نائب مزن وزیر ءَ دیوان ءِ سروکی کت، بچت ءُ گیشیں کفایت شعاری ءِ گامگیج آنی نگرانی ءُ عمل درآمد ءِ سر ءَ چار ءُ تپاسی

اسلام آباد۔26مارچ  (اے پی پی): نائب مزن وزیر ءُ درئی کارانی وزیر سینیٹر محمد اسحاق ڈار ءَ بچت ءُ گیشیں کفایت شعاری ءِ گامگیج آنی نگرانی ءُ عملدرآمد ءِ کمیٹی ءِ دیوان ءِ سروکی ءَ کت۔ پنچ شمبے ءِ روچ ءَ نائب مزن وزیر کارگس ءِ نیمگ ءَ جاڑی بوتگیں بیان ءِ رد ءَ کمیٹی ءَ استیں جاور ھال آنی تہ ءَ مالیاتی نظم ءُ ضبط ءَ را دل یکیمی کنگ ءِ واستہ جاری گامگیج آنی اثر ءِ سر ءَ چار ءُ تپاسی کتگ۔ نائب مزن وزیر ءَ وزارت ءُ صوبگ آنی تہ ءَ پیسر ءَ چہ منظور بوتگیں کفایت شعاری ءِ گامگیج آنی سر ءَ عمل درآمد ءِ جاور ھال آنی سر ءَ ھم چار ءُ تپاسی کت۔ آئی ءَ اے رد ءَ تاں انوگ ءَ بوتگیں پیشرفت ھاسیں رنگ ءَ غیر ضروری ھرچ ءُ درچ آنی تہ ءَ کمی ءُ وسیلگ آناں جوانیں رنگ ءَ کارمرد کنگ ءِ سر ءَ دل یکیمی ءِ درشان کت۔ سینیٹر محمد اسحاق ڈار ءَ سیادی داروکیں وزارت ءُ محکمہ آناں پنت ءُ شون  کت کہ آ نگرانی ءِ نظام ءَ را گیش مھکم بہ کن انت، ٹھینگ بوتگیں رہشونی آنی سر ءَ سکیں عملی ءَ را دل یکیمی بہ کن انت ءُ مالیاتی ڈسپلن ءَ را برجائی بہ کن انت۔ دیوان ءَ مالیات، پٹرولیم، انفارمیشن ٹیکنالوجی، اقتصادی کارانی، ءُ انفارمیشن ءُ براڈکاسٹنگ ءِ وفاقی وزیراں ھوار مزن وزیر ءِ ھاسیں کمکار طارق باجوہ، آئی ٹی ءُ پٹرولیم ءِ وفاقی سیکرٹری، صوبہ آنی چیف سیکرٹری ءُ دگہ مزنیں کارندہ آں بھمک زرتگ۔