صدر آصف علی زرداری ءَ معیشت ، توانائی ءُ دمگی جاور ھال چار ءُ تپاسی ءِ واستہ مزن تک ءِ دیوان ءِ سروکی

اسلام آباد۔26مارچ  (اے پی پی): صدر آصف علی زرداری ءَ مزن تک ءِ مشاورتی دیوان ءِ سروکی ءَ تیل ءِ سپلائی ءِ تہ ءَ رکاوٹ ءُ پٹرولیم ءِ چیز آنی بہا ءِ تہ ءَ گیشی ءِ درگت ءَ بدل بوھوکیں اقتصادی ءُ توانائی ءِ جاور ھال آنی سر ءَ چار ءُ تپاسی کت ءُ دمگی ایمنی ءِ جاور ھال آنی سر ءَ ھم ھیال ءُ لیکہ کنگ بوت۔ پنچ شمبے ءِ روچ ءَ صدر ءِ ایوان ءِ پریس ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف  ءُ  چیف آف آرمی سٹاف  ءُ  چیف آف ڈیفنس فورسز فیلڈ مارشل سید عاصم منیر ھم ساڑی اَت۔ ایندگرہ بھر زوریں مردم آنی تہ ءَ  نائب مزن وزیر  سینیٹر محمد اسحاق ڈار، چیئرمین پاکستان پیپلز پارٹی  ءُ  پیسریگیں  وزیر خارجہ بلاول بھٹو زرداری، وفاقی وزیر داخلہ سینیٹر سید محسن رضا نقوی، وفاقی وزیر خزانہ سینیٹر محمد اورنگزیب، وفاقی وزیر توانائی و پٹرولیم علی پرویز ملک، وفاقی وزیر اقتصادی امور احد خان چیمہ  ءُ سیکرٹری  ھزانگ گند ءُ نند ءَ ساڑی اتنت۔ گند ءُ نند ءَ پاکستان ءِ معیشت ءِ سر ءَ جہانی تیل ءِ سپلائی ءُ نہادانی تہ ءَ بدلی ءِ اثر آنی چار ءُ تپاسی کنگ بیت۔ گند ءُ نند ءِ تہ مہنگائی ءِ زور آناں کنٹرول ءِ تہ ءَ دارگ ءُ توانائی ءِ سلامتی ءَ را دل یکیمی کنگ ءِ سر ءَ دلگوشی دات۔ ھزانگ ءُ پٹرولیم ءِ وزیر آناں دیوان ءَ را بریفنگ دات کہ پٹرولیم ءِ چیز آنی نرخ آنی مھکم کنگ، ایندگہ شوبگ آنی سر ءَ گیش بوھوکیں ایندھن ءِ نرخ آنی اثر آناں کم کنگ ءُ کفایت شعاری ءِ گامگیج آنی وسیلگ ءَ ھرچ ءُ درچ ءِ دباؤ ءَ را کم کنگ ءِ واستہ گامگیج کنگ بوھگ ءَ انت۔ گند ءُ نند ءَ پاکستان ءِ ایمنی، اقتصادی نقطہ نظر ءُ فوڈ سیکیورٹی ءِ سر ءَ ایشی ءِ بوت کنوکیں اثر ءِ ھواریں دمگی جاور ھال آنی سر ءَ ھم گپ ءُ تران کنگ بوت۔ گند ءُ نند ءَ راجی تک ءَ یکجاھیں حکمت عملی ءُ راجی مفاد آنی رکھینگ ءِ ضلورت ءِ سر ءَ زور پر دیگ بیت، استیں اقتصادی ڈکال ءِ رد ءَ استحکام ءَ را اولیت دیگ بیت۔ گند ءُ نند ءَ دیم ءَ آیوکیں دمگی چیلنج آنی دیم ءَ راجی تپاکی ءِ برجائی ءُ ادارگی ھمگرنچی ءَ را مھکم کنگ ءِ ارزشت ءِ سر ءَ ھم زور پر دیگ بیت۔ اے گپ ءِ سر ءَ تپاک کنگ بوت کہ اے چیلنجیں جاور ھال ءَ را جوانیں رنگ ءَ گیش ءُ گیوار کنگ ءِ واستہ اقتصادی حکومت داری، توانائی ءِ منصوبگ بندی، فوڈ سیکیورٹی ءُ سرجمیں سیکورٹی ءِ تک ءُ پھنات آناں یکجا کنگ بہ بیت۔ دیوان ءَ ایندھن ءِ کارمردی ءَ را کم کنگ ءِ واستہ الس ءِ سرپدی ءِ ضلورت ءِ سر ءَ ھم زور پر دیگ بیت، سرکاری ٹرانسپورٹ ءِ کارمردی ءَ را گیش کنگ ءُ مشترکہ سواری ءِ زورگ ءِ واستہ دلبڈی دیگ بیت۔