وفاقی داخلہ ءِ وزیر ءَ چینی سفارتخانہ ءِ تر ءُ تاب کتگ، اسلام آباد ءَ وت مہ وتی مفاد ءِ جیڈھ آنی سر ءَ تران

اسلام آباد۔27مارچ (اے پی پی): وفاقی تہی کارانی وزیر محسن نقوی ءَ سفارتی انکلیو ءَ چینی سفارت خانہ ءِ تر ءُ تاب کتگ اودا آئی ءَ را سفیر جیانگ زے تنگ ءَ وش آتک کتگ۔ گند ءُ نند ءِ ساھت ءَ انسداد ناشرکاری، سیکورٹی کمک، پولیس ایکسچینج پروگرام ءُ دمگ ءِ سرجمیں جاور ھال آنی سر ءَ وت مہ وتی دلپدردی ءِ ھاسیں جیڈھ آنی سر ءَ گپ ءُ تران کنگ بوت۔ دوئیں بامرد آنی نیام ءَ دو نیمگی سیادی ءَ را گیش مھکم کنگ ءُ سیکورٹی چیلنج آناں گر ءُ دار ءِ واستہ یکجائی حکمت عملی ءِ زیرگ ءِ سر ءَ تپاک کنگ بوت۔ گند ءُ نند ءِ تہ ءَ پاکستان ءَ نندوکیں چینی سرمایہ کار آنی سیکورٹی جیڈھ آناں گیواری ءُ آھانی اعتماد ءِ بحالی ءِ ھاترا ھاسیں ’بزنس کانفرنس‘ ءِ برجائی ءِ ھم پیسلہ کنگ بوتگ۔ منصوبگ ءَ را دو بھر ءَ بہر کنگ بوتگ، اولی بھر ءَ پاکستان ءَ چینی بزنس کمیونٹی ءَ گوں گند ءُ نند کنگ بیت، دومی بھر ءَ ھما سرمایہ کاراں گوں براہ راست رابطہ کنگ بیت کہ آ پاکستان ءَ نوکیں سرمایہ کاری ءِ واھشت دار اَنت۔ اے موہ ءِ سر ءَ وزیر داخلہ ءَ درملکی شہری ھاسیں رنگ ءَ چینی مہلوک ءِ رکھینگ ءِ واستہ ’’اسپیشل پروٹیکشن یونٹ‘‘ ءِ جوڑ کنگ ءِ ھم جار جتگ۔ آئی ءَ گوشت کہ اے یونٹ اسلام آباد ءَ ساڑی چینی شہری آنی فول پروف سیکورٹی ءَ را دل یکیمی کنت ۔ وزیر داخلہ ءَ گوشت کہ اے یونٹ ءِ کارندہ آناں پیشہ وارانہ تربیت ءِ سر ءَ ھاسیں دلگوش دیگ بیت ءُ آھاں تربیت ءِ وھد ءَ چینی زبان ھم وانینگ بیت تانکہ چینی شہری ءُ سیکورٹی ادارگ آنی نیام ءَ رابطہ گیش گہتر ءُ موثر بوت کنت۔