سعودی عرب ءِ ولی عہد ءِ گوما مزن وزیر ءِ ٹیلی فون ءِ گپ ءُ تران ءَ سعودی عرب ءُ براتیں راج ءِ گوما اوشتگ ءِ جزم ءِ  درشان کتگ

اسلام آباد۔25مارچ  (اے پی پی): مزن وزیر محمد شہباز شریف ءَ سعودی سروکی ءَ را پاکستان ءِ تعمیری سفارتی رسائی ءِ سرجمیں فریق آناں دل یکیمی دیگ ءِ وھد ءَ انوگیں بحران ءِ تہ ءَ سعودی عرب ءِ غیر معمولی صبر ءِ ستا کرتگ ءُ دل یکیمی داتگ کہ پاکستان مدام سعودی عرب ءُ آئی ءِ براتیں راج ءِ گوما اوشتات کنت۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءَ چار شمبے ءِ روچ ءَ سعودی عرب ءِ ولی عہد محمد بن سلمان بن عبدالعزیز السعود ءَ گوں ٹیلی فون ءِ سر ءَ گپ ءُ تران کتگ۔ بیان ءِ رد ءَ وشیں گپ ءُ تران ءِ ساھت ءَ مزن وزیر محمد شہباز شریف ءَ دو مسجد شریک ءِ نگہبان شاہ سلمان بن عبدالعزیز السعود، ولی عہد محمد بن سلمان سعودی راج ءَ را دل ءِ جہلانکی ءَ چہ ائید الفطر ءِ سلام ءُ دروت گوشت۔ سعودی ولی عہد محمد بن سلمان ءَ ھم مزن وزیر محمد شہباز شریف ءَ را ائید ءِ مبارکباد دات ءُ نیکیں واھگ آنی درشان کت۔ مزن وزیر ءَ سعودی عرب ءِ سر ءَ گوستگیں اُرش آنی پاکستان ءِ نیمگ ءَ چہ تچکیں مذمت ءِ یک رندے پدا اے گرانیں وھد ءَ بادشاھی ءُ آئی ءِ اُلس ءِ واستہ پاکستان ءِ سرجمیں یکوئی ءُ کمک ءِ درشان کت۔ مزن وزیر ءَ استیں بحران ءِ تہ ءَ استثنائی تحمل ءِ درشان کنگ ءِ سر ءَ بادشاہی ءِ سروکی ءِ توسیپ کنان ءَ دل یکیمی دات کہ پاکستان مدام سعودی عرب ءُ آئی ءِ براتیں راج ءِ گوما اوشتات کنت، انچوش کہ آہاں مدام پاکستان ءِ کمک کتگ۔ مزن وزیر محمد شہباز شریف ءَ دمگی جاور ھال آنی برجائی ءِ واستہ زوتیں وھد ءَ جنگ ءِ ھلاسی ءُ جاور ھال آناں نارمل کنگ ءِ لوٹ کتگ۔ آئی ءَ امت ءِ صف آنی تہ ءَ یکوئی ءُ دیمروئی  ءِ سر ءَ زور پر دات کہ ایشی ءِ ضلورت پیسر ءَ چہ گیش اِنت۔ آئی ءَ پاکستان ءِ سعودی ولی عہد ءِ تعمیری سفارتی رسائی ءِ بابت ءَ درستیں فریق آناں سرپد کت کہ ایشی ءِ تہ ءَ گپ ءُ تران ءُ سفارتکاری ءِ وسیلگ ءَ کش ءُ چیل ءِ ھلاسی ءُ اختلافات ءِ گیواری ءِ سر ءَ زور دیگ بیت۔ سعودی ولی عہد ءَ پاکستان ءِ امن ءِ کوشست آں ساڑات۔ دوئیں رہشوناں دوئیں ملکانی نیام ءَ ہر تک ءُ پھنات ءَ نزیکیں رابطہ ءِ برجاہ دارگ ءِ سرا تپاک کتگ۔