وفاقی داخلہ ءِ وزیر ءَ اے این ایف ءِ بنجاہی کارگس ءِ تر ءُ تاب کتگ، فاؤنڈیشن ءِ جوڑ کنگ ءِ منظوری داتگ، وانگ ءُ زانگ ءِ ادارگ آنی تہ ءَ منشیات ءِ ھلاپ ءَ سرپدی ءَ را گیش موثر جوڑ کنگ ءِ پرمان داتگ

اسلام آباد۔ 26 مارچ (اے پی پی): وفاقی تہی کار ءُ منشیات ءِ کنٹرول ءِ وزیر محسن نقوی ءَ اینٹی منشیات فورس ءِ ہیڈ کوارٹر ءِ تر ءُ تاب کتگ، ڈی جی اے این ایف میجر جنرل عبدالمعید  ءَ آئی ءَ را وش آتک کتگ۔ تر ءُ تاب ءِ ساھت ءَ وفاقی وزیر ءَ زیر تعمیر ’’نیشنل کاؤنٹر نارکوٹکس کوآرڈینیشن سینٹر‘‘ ءِ چار ءُ تپاسی کت ءُ اے این ایف ءِ ہیڈ کوارٹر ءَ برجم داشتگیں ھاسیں دیوان ءِ سروکی کت۔ گند ءُ نند ءِ ساھت ءَ وفاقی وزیر ءَ را اے این ایف ءِ کارکردگی، آپریشن ءُ کارانی بابت ءَ سرجمیں بریفنگ دیگ بوت۔ بریفنگ ءِ تہ ءَ سرپدی دیگ بوتگ کہ منشیات ءِ جرم آنی تہ ءَ سزا ءِ شرح 82درسد ءَ سر بوتگ وھدیکہ منشیات ءِ نا شریں کاروبار ءَ ھواریں 22 ملکی ءُ 9درملکی منشیات ءِ سوداگری ءِ گل آناں سوبمندیں رنگ ءَ ھلاس کنگ بوتگ۔ ایشی ءَ ابید پوست (تریاک) ءِ کشت ءُ کشار ءِ ھلاسی ءِ ھاترا چست کتگیں گامگیج ھم دیم ءَ آرگ بوتگ اَنت۔ وفاقی وزیر محسن نقوی ءَ نوکیں نسل ءَ را منشیات ءِ آفت ءَ چہ رکھینگ ءِ واستہ درستیں تک ءُ پھنات آنی سر ءَ سرجمیں رنگ ءَ کارروائی ءِ پرمان دیگ ءِ وھد ءَ گوشت کہ وانگ ءُ زانگ ءِ ادارگ آنی تہ ءَ منشیات ءِ کارمردی ءِ ھلاپ ءَ سرپدی مہم ءَ را گیش موثر جوڑ کنگ بہ بیت۔ آئی ءَ کمیں وسیلگ ءُ مردمی قوت ءِ باوجود اے این ایف ءِ جوانیں کارکردگی ءَ را ساڑات۔ اے موہ ءِ سر ءَ وفاقی وزیر ءَ کارمند آنی وشھالی ءِ واستہ ”اے ایف ایف فاؤنڈیشن“ ءِ جوڑ کنگ ءِ ھم اصولی منظوری داتگ۔ دیوان ءِ بندات ءَ اے این ایف ءِ 6 شہیدانی رُتبہانی برز کنگ ءِ حاصیں دعا کنگ بوت کہ انوگیں وھد ءَ شہید بوتگ انت۔ وفاقی وزیر داخلہ ءَ شہید آنی قربانی آناں ستا کنان ءَ گوشت کہ منشیات ءِ ھلاسی ءِ واستہ اے این ایف ءِ ازمت ستا کرز انت۔