ءَ ھم دل یکیمی کنگ بہ بیت کہ پارلیمانی کار، قانون ساز ذمہ واری ءُ پارلیمانی نگرانی ءِ نظام ءَ را برجاہ دارگ بہ بیت۔ چیئرمین سینیٹ ءَ حکومت ءِ اقتصادی گامگیج آنی حمایت ءِ پدر کنگ ءَ اے امیت ءِ درشان کت کہ ادارگی تک ءَ ذمہ وار مالیاتی انتظامی ءُ یکجائی کوشست راجی معیشت ءَ را مھکم کنگ ءَ جوانیں کرد پیلو کنت۔ آئی ءَ گوشت کہ سینیٹ سیکرٹریٹ ءِ نیمگ ءَ مالیاتی کارروائی آنی تہ ءَ شفاف ءُ احتساب ءِ برجائی ءَ چہ سرکاری وسیلگ آنی رکھینگ ءُ پارلیمانی کار آنی جوانیں رنگ ءَ برجم دارگ ءَ را دل یکیمی کنگ ءَ را برجاہ دار ایت۔