سر سید احمد خان ءِ 128می بیرانی سالروچ برجم دارگ بوت

اسلام آباد۔27مارچ (اے پی پی): اے موہ ءِ سر ءَ سر سید احمد خان ءِ بیرانی ءِ 128می سال درگت دارگ بوت۔ اے موہ ءِ سر ءَ جتا جتائیں میڈیا پلیٹ فارم آنی نیمگ ءَ سر سید احمد خان ءَ را یک رژنائیں اصلاح کار ءُ وانگ ءُ زانگ ءِ زانتکار ءِ بستار ءَ شگر ءُ منت گپت کہ آئی ءَ نوکیں وانگ ءُ زانگ ءُ چاگردی دیمروئی ءَ را دیم ءَ برتگ۔ سر سید احمد خان 17 اکتوبر 1817 ءَ نئی دہلی ءَ ودی بوتگ آئی ءِ اصل نام سعید احمد خان بوتگ۔ آئی ءَ وتی بنداتی وانگ ءُ زانگ ءِ زمانگ ءَ قرآن پاک ونتگ ءُ عربی ءُ فارسی لبزانک ءَ ھم ونتگ۔ آئی ءَ وتی راج ءِ دیمروئی ءِ باندات ءِ واب دیستگ ات کہ آ علم، عقل ءُ نوکیں وانگ ءُ زانگ ءِ سرا بندوک ات۔ آئی ءِ مشن ءِ مول ءُ مراد ایش ات کہ آ ذہناں بیدار بہ کنت ءُ چاگرد ءَ را فکری ءُ چاگردی دیمروئی ءِ نیمگ ءَ بہ بارت۔ ایسٹ انڈیا کمپنی ءِ کلرک ءِ بستار ءَ وتی کار ءِ بندات ءَ بگر داں سب جج ءِ عہدہ ءَ سر سید ءَ وتی اصل مول ءُ مراد ہچبر شموشت نہ کت کہ آ وانگ ءُ زانگ ءِ وسیلہ ءَ ذہناں بااختیار کنگ ات۔ آئی ءَ برصغیر ءِ تہا مسلمان جدیدیت ءِ فکری بنیاد ءِ سروک ءِ بستار ءَ ابھر کت۔ آئی ءِ مستریں سوبمندی علی گڑھ ءِ تحریک بوتگ کہ ایشی ءِ تہ ءَ ایوک ءَ یک گامگیجے نہ بوتگ بلکیں یک فکری انقلابے بوتگ۔ محمدی اینگلو اورینٹل کالج ءِ جوڑ کنگ ءُ سائنسی سوسائٹی ءِ بُن ھشت ایر کنگ ءَ آئی ءَ نسلاں نوکیں وانگ ءُ زانگ ءِ ھاترا دلبڈی دات۔ آئی ءِ جہد ءِ وسیلہ ءَ علی گڑھ زانت ءُ اصلاحات ءِ مرکز جوڑ بوت۔ سر سید احمد خان ءِ مارشت ایوک ءَ یک ادارھے ءَ بندوک نہ بوتگ بلکیں آئی ءِ واھگ بوتگ کہ وانگ ءُ زانگ ملک ءِ کُنڈ کُنڈ ءَ سر بہ کنت۔ محمدی تعلیمی کانفرنس ءِ وسیلہ ءَ آئی ءَ راجماناں متحرک کت ءُ علم ءِ شوہازگ ءِ روح ءَ بیدار کت۔ سر سید احمد خان 27 مارچ 1898 ءَ بیران بوت، آئی ءِ بیرانی ءَ پد ھم آئی ءِ میراث دیمروئی، یکوئی ءُ فکری بیداری ءِ علامت ءِ بستار ءَ ھست اِنت۔ سر سید احمد خان دو راجی نظریہ ءِ بُن ھشت ایر کنوک ءُ قائداعظم محمد علی جناح ءُ علامہ اقبال ءِ ھمراھی ءَ پاکستان ءِ بُن ھشت ایر کنوکیں رھشونانی تہ ءَ یکے زانگ بیت۔ آئی ءِ 128می بیرانی ءِ سالروچ ءِ سر ءَ سرجمیں ملک ءَ مردماں آئی ءَ را شگر ءُ منت گپتگ ءُ آئی ءِ وانینگ ءِ سر ءَ چمشانک داتگ ءُ آئی ءِ پائیداریں میراث ءُ آئی ءَ آیوکیں نسل آنی واستہ ایر کتگیں راہ ءِ ستا کرتگ۔